«Дербент-2000» цIанилусса центр

21foto_19Ларгсса нюжмардий Дагъусттаннал Туризмалул ва халкьуннал сянатирттал министерствалул сипталий Дарбантлив шадлугърал тагьарданий тIивтIунни «Дербент-2000» цIанилусса Туристътурал центр.

З. АьбдурахIманова
Центр тIитIаврий гьуртту хьунни ялув кIицI ларгсса министерствалул каялувчи МахIаммад Исяев, Дарбантуллал бакIчи Малик Багълиев, республикалул Ишбажаранчишиврул ва инвестициярттал агентствалул каялувчи Башир МахIаммадов, Дарбантуллал райондалул администрациялул бакIчи МахIаммад Жалилов ва цаймигу.
Шадлугъ дайдирхьунни Туристътурал центрданул хьхьичI ятIул лента кьукьаврийну ва центр тIивтIушиврущал барча баврийну.
Шиккува бусан, ва центр тIитIин хIукму хьуссар ларгсса шинал ноябрьданий, Республикалул БакIчи Рамазан АьбдуллатIиповлул сипталийну. Ванил мурадгу Кьиблалул Да­гъусттаннайсса личIи-личIисса халкьуннал касмучитурал каруннил дурсса ай-тай, хъус дахлансса ва туристал кIункIу буллансса. ХIасил, «Дарбант» тIисса бренд машгьур даву.
«Дербент» центрданул директор Полад Наметуллаевлул бусаврийну, шикку зий усса ур 13 инсан. Вайннал даврил мурадгу бур туристурансса аьрххирду сакин баву ва выставкардал ва презентациялул даву дачин дуллансса. Масалдаран, ца зурул хьхьичIва центрданул кьамул бувну бур машгьурсса Михаил Кожуховлущалсса журналистал, Ираннавасса инвестортал ва TRT туркнал телеканалданул журналистал. ТIайла був­ккун бур туристал ЧиркIайннал ГЭС-райн, Дубкилийсса Сулакьрал ххяли ккаккан, Хъунзахъун ва Гъунив.
МахIачкъалаллал Спорт­рал, туризмалул ва жагьилтурал иширттал комитетращал цачIуну шагьрулул школардал дуклаки оьрчIру гьарца нюжмардий Дарбантлив буцлан икьрал дурну диркIун дур.
«Дербент-2000» Туристурал центрданул кумаграйну туристураща бюхъантIиссар бигьану цивппа чув бигьалагантIиссарив, чун лавгун хъинссарив кIул буван, хъирив лаян. Шиккува хъамаллураща бюхъантIиссар цанна жула халкьуннал магьир­сса каруннал дурсса сувенирду ласунгу. Вания хьунтIиссар жучIанма бувкIсса хъамаллуран дакIний личIансса ва тIааьнсса асардал ужагъ.