Вай гьантрай гужсса гъараллу ларчIун, Буйнакскаллал райондалийсса цаппара шяраваллан тIабиаьтрал зарал биян бунни. Гай шяраваллавун лавгунни ДР-лул ХIукуматрал Председательнал хъиривчу Рамазан Жяъпаров, ганащал архIал ивзунни Дагъусттаннал МЧС-рал хъунама Нариман КъазимахIаммадов.
ХIасан Аьдилов
ХIукуматрал комиссия бивунни Аркас шяравун, гьаман га шяраваллийн бивну бур хъунмур зарал. Аркасуллал шяраву ляличIисса тагьар хьуну душиву баян бувния махъ зий бивкIссар МЧС-рал ххассалбувулт, инсантал щаллу бувну буссар гъилисса дукралул. Машинарттай тиккусса инсантуран ларсун бучIайссар хIачIайсса щин, мукунна тиккун духхайссар газрал балонну. МЧС-рал та шяраву дирхьуну дур 60 квт. энергиялул бусса генератор, чани буссар щалла шяраву. Рамазан Жяъпаров рязину ур Аркасуллал шяраву дурсса давурттая.
Яла ХIукуматрал комиссия бивунни Н. Жунгутайллал шяравун. Тикку миннал вичIи дирхьунни кIанттул инсантурал масъаларттах. Шяраваллил жяматрал тIалав бунни ччясса мутталий цIуницIа бишин тIабиаьтрал апатIрал лекьан бувсса ламу. Р. Жяъпаровлул бакIрайн лавсунни июньдалул 5-нний ламу буллай байбишин.
Яла райондалул администрациялул къатраву хьунни тIабиаьтрал апатIру биян бувсса зараллу бухлаган баврин хасъсса совещание.
Буйнакскаллал райондалийн лавгун бивкIссар мукунма министерстварттал, депутатътурал корпусрал вакилтал, газрал, электричествалул ва щинал сетирдал каялувчитал.
