Июньдалул 21-нний «ХIакьикьат» кказитрал редакциялий ДР-лул Халкьуннал Мажлисравусса Территориал каялувшиннаралул комитетрал председатель, Хасавюртуллал райондалул халкьуннал чулуха депутатну увчIуну ивкIсса Багьадур Абасовлущалсса журналистътурал хьунабакьаву хьунни.

З.АьбдурахIманова
Хьунабакьаврил мурад депутатнал цайнна халкьуннал вихшала дирхьусса ва ттинин цува зий ивкIсса ххюра шинал дяниву дур­сса давурттая бусаву бия.
Хьунабакьаву тIитIлай ДР-лул Журналистътурал Союзрал хъунама Аьли Камаловлул бувсунни, Багьадур Абасов ушиву Хасавюртуллал райондалий яхъанахъисса личIи-личIисса миллатирттал халкьуннал язи увгьусса, хъуннасса вихшала дурсса, марцIну, бусравну, сий дуну хIукуматравун увкIсса инсан.
Мукунма кIицI лавгунни, депутат зуруй кIийла –шамийла хьунаакьайшиву цува увчIусса халкьуннащал, миннащал акъасса, Медведевлул «Единая Россия» партиялул приемныйлуву цачIанма кумаг­рал хъирив бувкIсса халкьуннал масъаларттугу щаллу бувайшиву, Хасавюртуллал райондалийсса щархъаву ванал гьурттушиннарайну школарду, детсадру, щинаххуллурду бувшиву, бакьин бувшиву ва цIанагу бакIрайн ларсъсса давуртту най душиву.
Хъирив Багьадур Абасовлул кутIану бувсунни цащара райондалул жяматран ттинин дан бювхъусса давурттая ва дан дакIнийсса цIушиннардая.
«На чIярусса хъус-кьинилул заллу акъара. Акъашиву ттухлу чIурду буллусса, ттуйн вихшала дирхьусса халкьуннангу кIулссар. Хасавюртуллал райондалий бур Дагъусттаннал хъунисса ххюва миллатраясса халкь яхъанай: ярусса, къумукь, чачан, лазги ва дарги.
На навагу гужсса интернационалистра. Гьарца миллатраву ттул буссар ттула уссурвавран ккаллий­сса цIакьсса, ххаллилсса дустал.
Ттуйнсса вихшалагу миннайх­чIинни. На чIявуну хьунаакьара учительтуращал, хIакинтуращал, культуралул аралуву зузиминнащал. Ттущава бан шаймургу мудан, депутат хIисаврай на ттинин бував, ттигу бан мурадрай ура. Данмуниянияр ттун дурмуния бусан ччай бур. Хасавюртуллал райондалийсса Петроковское тIисса шяраву школа бакъа, оьрчIру буссия муххал ххуллул ялтту чIаххуврайсса Могилевск тIисса шяравун занай. Утти республикалул БакIчинайн був­ккун, жуща бювхъунни Петроковскаллал жяматран школа бан. Ва гьашинусса дуккаврил шинал миннал оьрчIру щарнил цIусса, утти­заманнул шартIругу дусса, 504 дуклаки оьрчIансса кIану бусса школалийн гьантIиссар.
Мукунма ванал кIицI лавгунни, чIявумур чIумал цачIан бучIайсса халкьуннал масъалартту кIантту-кIанттурдайсса администрациярдал бакIчитураща щаллу бан бюхъайсса бикIайшиву, миннаща хъанай бакъахьурча районнал даражалий дузал бан бюхъайсса бикIайшиву.
«Жула къуркъабацIурттал ва диялдакъашивурттал дайдихьу дур щархъал, муниципалитетир­ттал бакIчитурал, къуллугъчитурал цала жяматрал хьхьичIсса буржру биттур къабуллалаву ягу ми щаллу бан кIулшивуртту дакъашиву. Гьарнан цаятурасса жаваб­лувшинна диркIссания вайксса жямат республикалул ва билаят­рал хъуниминнал даражалийн къабуклантIиссия»,-увкунни Багьадур Абасовлул.