ОьрчIру буруччай кьинилун хас дурсса столданийсса теннисрал турнир дунни июньдалул 1-нний МахIачкъалалив политехнический колледжрал залдануву.
Бяст-ччаллавух гьуртту хьунни сайки 100 теннисчитал — школардал ва спорт-школардал оьрчIру ва ссузирдал студентътал.

Турнирданул хIакъираву бувсунни турнирданул сакиншинначи, Селектион оф Варриорс тIисса промоутерская компаниялул продюсер Аьбдулкерим Айгуновлул. «Ттул пикри хьуна ттула харжлухрах спортрахун багьсса оьрчIан бахшиш дуван. Ттулва дустуращал архIал республикалул настольный теннисрал федерациялул кабакьаврийну хIадур барду тIуркIу бансса зал, хIадур барду баннерду, бишарду теннисрал столлу. Цаягу оьрчI къулагъас дакъа къаливчIссар. Турнирданий гьуртту хьуминнан буллу­ссар футболкарду, луттирду, оьргърал бувсса вазарду, кинорайн­сса билет­ру, теннисрал ракеткарду, спорт­рал статуэткарду. Турнирданий ххув хьуминнан ва хьхьичIунсса кIанттурду бувгьуминнан буллу­ссар кубокру, медаллу, грамотартту ва арцуйнусса бахшишру.
Барчаллагь чин ччай бур бяст-ччаллавух гьуртту хьуминнахь ва турнир сакин дуван ттун кумаг бувминнахь.
Турнирданий 1-мур кIану бувгьунни МахIаммадсалихI Гусаевлул цIанийсса настольный теннисрал оьрчIал школалул, кIилчинмур кIану – МахIачкъалаллал 5-мур лицейрал, шамулчинмур – политехнический колледжрал.
Турнирданий байбихьлахьисса теннисчитурал мастер класс кка­ккан бунни Руслан Назировлул ва Алексей Коровиннул.
Натали ХIажиева,
ДГУ-рал студент душ