ЦIубутIуйсса силистталул органнал тахсир ккав­ккунни экстремизмалийн къарши бацIаврил центрданул оперуполномоченный Хидирбеков Мурад Ибрагьимовичлуй, мунал къуллугърал каши цанма мюнпат ласун ишла даврий, ва мунийну цама инсаннал ихтиярду ссуссукьу даврий. Му бакъассагу, Хидирбековлуй тахсир ккаклай бур гужирай цаманаща мунал хъус, ярагъ цIиклай икIаврий. (ст.226 ч.3.п. «г» УК РФ).

Силистталул хъиривлаявур­ттайн бувну 2014 шинал август зурул ахирданий МахIачкъалалив, Петр Первыйл ва Булачлул цIа­нийсса кIичIираваллал шан­ба­чIулий, Хидирбековлул закондалул ххуттава увккун цаннаща 7 патрон дусса травматический пистолет ва 48.600 къуруш ду­сса банкрал карта зер­ххуну дур. Ми зерххушиву аьркин багьлагьисса куццуй чагъардай кка­ккан къабувну бур, зев­ххусса пистолет ва картагу полициялул отделданийн къадуллуну дур. Гуж-къия данна тIий нигьал уллай, Хидирбековлул мунал банкрал карталул номер кIул бувну, ларсун дур мичча 48 азаллий 600 къуруш. Зевххусса 13 азарда къуруш­рансса пистолетгу цанма бивтун бур.
2016 шинал май зурул 10-нний Ленинский райондалул суд­рал бувсса хIукмулийну, М.И. Хидирбековлуй АьФ-лул УК-рал шанма статьялийн був­сса тахсир ккавккун бур. Мунан 5 шин ва кIива барз кьянкьа­сса низам дусса исправительный колониялий щяитансса ва 20 азарда къуруш аькIлул ласун­сса танмихI кьувкьуну бур.
Р.О. Ибрагьимов, МахIачкъалаллал Ленинский райондалул прокурорнал хъиривчу, юстициялул
советник.
ХIадур бувссар
Асият Абачараевал