Медициналул зузалтрал Кьинилун хасну хъуннасса шадлугъ дунни июнь зурул 17-нний МахIачкъалалив, Оьруснал драмтеатрдануву. Агьалинал цIуллу-сагъшиврул къайгъурдайми барча буван бавтIунни хIукуматрал къуллугъчитал, республикалул министерствардал вакилтал.

П. Рамазанова
— Здравоохранениялул даву билаятрал регионнай ххал дигьлагьисса, элмийсса хъиривлаявуртту дуллалисса экспертътурал советрал здравоохранениялул тагьарданун кьимат бишлай, Дагъусттаннан 2-мур кIану буллунни, му хъуннасса хьхьичIуннайшивур жулла давривусса. На ттигъанну здравоохранениялул масъаларттан хас бувсса форумрай Къиримнаву уссияв, тиккугу Дагъусттаннал опыт федерал программалуву ишла буллан кунни. Ми ишир­ттава чIалачIиссар жува ккаккиялунну зий бушиву, — увкунни ДР-лул цIуллу-сагъшиву дуру­ччаврил министр Танка Ибрагьимовлул.
Министрнал бувсунни гьашину ноябрь зуруй зунтIишиву 150 кIану бусса Республикалул перинатальный центр, дукIу диспансеризациялуву гьуртту хьушиву 450 азара инсан, ларг­сса шиннардих бурувгун ябан ва гьаз бан хьушиву хIакинтурал харжру. Бувсунни республикалий агьалинал ккал-аьдад ялу-ялун хъун хъанай душиву. Медициналул зузалт барча буллай, ХIукуматрал хъунаманал бурж чIумуйну биттур буллалисса Анатолий Карибовлул кIицI лавгунни медиктурал даву ца яла бусравмур ва аьркинмур душиву, диплом лавсун махъгу кIулшивуртту куртIгу, цIакьгу дуллан багьлагьисса бушиву хIакинтурал пиша. Мунал бувсунни республикалий чIявусса бушиву Гиппократлул хъалийн хаин къавхьуну, дакIнийхтуну зузисса хIакинтал. Бувсунни Республикалул БакIчи Рамазан АьбдуллатIиповлулгу хъунна­сса къулагъас душиву медициналул масъаларттах, му сантирай хьхьичIуннай дуваврих. Танка Ибрагьимовлул ва Анатолий Карибовлул хьхьичIунсса зузалт­ран дуллунни хIукуматрал наградартту.