Ва нюжмардий МахIачкъалалив республикалул шяраваллил маэшатраву зузиминнан дигьалагрулунсса, цала дуки-хIачIия дахлан­сса цIусса базар тIивтIунни.

Ттинин шагьрулул дязаннив­сса № 2 –мур базаллувун накI,нис, дикI даххан лавгсса халкьуннан чIявусса ккаккайссия ми даххан къахъанай, перекупщиктурал авара буллай, чув-бунугу кIичIирттаву бацIан багьлай ми дахханшиврул. Ми­ккугу чIярусса рязибакъашивуртту дикIайссия шагьрулул халкьуннаягу, кIичIирттавух бачин къахъанай бур, ххуллурду лавкьуну бур тIий.
Тикку-шикку бавцIуну дахлахисса дуки-хIачIия ци даражалул дурив ххал дан къахъанай, миннуя хъуннасса нигьачIишиву дуссия жула халкьуннал цIуллу-сагъшиврунгу.
Утти тIурча цIусса базар тIив­тIуну буссар 10-мур линиялий­сса Ахъушинскийл 24-нний.
Базар шагьрулул хъунимигу гьурттуну тIивтIуну бур Зумаритавал байран дучIан хьхьичI ва зурул 23-нний.
Шагьрулул администра­циялу­чIасса Машлул ва базаллал управлениялул пишакартурал бусаврийну, базаллуву дахлантIиссар дахьра дурсса, фермертурал ва укунмасса халкьуннал цанма маэшат­ран дучIан дурсса дуки-хIачIия. Базаллул лагмава камерарду бивхьуну, чув ци хъанай буссарив чIалантIиссар. Базаллул аьрщи ца гектар дусса дур . Шикку бусса бур дуки-хIачIия дахлансса машинар­тту бацIансса кIану, складру, маша буллансса столлу бивхьуну, дукра дукансса столовая, бигьалагансса ва чак бувансса къатри.
Утти шагьрулул халкьуннаща бюхъантIиссар перекупщиктурал каруннива машан къаларсун, дикIул, накIлил хъуслиха цивппа зузисса, ми дучIан дан цала захIмат бивхьу­сса халкьунначIату машан ласлан. Базаллул хъуниминнал хъунмасса хIаллай арендалий щицIун-бунугу кIану къабахIлантIиссар. Гьарца кьини цала хъус даххан ччиминнаща цанма чув ччай бурив ми­кку бавцIуну даххан бюхъантIиссар. Ванийн бувну, хъунмасса хIаллай кIану машан ласун бюхълай ба­къахьувкун, дахлахисса хъуслил ялув цаламур багьагу бишинсса ххуллу кьукьлакьиссар перекупщиктуран.
Н. ХIажиева