Хъунмасса Буттал кIанттул цIанийсса дяъви байбивхьусса июнь зурул 22-сса кьини щалвагу Аьрасатнаву кIицI дувай­ссар та дяъвилий жанну дуллуми дакIнийн бичаврил ва хажалат­рал кьинину.

А. Аьбдуллаева
Гьашину 75 шин хъанай дур Хъунмасса Буттал кIанттул цIанийсса дяъви байбивхьуну. 1941 шинал ссят 4 хьусса кIюрххицIун чIумал Германнал фашистал ва миннал чул бувгьуми хар-хавар бакъа ххявхссар Совет билаятрайн. Дунияллул тарихраву та дяъви ливчIссар яла оь экьибувтIусса дяъвину.
Совет халкьуннал хIат-хIисав дакъасса захIматшивурттугу, ккаши-мякьгу бувхIуну лархъссар Ватандалийх дурксса кьини, тархъан дурссар дуниял фашизмалия. Хъинну ххирану дарцIусса Бюхттулсса Ххувшаврийну жула халкьуннал ккаккан бувссар ЯтIул Аьра­луннал саллатI гъагъан бан къашайшиву чапхунчитураща. Дяъви най бивкIссар 1418 кьинигу, хьхьугу. 27 миллиондалия ливчусса инсантал ливтIуссар та дяъвилий.
Дяъви байбивхьусса кьини жула халкьуннан тачIав хъама­къаритантIиссар.
Июнь зурул 21-22-нний щалагу Аьрасатнаву ва цайми хIукуматирттай лагайссар «Аьпа­лул чирахъ» тIисса акция. Жагьилтурал ва цаймигу жяматий­сса сакиншиннардал активистал буккайссар майданнив, аьралитурансса гьайкаллачIан ва ветерантуращал архIал Ххувшаву ласлай жанну дуллусса 10-хъул миллион инсантурал дакIнийн бичлай, ла­хъайссар аьпалул чирахъру.
Ва кьини дакIнийн бичайссар, дяъвилул майданнив жанну дуллуми бакъассагу, фашистурал лагерьдайсса зулму-къиялул оьрмулуцIа бувмигу, къинттуллух ккашил ливтIумигу.
Июнь зурул 21-нний ссят 21.00 хьусса чIумал МахIачкъалалив, Лениннул комсомолданул цIанийсса паркравугу, хьунни «Аьпалул чирахъ» акция. Аьпалул чирахъру лавхъунни паркравусса Аьраличунансса гьайкалданучIа.
МахIачкъалаливсса акциялул сакиншинначитал хьунни ДР-лул Виваллил иширттал ва Жагьилтурал иширттал министерствартту, МахIачкъала шагьрулул администрациялул Спортрал, туризмалул ва жагьилтурал иширттал комитет, ДРО ВПП «Единая Россия».
Июнь зурул 21-нний хьхьувай Аьрасатнаву лавхъссар 27 миллион майлул чирахъирттал.
2009 шинал жяматийсса группалул сипталий дуллай байбивхьу­сса «Аьпалул чирахъ» акция аьдат­равун дагьну, утти гьарица шинах дуллалиссар. Ва акциялувух гьуртту хъанахъиссар Аьрасатнал чIяруми регионну ва гъансса билаятирттал агьлу.
Ларгсса шинал акциялуву гьур­тту хьуну бур 1200 Аьрасатнал шагьрурду ва шяраваллу.
Вания тихунмайгу «Аьпалул чирахъ» акциялуву гьуртту хьун аьркинссар дяъвилий жанну дуллуминнал виричушиву бусравсса гьарица инсан.