Вай интнил гъилисса, тIааьнсса гьантрай, 15-мур майрай 2016 шинал, бартлаглагиссар 95 шин жула Совет Союзрал Виричу, Баширдул арс Ризван Сулайманов ниттил увну.
Гьарица шинах кунна, гьашинугу бюхттулсса даражалий ларгунни Ххувшаврил байран Ккурккуллал шяраву. Байрандалун хасну чIюлу бувну бия щарнил ккурчIа. КIюрххила шиккун бавтIун бия шяраваллил жямат. Ххарину лечлай бия чIюлуну лархсса мюрщи оьрчIру.
А. Аьбдуллаева
Байрандалул мажлис тIитIлай, ихтилат бунни мероприятиялул сакиншинначи, школалул директор Даниял Магьдиевлул. Ванал бувсунни Ккурккуллал шярава Ватан дуруччин 129 виричу лавгшиву, минная 57 зана къавхьушиву, бувсунни дяъвилул цIараву жула халкьуннал ккаккан дурсса къучагъшивурттая. Барчаллагь увкунни дяъвилий талай бивкIсса вирттаврал оьрчIахь, уссурссуннахь ва гъан-маччанахь.
Ванал ихтилат къуртал хьуну махъ, Ххувшаву ласлай бивкIминнал суратругу дургьуну, лагма бувккунни «Бессмертный полк».
— Буттахъал чувшиву ирсирай най дуссар. Дяъвилий талай бивкIсса вирттавран лайкьсса, яхI-къирият дусса ххаллилсса жагьилтал хIакьинугу буссар жучIава. Аьралуннаву лажин кIялану цалва бурж биттур буллалисса, кьянкьа-кьурчIисса, сивсусса Ккурккуллал жагьилтурал хIакъираву цимивагу барчаллагьрал чагъар бувкIссар Аьралуннал хъуниминная. Вай гьантрайгу шяраваллил жяматрахьгу, школалухьгу барчаллагь тIисса чагъар бувкIунни ттучIан Сагидов Мурад къуллугъ буллалисса частьрал командованиялия, — бувсунни Даниял МахIаммадаьлиевичлул.
Шяраваллил жяматралгу, дуклаки оьрчIалгу хьхьичI Аьралуннавасса барчаллагьрал чагъар бувккунни Авгъаннаву интернационал бурж лахълай «За боевые заслуги» ва цаймигу медаллан лайкь хьусса Авгъан дяъвилул ветеран Сапижуллагь Аьбдуллаевлул.
Ххувшаврил байран лахъа-хъун дан ва кьини Ккурклив бувкIун бия шяраваллил агьулданущал дусшиву дусса Каспийскаллал инженерный колледжрал преподавательтал ва дуклаки оьрчIру. Колледжрал преподавательтал Абачараева Анжелика, Асият (зав. отд.) ва Сабина Закировнахъал каялувшиннаралу вайннал ккаккан дунни ххуйсса концертрал программа.
Ватан дуруччин дяъвилийн лавгсса 129-гу ккуркличунахасса цилва чивчусса шеърирдал жужру бавчIунни ва кьини шяраваллил жяматрайх ва хъамаллурайх буттал шяравалугу, щарнил жяматгу ххирасса Ханича Аьлиевал.
