«БивкIубакъасса полк­рал» маршлил акциялуву гьашинунин гьурттушинна къадурсса билаятругу гьуртту хьушиву ва гьашину тачIав бакъачIин чIявусса агьали му акциялуву гьуртту хьун бувкшиву баян бунни СМИ-рдал. ЧIявусса инсантал интернетраву, социал сетирдай чичлай бур Ххувшаврил байран цанна яла ххирамур байран душиву,

му циняв агьали гъан буллалисса, мяйжаннугусса халкьуннал байран душиву.

«БивкIубакъасса полк­рал» акция гьашину цалчинни МахIачкъалалив хьусса, му маршрай 25 азара инсан гьур­тту хьуссар тIий баян бунни прессалул. Маршрай гьуртту хьунни Республикалул БакIчи Рамазан АьбдуллатIипов, дагъусттаннал парламентрал спикер Хизри Шихсаидов, премьер-министр Аьбдуссамад ХIамидов, министерствардай ва цаймигу идарарттай каялувшиву дуллалими. Республикалул хъуншагьрулул майданния байбивхьуну, Родопский бульварданийсса парк­равун бияннин лавгунни маршрай гьуртту хьуми. «ДакI ххарину дур акциялуву гьуртту хьун вайксса чIявусса агьлу майданнийн буккаврия, 15 азара инсан ухьунссар ва маршрай. Пахрулул асар ххибуллай бур дакIниву рес­публикалул хъунимигу ва акциялуву гьуртту хьуну тIий, жу бу­ссияв ца 5-6 азара инсан гьуртту хьунссар тIий, укун халкьуннал мугьали ккаккайхту пахрулул дурцIуна дакIру, — тIий ур Рес­публикалул жагьилтурал ишир­тталсса буллалисса министр Арсен ХIажиев. – Ттул карунниву дуссия Совет Союзрал Виричу, истребительтурал полкрал командир, летчик Валентин Эмировлул сурат, Вирттаврал ва гъан-маччанал, фронтовиктурал суратирттащал майданнив бувксса агьалинал ккаккан бунни цивппа дусшиврул бувгьусса билаятрал агьлу бушиву».
«На чIава «ахIмадха­нов­цы­­нал» кьюкьлуву Ваччавсса парадрайгу гьуртту хьура, лавайсса даражалий ларгунни Ккуллал райондалий­сса байрангу. МахIачкъалалив «ахIмадхановцынащал» жу гьур­тту хьуру Совет Союзрал КIийла Виричу АхIмад-Хан Султаннул гьайкалданучIасса батIаврий, миккусса байран кIюрххил ссят 6-нний дайдирхьуна. Муния махъ МахIачкъалаллал хъунмайданнив бувкру, маршрай гьуртту хьун. ОьрчIру гъирарай хIала бувхсса чIалай, жулва бучIантIимур вихшала дишин буллалисса бур тIисса пикрирду хIасул хъанай бия ттул бакIраву. Укунма тIий бия лагма-ялттумигу. Цуксса бюхттулнугу ва Ххувшаврил байрандалул кьимат, къабагьаннав ххишала цамур Ххувшаврил парадру ва маршру дуллан, дяъвилул ттупал чIурду пахъ багьаннав щаллара дунияллий», — тIий бия фронтовикнал арснал душ, Дагъусттаннал Жагьилтурал иширтталсса буллалисса министерствалий зузисса, Цалчинмур ЦIувкIратусса Кьурбанова Лаура.