Бюхттулсса Ххувшаврил хьунийн жулла республикалий шай чIярусса мероприятияртту, дяъвилул ва захIматрал ветерантуращалсса хьунабакьавуртту. Дагъусттаннал Жагьилтурал министерствагу ми иширттая ятну бакъая. Ххувшаву ларсун 71 шин хъанахъисса шадлугърал гьантрай Дагъусттаннал жагьилтурал иширттал министр Арсен ХIажиев хьунаавкьунни Буттал КIанттул цIанийсса Хъунмасса дяъвилул ветерантуращал.

Бадрижамал Аьлиева
Дагпатриотцентрданул директор ХIамзат Муслимовлущал архIал, жагьилтурал министр хьунаавкьунни 10 ветераннащал ва дуллунни миннан ххувшаврил байран барча дуллалисса открыткар­тту ва премияртту.
— Жулва билаятрал халкьуннал цашиву, цачIуншаву, ларай­сса патриотизм, аьралитурал ва захIматрал фронтрай зузиминнал лахIан буван къашайсса гуж, дакIурдил кьянкьашиву хьуссар Ххувшаврил бакIщаращину, ми циняв лишаннал щаллу дур­ссар билаятрал тархъаншиву ва му тIутIайх бичаву. Дяъвилия­сса аьпа жувува гьарцаннаву бу­ссар. Ххув хьуминнал ник талай диркIсса тархъаншиву, Ватандалухсса ччаву, тIайлашиву ххирашиврул, миннул багьа бакъашиврул жува хIакьинугу цачIун буллай буру, — тIий чивчуну бур Дагъус­ттан Республикалул БакIчи Рамазан АьбдуллатIиповлул къулбасралу­сса открыткалий.
Ветерантурал бавтIминнащал кIидарчIунни дяъвилиясса цалла дакIнийнбичавуртту. Ветеран Сяид ХIусайнаевлул каманчалухун щаллу бунни балай «Катюша».
— Жу зул хьхьичI ник ришлашиссару. Ххувшаврил хъунна­сса агьамшиву дуссар жулва билаятран. ХIакьинурив лапва чансса ливчIун бур лажи-лажиндарайн барчаллагь учинсса вирттал. Да­гъусттан Республикалул БакIчи Рамазан АьбдуллатIиповлул тапшур баврийн бувну, жу жулва ветерантурал ялун бивру, миннахь барчаллагьрал махъру учиншиврул, — увкунни Арсен ХIажиевлул.