Вай интнил гьантрай, тачIав бакъачIин, жунма дакIнийнгу багьай буттал буттахъая шихунмай нанисса жулва бигьа бакъасса тарих-таварих, хьхьичIгу бацIан бувару шаэртурал шеърирдаву чивчусса ххуттардиха лавхьхьусса хъу дугьаврицIун бавхIусса пикри-зикрирду.
Загьрани Аьбдуллаева
Гьарца шинах кунма, жулва Лакку билаятрай циняв шяраваллал буллай бур ххаллилсса мажлисру, тяхъашивуртту хъув буклакисса байраннан хасну. Ва аьдатгу, хъиннура ягин хьурча дакъа, лагь-мак хъанай дакъар. Пу-пу, машаллагь, хъуругу бювхъу лачIал палцIа тIуннавча чIал къархьуну, къурдугу нувщи-къурул, пархтIутIал кьункьал ларсун нанисса кьинирду дучIаннавча ччясса мутталий.
Ца мукунсса байран кьини хьунадаркьунни ГьунчIукьатIрал шяравугу мартрал 26-мур кьини. Вайнналлив, цаннаяр ца хьхьичIун ххяхлай, кьуругу щяв багьан къабивтун ласлай, хъиннура сийлий хьунадакьайссар Хъурдуккаврил байран, хьамаран нанисса дукьрахIангу дурну, хъуни-хъунисса ккунуккирттал бувцIу ххункIругу бувну, ми лялиян бан спортрал жура-журасса тIуркIурдал тяхъашивурттугу сакин дурну. Ва ххуллух хъув уклакисса хъузала ия 
ГьунчIукьатIрал колхозраву оьрмулухун зий-занай ивкIсса, колхозрал машиналул рулданух жагьил замана гьан бувсса Дивиннахъал Дандамаев Аьбдулманаплул ва Жумяълул арс ХIамид. Шиккува кIицI къабувну къабучIир Жумяъ, ГьунчIукьатIув хъунма хьусса, даргиял миллатраясса душ бушиву. ГьунчIукьатIиричу Аьбдулманаплущал яхъанай, бавкьусса, нахIу-хIалимсса кулпатну ххюцIаллахъул шинну хьушиву. Ва байран лахъа-хъун дан бувкIун бия даргиял шяраваллаватугу вайннал уссурссу, гъан-маччами. ХIамидлул лагма-лавгун бия къутанная, шагьрурдая бувкIсса уссу-ссурвал, вайннал гъан-маччами, щарнил ляхъин – вихьул (ва вихьуллал куяври, ванал хъаралу буссар ххаллилсса вихьли душ Лида, учительницану зун ГьунчIукьатIув бувкIун, ХIамидлул эшкьи-ччаву дурсса), шяраваллил ххаллилсса жямат, дустал-гьалмахтал, ХIамид цувагу дусшиву дангу, дуруччингу кIулсса жагьил ухьувкун.
КIюрххил хъузалал ккунуккирттал ххунчIайнгу бисмиллагь бувну, дукьрахIанттил кьурттигу хIавчIун, бавчуна, буттахъал аьдатрай дуаьрттугу дуллай, Карашрал гаражрал ялтту чулийсса ГьунчIукьатIрал хъуруннайн кIапIа-кIапIаллу агьалинал. Га кIану цуппава мукунсса дялахърулун къулайсса кIану бур. Аьдат хъиннура дюхъан дан, бавчуна щинал цистернагу хъирив. Гьармудан гьунчIукьатIрал чайри щайсса хъарас. Ва ххуллухгу бия чугу, ттуккугу чIюлу бувну. Хъузалал аьрщаравун бивчусса гьаннарал ччяни кIурх бучIан, хъузала атил уллай булувкьуна хIаз ласлай. Хъузалащал хъарасрал кIамайму бугьлай, ла-яла аьрщаравун хъарас кьутIин дуллай, интнил ссихI-аьрщарал кьанкь ппив дуллай бия гьаваллавух биялсса жагьи-жугьулт. Биялсса захIматгу бивхьуну, цанна га дялахъру дан кумаграл яла хъунмур хъар цийнна ларсъсса чугу бигьалаган итабавкьуну, ка духхалларан хъалул чантайгу буллуну, гихунмай байбивхьуна спортрал тIуркIурду: дучри ххяххан бавуртту, арамтал ва хъами, оьрчIру ва душру бястлий лечин бавуртту, пут, чару личавуртту. Дучраву цалчинмур кIану бувгьуна хъузалал арснал Ярагъинал, цала буттауссил чу ххяххан бувну. Бахшишру дуллуна гьарцагу гьуртту хьунан дакIний личIансса, ххари бувансса. Дия дурну нахIура-нахIусса бартри – интнил лишанну, бакъухъру, ини. Кьинигу дия гьава бавкьусса, бургъил тIинтту дия гьарнал дакIру гъили дуллай, бучIантIимунийн умуд бишин буллай.
Ахттакьунмай дукрардал гъагъавайсса столлахун бавтIуна Хъунил хъатIуйн бувкIсса хъамал, жямат. Тямадашивуртту дуллай бия Сайпуллаев Шамхал ва ХIажиев Тажуттин.
Мажлис бачIи хьувкун, цайвасса буржгу лавхъун, Дандамаев ХIамидлул хъирив кьуру байли буллуна, тапшур бувна ялунчIил хъув уккансса хъузалайн Чавтараев Айгуннуйн. Барачатну лавсъсса кьуру хьуннав. ЦIуллушиву дулуннав, бюхълай личIаннав, дакIнин ччимур щаллу бан, Айгун ва Жулианай!
Махъру лахълай, балайрду тIий, ссувхIат буллай, тяхъашивуртту лахъи ларгуна хьхьу дачIи хьуннин. Хъирив кьини, «бакIругу хъин бувну», духурцIигу дуркуну, чан-чанну тIий хъамал ппив хъанан бивкIуна. Цалва-цалва ххуллурдайн багьуна итни кьини давурттайн зана хьуншиврул.
Гъар-гъарагъи даркьусса, авадансса, дюрхъусса шин хьуннав. Дангу, дукангу цIуллушиву дулуннав. Зунна дитангу, чин дулунгу бюхълай личIаннав. Дурцири дуаьртту Заннал кьамул даннав. Дуниялгу паракьатну, кьисматгу гьарза бувну, цIуллу-цIакьну яхъанан цумацаннахьхьунгу Заннал тавпикь дулуннав!
Амин я Аллагь!
