Февральданул 18-нний МахIачкъалаллал бакIчи Муса Мусаевлул «город Махачкала» округрал цалчинмур созыврал депутатътурал хьхьичI, шагьрулул каялувшиннарал гьар шинах бувайсса, 2015 шинал дурсса давурттал хIасиллу дуллалисса гьарта-гьарзасса ихтилат бувунни. БатIаврий гьуртту хьунни хъуншагьрулул муниципал идарарттал, жяматийсса сакиншиннардал вакилтал, МахIачкъала шагьрулул Мажлисрал депутатътал ва шагьрулул цаппара халкь. БатIаву дачин дурну ия Шагьрулул депутатътурал мажлисрал председатель Абулмуслим Муртазалиев.

Цалва ихтилат байбихьлай, Муса Мусаевлул чIурчIав дурунни, гьашину цIубакIрайра шагьрулий дуван ххалдиргьуну диркIсса чIяруми давуртту дуллай сукку хьуну бушиврий. КIицI лавгунни, халкьуннан дигьалагру хьун, кIичIиртту гьарта буллай, халкь щябикIан, бигьалагансса скверду, паркру буллай байбивхьуну бушиву, социал инфраструктура цIудуллай ва халкь яхъанансса къатрал строительстварттал ялувбацIаву гужлан дуршиву.
Муса Мусаевлул бусаврийну, ларгмур шинал МахIачкъалалив дуркIсса, дарххусса хъуслих халкьуннан мюнпатран аьмну дуркIун дур 31, 4 млрд. арцул, шяраваллил хозяйствалул продукция дарххуну дур 978,3 млн. арцул. Халкь яхъанансса ва идарартту тIиртIусса къатри дурну дур 940,5 азарда кв. метрардай. Шагьрулий 1760 инсан зунсса давурттив хьуну дур ва дянивну халкьуннал ласайсса харж 26 025 къуруш бусса бур.
БакIчинал хIасиллу дурсса ихтилатрайну 2015 шин шагьрулун хьуну дур инвестициярду дучIан дуваврил чулуха буллугъсса. Шикку ванал чIурчIав дурунни, вания гихуннай шагьрулий инвестициярдал площадкарду щурущи бувансса аьрщив личIи дувавриха зунтIишиву ва ми площадкардал каталогру дувансса экспертътурал группа батIинтIишиву.
Муса Мусаевлул бувсунни, 2016 шинал шагьрулий дуван­сса давурттаву хъунмур къулагъас дувантIишиву чIиримур ва дянивмур ишбажаранчишиву лядуккан дуваврих ва даву дуван ххалдиргьусса программалун 5 млн. арцул ккаккан бувну бушиву. Ванал бусаврийну, ларгмур шинал налогру датIайсса шагьрулул къуллугърал сияхIрайн лавсун бур ттинин чувкIуй сияхIирттавух къабивкIсса ишбажаранчитал ва аьмну налогру датIаврил даврил даража шагьрулий лахъ хьуну бур.
Бакьин буллай бусса бур Лениннул цIанийсса «Детский мир» ттучандалучIасса ва Апанни Къапиевлул гьайкал дусса кIанайсса ххуллуцIсса кIанттурду ва «Дом быталул» чIалачIин.
Мукунна «Гипрогор» тIисса Москавуллал градостроительствалул институтращал архIал МахIачкъалаллансса генплан хIадур дуллай бусса бур.
Муса Мусаевлул бувсунни гьашину шагьрулул кIичIирттаву циксса мурхьру, къатIри бугьан­тIиссарив, халкь бигьалагай паркирдаву цуку-цукунсса давурттив дувантIиссарив, шагьрулул цуми кIичIиртту бакьин бувантIиссарив ва ссут-кIи дучIаннин чув ци даххана дурну, цIудантIиссарив. БакIчинал бувсунни мукунма жяматий­сса транспорт занази даврил хIакъираву ва гьашину цуку-цукунсса цIусса маршрутру тIитIинтIиссарив ва халкьуннан циксса автобусру бучIан бувссарив ва ттигу циксса спецтехника машан ласунтIиссарив.
Цалва ихтилатраву Муса Мусаевлул бувсунни, шагьрулул социал идарарттал, кIулшивуртту дулаврил идарарттал тагьардаягу. МахIачкъалаллал школардаву ЕГЭ ва ГИА цукунчIавсса дайшишру ва диялдакъашивур­тту къархьуну дулуншиврул цал дувантIисса гьурттушиннарая ва шагьрулий детсадирттал масъала цукун дузал буллай, ци даражалий буссарив.
Хъуншагьрулул бакIчинал кIицI лавгунни, шагьрулул администрациялий хъуннасса къулагъас дуллай бушиврий халкьунная бувкIсса аьрзирдах, миннал мурадирттах. Ва чIурчIав дурунни халкьуннал цIаний шагьрулий дуллалисса ххуй-ххуйсса давурттавух вайнналгу гьурттушинна дикIан аьркиншиврий, жунма жулва шагьру ххирану, бусравну бикIан аьркиншиврий.