БухкIуллийх ша ласайхту, чIявумур чIумал инсан хьунаакьай га къатлуву яхъанахъисса хъамитайпалул. Га хъамитайпалул цукунсса иш-тагьарданийсса гъилишиву сакин дурну дурив ужагърай ялун увхманал янингу, дакIнингу хIисав къархьуну къаличIай. Ккуллал райондалий Ваччиял шяраву яхъанай бур Хъун дяъвилул гьурттучи, аьпа бивул, Муслимов Юнуслул щащар Муслимова Нурижат.
ХIажимурад ХIусайнов
Бухьунссар цаймигу хъами, Нурижат кунма, щащарну ливчIсса. Амма Нурижатлул вайннаятусса личIишиву ци дур учирча, ва бур цила лас Юнус тачIав дакIния уккан къаитлай, гьарца байраннал кьинирдай цила ужагърайн хъамал буцлай, гай хъамалу буллалисса адаминал хасиятрал хъамитайпа. На нава цимилагу хьуссара ванил гъилишиврул бувцIусса ужагърай. ХIатта Нурижат Юнуслул кIилчинмур кулпатну бивкIхьурчагу (цалчинмур ахиратравун лавгун махъ бувцусса), ванил Юнуслул ххуй-хъиншиврия бусласаврил ахир-зума къадикIай. Явара вайннан Аллагьнал оьрчI-душгу къабуллуну бур.
Цалчин Нурижатлул ужагърайн увхния махъ ттул 3 шин бартлагавай дур. Инсаннал дакIнил дуниял кIул хьуншиврул, гьай-гьай, чIярусса шинну аьркинну дикIай. Амма ца-ца чIумал гьа шай бухкIуллийх ша ласавугу. 2013-ку шинал Ккуллал райондалул жяматрал Ххувшаврил кьини хьунадаркьуна Ккулув, Ккуллал шярава дяъвилийн лавгун зана къавхьусса чиваркIуннан хас дурсса гьайкалданул хьхьичI. Га кьини Ккуллал райондалул администрациялул культуралул отделданул бакIчи Раджабов МухIуттиннул: «Ина хIакьину, шиккусса тяхъашивуртту къуртал шайхту, жущал Ваччав наниссара аьралий гьурттучи Муслимов Юнуслул, Нурижат тIисса щащарничIан», — куна. Га кьини Нурижатлул ужагърай культуралул зузалтрал хъинну ххуйсса концерт ккаккан дуруна Хъун-дяъвилул хIаписарнал щащарнин. БувчIлай бия хъамаллураясса ххаришиврул симандалува пиш арх къабуллалисса Нурижатлул дакIнийхтуну ядуллалишиву Юнуслул аьпалул хьусса цIа.
Юнус увну ивкIун ур Ваччиял шяраву 1922-ку шинал. ЧIяйннал шяравусса школалий 10 класс бувккуну бивкIун бур ванал 1941-ку шинал. Гания махъ цува кунасса оьрчIащал къанавртту дуклан увцуну ивкIун ур. Яла махъ, 1942-ку шинал Сухуми шагьрулийсса аьралий бахьттагьалтрал училищалувун кьамул увну, ваная хIаписар хьуну ур. Талай ивкIун ур Къапкъазуллал зунттавусса ва цаймигу дяъвирдал ххуттай. Зана хьуну ур шавайн1948-ку шинал хъазамгу орденнал ва медаллал бувцIуну. Гания махъ дуклан увххун, 1954-ку шинал къуртал бувну бур Дагъусттаннал шяраваллил институтрал гъаттара-яттил хIакин шайсса факультет. Зий ивкIун ур Ккуллал райондалул ветуправлениялул хъунама хIакинну ва цаймигу къуллугъирттай. Дурккун дур ванан чIярусса бахшишру ва дуллуну дур «Дагъусттаннал лайкь хьусса ветеринар» тIисса цIагу.
Гьашину Юсуп жула дянив акъа хъанай дур 12 шин. Муниннин Юсуп цIуцIи шанийн агьну хьуну диркIун дур 7 шин. Вай шиннардил лахъишиврий Нурижат, захIматри, кIури къакуну, ласналссагу, ужагъралссагу буллай бивкIун бур.
Юнуслул душру, вайннал оьрчIру бувкIнигу ххаллилну, ххарину кьамул бай Нурижатлул. Ласнал суратругу чIирттайн лархъун, къатта-къуш язину ябувавриву дур Нурижатлул ца яла ххуймур хасиятрал тIиму. Рязину бикIай Нурижат цила ссурахъия Кьадиаьлиев Альбертлуягу, ялун учIай, цищава къашайсса къатта-къушливусса кушурду бувай тIий. Жувагу чIа учинну Нурижатлун мукьахуннайгу цIуллушиву, ласнал Юнуслул аьпа ябаврищал, хъамаллурал хьхьичI муданнагу нуз тIитIлансса дакIнил лахъисса мутта.
