Та ДучIив гьайсса ххуллул лув дуссиятIар хъинну ххуйсса урттугу шайсса чIирисса неххамачIувсса гьан ва гания арх дакъа гьарахъалу. Га гьарахъсса гьарайзунал душних эшкьи хьуну ивкIун ур хIухчу.
Гьарца баргъ кIири бувсса чIумал цала яттугу бувцуну га гьарахъалттил чIарав муруллул лув ххютулу игьалаглай икIайсса ивкIун ур. Ганан хъинну щютIуххи бищун кIулну бивкIун бур. Га щютIуххигу бишлай, яттугу бигьалаглай, баргъ ялавай хьуннин икIайсса ивкIун ур. Баргъ бахьлаглан бикIайхту ялагу ххяллайх, хъачIайх ятту бакьайсса бивкIун бур. ЧIявуну гьарайзунал душгу ахттайн чIумал, хIухчу игьалаглай, щютIуххи бишлашисса чIумал цила буттан за ларсун бучIайсса бивкIун бур. Му чIумал гай цаннан цагу ккаккайсса бивкIун бур. Миннал икьрал диркIун дур ссуттил, хъу вирдай ларкьусса чIумал, нитти-буттангу цала эшкьи кIул дурну, хъатIи бан. Цанма ххирасса душнин цIа куну, АьвдурахIманнул ца макьан ляхъан дурну дур.
Цал гьарайзу цахъи тIааьн акъа уну, цала ца бакъа бакъасса душгу гьарахъ кьабивтун, шавай лавгун ур. Душ цуппалу бушиву кIул шайхту, хIухчу яттугу кьанив бучIан бувну, гьарахъун лавгун ур. Цанма ччисса душ ххал шайхту, гьарца зат хъама риртун, га ганихь дакIнийсса буслай ивкIун ур. Ганан нанисса чIунгу, кьабивтсса яттугу дакIния бувккун бур. Му ппурттуву тIурча, дуниял оьккину дарщуну дур, къув-аьс тIун диркIун дур ва гужсса гъарал ларчIун дур. Яттугу гъарая лякIлай, гьарахъалттичIан гъанну, муруллуцIун лявкIуну бивкIун бур. Дуниял хъинну аьратталну диркIун дур. Гужну цIупар тIун, къув тIун диркIун дур. Му ишираву цакуну ссаллив гьаз бувсса кунма сукку бувну, щалва мурлу левкьун лавгун бур. Гьарахъалттил ва яттил ялун багьну бур…
Гъумуксса инсантал БурхIайн бувккун ялугьлай бивкIун бур бивзун нанисса луххал ттугълих, бяр хьусса неххах.
Циняв бивкIун бур банмур, битанмур бакъа, гьарахъ инсантал ливтIухьунссар, гиву цу ливчIривав тIий. Му ппурттуву гьарайзу увкIун, вев-шев тIун ивкIун ур цала душ муруллул лув ливчIунни тIий, хIухчил нинугу аьтIий диркIун дур арснал канаки буллалисса ятту чIалай бакъар, муруллул лув арсвагу къаливчIривав тIий.
Гьунттихавай ца дарусса, ца эмаратсса кьини диркIун дур. Багьсса муруллух бурган бувкIсса инсантуран ххяллул лувату щютIуххул чIу баллан бивкIун бур. Га бивкIун бур хIухчил бишлашисса щютIуххул чIу. Халкь бавтIун, аьрщи дихлан бивкIун бур. Амма цавай бивкIун бур шичча гъанну баллай бур, шичча дихханну, цавайгу шичча гъанни тIий, бакъавкьуну дихлай. 40 хьхьуну щютIуххул чIу чан къавхьуну бур аьрщарал лувату. 41-ку кьини чIу-чIитI къабивкIун бур. Гай 40 гьантлий гиккун заназисса халкьуннан макьан хъинну ххуй дирзун, лархьхьуну дур. Ганийн цIана «Гьарайзунал душ» учайссар.
