Февральданул 29-нний Дагъусттаннал БакIчи Рамазан АьбдуллатIипов хIала-гьурттусса Аьрасатнал делегация хьунабавкьунни Ираннал Исламрал Республикалул Шяраваллил хозяйствалул жихIадрал министр МахIаммад Ходжатищал. Аьра­сатнал делегациялул бакIчину ия АьФ-лул Шяраваллил хозяйствалул министрнал хъиривчу Сергей Левин.

Хьунабакьаву дайдихьлай, господин Ходжатил дакI аьчухну аьла-ссалам бунни Аьрасатнал делегациялущал ва Ираннал аьрщарайнсса аьрххи-ххуллу тIайлабацIусса шаву чIа кунни. Ганал умуд бивхьунни Аьрасатнал делегациялул аьрххилул хIасиллу хъинчулийсса хьуншиврий Аьрасатнал ва Ираннал дянивсса арарду цIакь давриву.
«Махъсса ппурттуву тамансса лябукку хъанай бур жулла арардал личIи-личIисса бутIраву, миннувух политикалуву, экономикалуву ва цаймигу бутIраву. Муния буслай бур жулла паччахIлугъирттал дянивсса дахху-ласулул ишир­ттал. Ттинияр тихунмайгу бачин аьркинссар мува ххуллийх лябу­кку буллай, мунил ахиргу хайрданийн дуккантIиссар», — увкунни МахIаммад Ходжатил.
Сергей Левиннул барчаллагь увкунни Ходжатихь ненттабакI тIивтIуну кьамул баврихлу. Ганал бувсунни ва ххуллух хьунабакьин най бушиву международный правкомиссиялул Ираннал бутIул каялувчи господин Вейзищал, Торгово-промышленная палаталул каялувчитуращал ва Ираннал хъунисса деловой организациярдал ва ассоциациярттал каялувчитуращал.
«Ва хьунабакьаврий жул умуд бур ххалбигьин Ираннал ахъулсса ва ахънилсса Аьрасатнавун дучIан дуллалаврил ва Аьрасатнал къама ва дикIул продукция Ираннавун дучIан дуллалаврил масъалартту. Жул яла хъунмур мурад бур Ираннал шяраваллил хозяйствалул продукциялун «щюллисса коридорду» дузал даву таможнилул ва фитосанитарный къуллугъирттай. Мукун­сса коридорду щаллу даврийну цимиллагу чан хьунтIиссар Ираннал продукция Аьрасатнал рынокрайн дучIаврил чIун», — увкунни Аьрасатнал министрнал хъиривчунал. Ганал мукунма бувсунни Аьрасатнал чулухаллил ккаккан бувну бушиву Ираннавасса хъус духхайсса хьхьирил портру, ми бур МахIачкъалаллал ва Аьшттарханнал портру, микку кьамул дуллантIиссар Ираннаву Аьра­сатнавун дучIан дуллалисса продукция. Ираннал продукция Аьрасатнавун хъунмурчIин Дагъусттаннайхчил дачинтIиссар», — увкунни Сергей Левиннул.
Яла махъ буллунни Дагъусттан­нал БакIчи Рамазан Аьб­дуллатIи­повлухьхьун. Ганал бувсунни акьлай ушиву Сергей Левиннул увку­сса предложениярттацIун.
«Аьрасат ва Иран тарихраву куннащал ку хIала-гьурттуну зий буссар. Дагъусттаннал хъуннасса дахIаву дуссар Ираннащал. Утти­гъанну жу дарду Дарбантуллан 2000 шин шаврил шадлугъру, та чIумалгу жу кIицI лагарду Дарбантуллал гьану бизавриву Ираннал, Парснал бугьлагьисса кIанттурду», — увкунни Рамазан АьбдуллатIиповлул.
Ганалва мукъурттийн бувну, Ираннал продукциялун «щюлли­сса коридорду» щаллу даву – му хъинну ххуйсса сиптар, Дагъус­ттаннал муницIун кабакьлакьиссар ва хIадурссар цилвамур захIматрал бутIагу бишин му проект щаллу давриву.
Рамазан АьбдуллатIиповлул бувсунни мукунма апрельданий ягу майрай Дагъусттаннал делегация гьан тIий бушиву Ираннал Мазандаран провинциялийн мунищал хIала-гьурттуну зунсса дахIавуртту щаллу дуван.
Аьрасатнал делегациялувух гьуртту хьуссар мукунма дагъус­ттаннал министртал – шяраваллил хозяйствалул ва бакIлахъиялул Мусаэфенди Велимурадов ва промышленностьрал ва машлулсса Юсуп Умавов.