«Селекшинал оор вариорс» тIисса промоуторшиврул компаниялул гендиректор, хIала-ккаласса данди буккавурттал (смешанные боевые искусства) Ухссавнил Ккавкказуллал федерал округрал федерациялул президент Аьбдулкерим Айгуновлул махъсса ппурттуву, сакингу дурну, дузрайнгу дуккан дуллай ур уттинин чувчIав дакъасса цалла проект «Большая встреча» («Хъуннасса хьунабакьаву»).
ХIасан Аьдилов
Проектраву гьурттуну бур олимпий чемпион Ширвани Мурадов, ИFС-лул дандиукку Ислам МахIачев (Бурши), Шяраваллил хозяйствалул управлениялул хъунама Эмил Ттаттаев (Хъусращи).
Циняв мероприятиярттай гьуртту шайссар мукунма МахIачкъалаллал администрациялул спортрал, туризмалул ва жагьилтурал иширттал комитетрал председатель Марат Ибрагьимов, жагьилтурал политикалул министр Арсен ХIажиев, ММА-рал дандиукку, дунияллул чемпион Марат Гъапуров, М-1 журалул дандиукку, дунияллул чемпион Рамазан Элиев, М-1 журалул дандиукку, дунияллул чемпион Марат МахIаммадов, Тай боксрал дунияллул чемпион, «Тай боксрал король» Мирза МахIаммадов, ушу-сандалул 5-ла дунияллул чемпион Муслим СалихIов.
Аьбдулкерим Айгуновлул бувсъсса куццуй, цIадурксса спортсментурал хьунабакьаву хьуну дур Лакрал райондалий Гъумучиял жагьилтуращал, МахIачкъалаллал 51-мур школалул дуклаки оьрчIащал, яла – 1-мур МахIачкъалалийсса школа-интернатрал оьрчIащал, Правалул академиялул студентътуращал, Дагъусттаннал Педуниверситетрал студентътуращал, Автодорожный колледжрал, Политехнический колледжрал, Автодорожный университетрал студентътуращал. Утти хьунабакьлан тIий бур цаймигу вузирдал студентътуращал, районнал ва шагьрурдал жагьилтуращал.
Ми хьунабакьавуртту дуллалисса чIумал чIарав бацIайссар МахIачкъалаллал Кировлул цIанийсса райондалул бакIчи СалихI Сагидов, Правовой академиялул декан Амирхан Амирханов.
Дуллалисса циняв давурттаву, хъиндайдихьурттаву кумаг байссар Аьрасатнал УФСИН-далул ДР-лийсса управлениялул хъунама, генерал- майор Муслим Даххаевлул.
Хьунабакьавурттал хъунмур мурад хъанахъиссар жагьилсса ник тIайласса ххуллийх дачин даву. Дунияллийх цIа дурксса спортсментурал жагьилтурахь бусайссар цукун лахъан аьркинссарив захIматшивуртту, спортрахун багьан аьркиншиву, къаххуйсса тIуллая архну бацIан аьркиншиву, аьдлу-низам дуручлан аьркиншиву, адав-имандалий яхъанан аьркиншиву. ЦIа дурксса дагъусттанлувтурал бувсунни спортраву цалла хьхьичIуннайшивуртту цукун дурссарив, циксса захIматшивуртту миннал хьхьичI дарцIуссарив ва ми лахъаншиврул цукунсса хIарачатру бувну бивкIссарив.
Гъумучиял шяраваллил жагьилтуращал хьунабавкьуну махъ Эмил Ттаттаевлул оьрчIан пишкаш дунни боксернал катIри. Республикалий му проект хъинчулий ккарккунни. Муния буслай бия Дагъусттаннал телеканаллавухгу.
