МахIачкъалалив «Националь» ресторандалуву вай гьант­рай хьунни, къаофициалсса тагьардануву, республикалул чIиримур ва дянивмур ишбажаранчишиврул аралуву маэшат буллалиминнал ва хIукуматрал къуллугъирттал вакилтуращал­сса хьунабакьаву.

Залму АьбдурахIманова
Ва хьунабакьаву сакин дурну дия Стратегиялул инициативардал агентствалул каялувшиврулу. Ва батIаврил мурадгу бия республикалул ишбажаранчитал ва ДР-лул Предпринимательствалул ва инвестициярдал Агентство, ДР-лул ишбажаранчитурал ихтиярду дуру­ччай Уполномоченный ца кIанайн бавтIун, цаннах ца вичIидирхьуну, гихунмай цачIу зунсса шартIру ххал дигьаву.
БатIаву сакин дурсса Ухссавнил Ккавкказуллал федерал округрайсса АСИ-рал (Агентство стратегических инициатив) каялувчи ур жула лакку оьрчI Анвар ХIажиев, цувагу Аьрасатнал Конституциялул судрал судья, жуна чIявучин кIулсса ва хIурматлувсса ХIадис ХIажиевлул арс.
Журналистътуращал хьусса хъун бакъасса ихтилатраву Анвар ХIажиевлул бувсунни, цалла-цалла захIматшивурттая ва масъаларттая бусан бюхъантIисса укунсса журалул батIаву дуван дакIнийн багьшиву ларгмур шинал «Опора России», «Деловая Россия» ва цаймигу жяматийсса сакиншиннарду дартIсса ца батIаврий.
«Ва батIаву жун дуван дакIнийн багьуна, хIукуматрал даражалий бакъача, укун къаофициалсса тагьардануву. Ттинин я Дагъус­ттаннай, я СКФО-рал вайми регионнай дурассар укунсса журалул батIаву дуван. Шикку респуб­ликалул ишбажаранчитуращал бюхъантIиссар цалла ихтиярдал ялув бавцIусса Агентствалул вакилнахь ва хIукуматрал вайми-ваймигу структурардал къуллугъчитурахь цанна хьунадакьлакьи­сса захIматшивурттая, цивппа авара буллалисса масъаларттая бусан, цалва идеярду иширттайн кIура баен буван бюхъантIисса чаранну ля­къин, хIукуматрал чулуха цахра дуван багьлагьисса къулагъас щуркIал хьун. ХIукуматрал къуллугъчитурал тIурча, вайннал тIимургу бавну, гихунмай ци бан бюхълай бурив кка­ккан, — бувсунни ванал.
Анвар ХIажиевлул мукунма кIицI лавгунни, батIавуртту сакин дувантIишиву республикалул вайми шагьрурдайгу.
Хъирив ДР-лул Ишбажаран­чишиврул ва инвестициярдал агентствалул каялувчи Башир Ма­хIаммадовлул, батIаву дайдихьлай, бувсунни, республикалул ишбажаранчитуран хьунадакьлакьи­сса захIматшивурттая, хъинну кьянкьасса тIалавшиннардая ва ми сававну коррупциялул ххяппурттавун багьлагьишиву ми. ЧIурчIав дурунни, укунсса батIавурттая махъ ишбажаранчитуран ва аралуву ссихI бигьин ва цалла дуллалимуниву ялу-ялун бигьа хъанантIишиву.
«Республикалул ишбажаранчитурал дяниву дурсса жул цIухху-бусаврия махъ аьч хьунни агьаммур масъала бушиву харжлугърал гьану (финансовая база) бакъашиву. Жу хъирив лавну, цаппара давуртту дурну махъ, масъаларттал сияхIраву цалчинмур кIанай бивкIсса ва ма­съала 18-мур кIанай бур цIана», — бувсунни ванал.
Ванал махъ буллунни ишбажаранчитурахьхьун вания гихунмайгу цащава бан шайсса хIарачат буллан республикалий ишбажаранчишиву тIутIайх дичин даву мурадрай.
Цащава бан шайсса кумаг буллантIишиву шикку мукунма кIицI лавгунни, уттигъанну ва къуллугърай ивтсса, ДР-лул Ишбажаранчитурал ихтиярду дуруччай агентствалул каялувчи Заур Кьурбановлулгу ва умуд бивхьунни ва давриву чялишсса гьурттушиву даншиврийн республикалул циняв ишбажаранчитуралгу.
Хьунабакьаврийн бувкIсса ишбажаранчитуралгу бувсунни цанна хьунадакьайсса захIматшивурттая. Къатри дуллалавриха зузисса ишбажаранчитурал кIицI лавгунни, къатри дурну ягу дан сукку хьувкун, цан хьунабакьайсса яла хьхьичI ххуттаймур масъала къатри коммуникациярдал дузал дуван багьлагьимур масъала бушиву. Къатри дан ихтияр дуллунугу дуна, мивун коммуникациялул система дуцин захIматшивуртту хIасул дуваву цан дурчIлай дакъар, тIий бия вай.
Ттинин укунсса батIаву АСИ-рал сакиншиннаралу хьуну дур Ставрополлал крайрайгу.