ЧIявучин къакIулсса, ЦIуссачIурттащатусса Мудуева Зулайхат Къаравалил душнил творчество, лакку мазрай цилагу чичлай, цайминналссагу батIлай, луттирду итабакьлакьисса составитель хIисаврай, жунна цинявннан кIул хьун аьркинссар.
Оьрмулул ххуллия кутIану: Бувну бур Зулайхат 1961 шинал ЦIуссалакрал райондалий, ЦIуссачIурттащиял шяраву цалва щалва оьрму «Жданово» колхозрал гъаттарал фермалий хIухчушиву дуллай гьан бувсса захIматчи Мудуев Къараваллил ва кIара фермалий хъунмасса хIаллай дояркашиву дурсса Кяъваханнул, арулва оьрчI хъунма бувну, чивун буккан бувсса захIматчитурал кулпатраву.
ЦIуссачIурттащиял дянивмур даражалул школданий дугу дуклай, захIматрал кьадру кIулсса, личIлулсса душ Зулайхат нитти-буттал буллалисса захIмат ххира хьуну, нитти-буттан кумаг буллай, чIарах бацIлай фермалий, оьрчIавугу хъунмур бухьувкун, щала къатлул хъаргу цийнна ларсун хъунма хъанай бивкIун бур. Ванияр мюрщими уссурваврал ва ссурваврал Зулайхатлул увкумур буллай, бавкьусса кулпатну яхъанай бивкIун бур.
Оьрмулул инсан личIи-личIисса ххуллурдайх уцай. Зулайхатлунгу нясив хьуну бур, Аьрасатнавун лавгун, Липецкаллал областьрайсса ца хъунмасса гъаттарал комплексрай захIмат буллан. Тиккува кьисмат хьуну дунияллул хьуну бур. Увну ур ца ккаккан ххуйсса, канил пишагу бусса оьрчI. Махъунмай бувкIсса Зулайхат цал буссия МахIачкъалалив зий, утти тIурчан яхъанай бур Новостройрайсса ЦIуссачIурттащиял шяраву. Дур хъун дакъасса участок ва цила гужраха лархьхьусса хозяйство. Зулайхат цуппагу чичлай, луттирду батIу-составитель хIисаврай, 2000-ку шиная шинмай ва цинна ххирасса литературалуха бацIаву дакъа захIмат буллай бур. Ва 15 шинал мутталий мунил цачIун бувну итабавкьуну бур 7-8 лу, буккултран хъинну ххира хьусса. Гьарца луттирал дур 300-500 тираж. Кумаг банма акъана, цила участокрай зугу-зий, ичIува ябуллалисса лелуххи бахху-бихху буллай цила каруннил ляркъумур ишла дуллай итабавкьусса луттирду бур, содержаниялул чулуха бикIу, оформлениялул чулуха бикIу хъинну ххуйсса ва ябацIансса. Миннувассар «Цуппалусса лелуххи», «Бачияра учинну балай», «Оьрму магьа кунма», «Баргъ ва барз», «Щаращи», «Зунттал дараччи» ва м.ц.
Лакрал райондалийсса ЧIурттащиял шяравусса школалий декабрь зуруй хьунни Зулайхат Мудуевал луттирдащал дуклаки оьрчIру кIул буллалисса творчествалул мажлис. Ва батIаврийн бувкIун бия шяравусса агьали, дуклаки оьрчIру ва учительтал, Зулайхатлул творчество ххирами, мунил гъан-маччами.
Ва мажлис бансса бакI-ххуллу, сипта ва харж-хурж цайнна ларсун дия школданий ниттил мазрал дарсру дихьлахьисса учитель Мурсаби Кьадировлул ва Зулайхатлул буттал ссурахъу – биологиялул дарс дихьлахьисса учитель Давыдов ХIусайннул.
Махъ бусан ихтияр дуллусса Давыдов ХIусайннул гьарца чулуха хIисав ларсъсса доклад бунни Зулайхатлул луттирдащал кIул буллай бавтIми.
— Зулайхат жула шяравассар, ЦIуссалаккуй яхъанай бунугу. Жунма ганищал ва ганил чичрурдащал кIул хьун аьркинссар, жунма пахру бикIан аьркинссар Зулайхат жула шяравасса бушиврия, ласун аьркинссар ганил луттирду, ккалан аьркинссар ми. Жунма га чIявунан гъанссар, ганил чIарав бацIан ва ххира бан аьркинссар.
Зулайхатлул творчество дархIуну дур жунма чIявучин хъамабивтмур дакIнийн бутлатисса лахъи балайрдацIун, фольклордануцIун. Мунил жува кIул буллай буру лакрал шаэртурал, балайчитурал, артистурал цIардащал, миннал чичрурдацIун ва репертуардацIун. ЧIявусса балайрду бавтIун бур Зулайхатлул лакрал шаэртурал ччянива чивчуну жунма хъамабитлатисса ва жулва балайчитурал ишла буллалисса. Ванил дартIун дур Лакрал ва Ккуллал районнай диркIсса шяраваллал ва мащал цIардугу. Зулайхатлун кIулли оьрмулуву хьунадакьлакьисса захIматшивурттугу, ччавугу, тIабиаьтгу, буттал ватангу, анаварну баххана хъанахъисса заманагу, Лакку кIанугу. Ванил буккулт кIункIу буллай бур буттал кIану ххира баврийн ва му буруччаврийн, — увкунни ванал.
Мажлисрайн бувкIми кIул хьун, столлай бивхьуну бия мунил итабавкьусса циняв луттирду. ЧIирай лархъун дия Зулайхатлул хъунна дурсса сурат. Дуклаки оьрчIал був_ккуна Зулайхатлул шеърирду, увкуна балайрду. Ва даву жу дархIуссия Зулайхатлул оьрмулул 50 шинал юбилейрацIун. Цинявппа хIайп тIий бия ваксса ххуйсса мажлисрай цуппа бакъашиву. Иншаллагь, утти дайминнуйн цийнмагу оьвчаванну.
Барча, Зулайхат, вил юбилей! ЦIу-цIусса луттирдайну ххари буллалу ина жу! ЦIуллушиву дулуннав вихьхьун, вил оьрчIахьхьун!
ХIусайн Давыдов,
Дагъусттан Республикалул образованиялул отличник
