ГЬАРУННУЛ АРСРУ МАХIАММАД ВА МУСИ МАГЬДИЕВХЪУЛ

ЦIусса шин дайдирхьусса гьантрай, январь зурул 4-нний, буттал шяравун Ккулув жижара буван нанисса ххуллий апатI хьуну, жагьилсса оьрмулий, 35 шинаву, аьпа­лухьхьун лавгунни Ккуллал шяравасса Гьаруннул арс Магьдиев Муси.

Ванащала апатI хьусса уссу МахIаммад, кIусса щавурдал хха_ссал хьун къаивтун, ца нюжмардува уссил хъирив вагу ахиратрахьхьун лавгунни. МахIаммадгу 37 шинаву­сса жагьилъя.
Аьрххилия бутта ва буттауссу зана хьуннин ялугьлай ливчIунни Мусил кIива оьрчI ва МахIаммадлул ца душ.
МахIаммад ва Муси, буттал шяраву школагу къуртал бувну, оьрмулул ххуллийн бувккун махъ зий буссия МахIачкъалалив. Цала хIарачатрацIух къатта-къуш буллай, цIусса къатравун бизан хIадуршинна дуллай буссия. Цибанссар, Аллагьнал мутта къабивтунни.
МахIаммад ва Муси ахиратравун лагаврил кьурчIишиву кIидачIлай, жижара буллай буру ниттихь Загьидатлухь, кулпатир­ттахь Закижатлухь, Наташахь, уссур­ваврахь Кьагьдихь, Мяъсудлухь, ссурваврахь Халисатлухь, ПатIиматлухь ва Гулизардухь. Вайннан къабуллумур махъминнан булуннав. Ятинну ливчIсса мюрщулт хъуни бувну, ччаннай бацIан бувансса каши-кьудрат Аллагьнал чан къаданнав.
Вайннащал апатIравун багьсса, утти азарханалий хъин хъанахъисса уссий Мяъсудлуй, ссурахъий ХIажимурадлуй Аллагьнал цIими бивхьуну лякъиннав!
Укун язисса бивкIулул кьинирду щинчIав къаккаккаваннав!
Ккуллал жямат

—————————

МАХIАДЛУЛ ДУШ ИБРАГЬИМОВА РАЯ
Мадара хIаллай къашавайгу бивкIун, оьрмулул 61 шинаву ахиратравун лавгунни ххаллил­сса хъамитайпа, нину, уздансса дакIнил заллу Хъусрал ЧIаратусса МахIадлул душ Ибрагьимова Рая.
Рая бия дакI-аьмал хъин­сса, инсаншиврул бувччусса, гьар­­ца ишираву бавкьусса хасиятрал инсан. Бусраврай ва хIур­матрай чIярусса шиннардий зий бивкIссар ччатI шахьай заводрай, Сухокумск шагьрулий, бу­ттагу акъа ливчIсса шанма оьрчIгу хъуни буллай.
Раял бивкIулул пашманшиву кIидачIлай, жижара буллай буру ссихь Зоя Гудовахь, арсурваврахь, цинявппагу гъан-маччанахь.
Цинявннахьхьун цIуллушиву дулуннав, оьрмурдай барачат бишиннав. Раял гьав нурданул дуцIиннав, алжаннул ххари баннав.
Ваччиял жямат

——————————

Хъуннасса кьурчIишивугу кIидачIлай, жижара буллай буру Каспийскалий яхъанахъисса ГьунчIукьатIатусса Аслихь ва ванил арсурваврахь, душнихь, МахIачкъалалив яхъанахъисса Фаяхь ва ванил душварахь, махъсса гъанчунахь, вайннал ххирасса лас, ппу, уссу, ниттиуссу
Робинзон
аьпалувух ишаврийн бувну. Махънал оьрмурдай барачат бишиннав.
Робинзоннул рухI алжаннул ххари даннав, гьав нурданул дуцIиннав. Амин!
ЗучIан биян ччай биян къавхьусса
Яшидар, Мухлисат, Хумайсат, Изалахъал Аьшура
ш. КIямаши