1943 шинал февральданул 2-нний Сталинградуллал талатаву къуртал хьуссар. Ва къизгъинсса талатавриву чIявусса вир_ттаврал цIарду ялун лирчуссар. Дяъвилул тай гьантрай Сталинград душманнацIа буллай бивкIссар жула Дагъусттаннал миллатирттал бур кусса яла дакIру чаннаннилми арсругу. Укун, масалдаран, 1942 шинал 15 азара дагъусттанлув цала хушрай лавгун ур фронтрайн, 1943 шиналгу 12 553 инсан тIайла увкссар.

З.АьбдурахIманова
Билаятрай ца яла захI­матсса тай шиннардий МахIачкъалалив сакин бувну бур цIусса 58-сса армия. Ванивун бухлай бивкIун бур 4 стрелковый дивизия, стрелковая бригада ва кIива артиллериялул полк. Ва армиялул бакIчинугу ивкIун ур генерал В,А Хоменко. Ва бакъасса шикку ликказан дурну дур 44-сса армиялул ва 135-сса авиадивизиялул. ХIадурну бивкIун бур ччимур чIумал талан МахIачкъалаллал аьрали –хьхьирил база ва цаймигу аьрали частьру.
Шиная шинайн жуятура арх дуцлай дур Хъунмасса Буттал кIанттул дяъвилул чIунну, гьантлия гьантлийн чан хъанай бур тай иширттал бардултгу. Оьрмулул 20-21 шиннардиву талан лавгун бивкIсса тай жагьилтуран хIакьину дур 90-нниха лирчусса шинну хьуну. Бугьара хьуну бур хIакьину жула вирттал.
Сталинградуллал талатаву къуртал хьуну, 73 шин хъана­хъисса вай гьантрай республикалул БакIчи Р.АьбдуллатIиповлул амрулийну вай гьантрай хъуншагьрулул мэр Муса Мусаев ивунни МахIачкъалалив ялапар хъана­хъисса ветерантурачIан. Ванащал мукунма ветерантурачIан бивунни шагьрулул администрациялул къуллугъчитал ва Советский райондалул бакIчи ХIажияв Дарбишев.
Муса Асхабаьлиевич хьхьичI­ва-хьхьичI увххунни Сталинградуллал талатаврил гьурттучи, отставкалийсса полковник, ДОСААФ-рал ва Аьрали Гужирдал ветеран Виктор Михайлович ХрисановлучIан.
Ветераннал ххагу-ххарину цачIанма бувкIсса хъамал кьамулгу бувну, бувсунни Сталинградуллай цанма ккавкмуния ва бухIан багьмуния. Дахьва школа къуртал бувсса Виктор Михайлович Ульяновскалий дачIи шинайсса аьрали курсругу къуртал бувну, лейтенатнал чингу дуллуну тIайла увккун ур талатаву къизгъиннийн. Ва талатавриву Виктор Хрисанов лайкь хьуну ур ЯтIул ЦIукул ордендалун. Ва дакъасса ветеран лайкь хьуну ур цаймигу орден-медаллан.
Хъирив Муса Мусаев ивунни Хъун дяъвилул ветеран МахIаммад ХIамзатовлучIан. Висло-Одерский ва Восточно-Померанский операциярттаву талай ивкIсса МахIаммад ХIусмановичлул ва ванащалсса ялагу шама къучагънал цIа дуллуну диркIун дур Совет Союзрал Виричунал цIарду дулун. Амма цукун ци иш багьссияв тай шиннардий награда ванан дуллуну дур дяъви къуртал хьуну 52 шинавату — №761 –сса Аьрасатнал Федерациялул Президентнал ХIукмулийну 1997 шинал июльданул 21-нний.
МахIаммад ХIамзатов увну ур Дахадаевуллал райондалийсса ХудуцI тIисса шяраву.Оьрмулул 20 шинаву ва увцуну ур ЯтIул Аьралуннавун цайва бивхьусса аьрали бурж лахъан. МахIаммад увтун ур Белорусская Особая тIисса аьрали округ­райн. Микку уна байбивхьуну бур дяъви.
Муса Мусаевлущалсса ихтилатирттаву ветерантурал бувсунни цала дакIнийсса ва щаллу хьуну ччисса мурадирттая. МахIаммад ХIамзатовлул шагьрулул бакIчинахь бувсунни цув МахIачкъалаллал хIурматлувсса гражданин хъанахъишиву, амма ттинин цалагу билаятрал бакI дургьуминная цув барча уллалисса царагу телеграмма, чагъар къабувкIшиву. Мэрнал бакIрайн лавсунни ветераннал ва хиял ччясса мутталий дузрайн буккан буван. Муса Мусаевлул ветерантал барчагу бувну, умуд бивхьунни Хъуннасса Ххувшаву ларсун 71 шин хъанахъисса байрандалул хьунийнгу хьунабакьинтIишиву цивппа вайннащал.