Февральданул 10-нний «Дагестанская правда» кказитрал редакциялий хьунни Республикалул клиникалул больницалул хъунама хIакин Ибрагьим МахIаммадовлул пресс-конференция.
Бадрижамал Аьлиева
Журналистуращал хьунабакьин ва кьини мукунма бувкIун бия сердечно-сосудистый хирург, рентгенэндоваскулярный хирург Шамил МахIаммадов ва хIакин-ортопед-травматолог Ратмир Аьбдуссаламов.
Ихтилатру хьунни РКБ-лул дурсса давурттал хIасиллаясса ва аьмну цIуллу-сагъшиву дуруччаврил тагьарданиясса.
Ибрагьим МахIаммадовлул бувсунни РКБ-лул хъунмасса коллектив бушиву – 2, 5 азара инсан зузисса. Шинал дянив микку байшиву 15 азарваксса операция. Бувсунни ва азарханалий цуку-цукунсса центрду, отделениярду буссарив, хьхьу-кьини дакъа, иш багьний ччимур чIумал дуван шикку зий душиву МРТ, лавайсса даражалул, ультразвуковой ва лабораториялул хъиривлаявуртту дуллай бушиву.
Шинал дянив РКБ-лий хъин шайсса ур 1, 5 азараксса инсан, ва азарханалий бусса бур 1 азаллий 350 тах. Шинал дянив шикку байсса бур 6 азарваксса оьрчI. Бувсунни цIуну дунияллийн бувксса оьрчIру ливтIусса ишру хъинну чансса шайшиву. Нажагь бакъа къашайсса бур оьрчI бувсса хъамитайпа бивкIусса ишру, мугу захIматсса тагьарданувун багьну махъ вайнначIан бувцуну бувкIун, цичIав кумаг буван къабюхъайсса чIумал.
Ва кьинисса хъамаллурал агьаммур дардрив дия инфаркт Миокарда, инсульт хъанахъими ялу-ялун чIяву хъанай бушиврул ялувсса.
— Сердечно-сосудистый къашайшивуртту цIанасса чIумал дур цалчинмур кIанттай, ми сававнугу яла чIявуми халкь литIлай бур – сайки 56 %, миннувагу цалчинмур кIанттай дур инфаркт Миокарда, хъирив – инсульт. Инфарктрайн буцайсса къюкIлил ишемический азарданул къашавай Дагъусттаннай ур 80 азара инсан. Ва аьдадгу гьарца шинал 16 азара инсаннайну хъунна хъанай дур, — увкунни Шамил МахIаммадовлул.
Гихунмай ванал бувсунни азарданул дайдихьулийра, му гихуннайгу дачиннин ягу му хьуннинна дувайсса терапиялул давурттая. Ми даншиврул тIурча гьарцагу инсаннан аьркинну бур, цалла цIуллу-сагъшиврул ялув бавцIуну, чIумуя чIумуйн аьркинсса анализру, узи ва цаймигу хъиривлаявуртту дуллан. Инфарктрал ххуллу кьукьинсса операциярдугу байсса бур наркоз дакъа, бигьанма. Ва кьяйдагу хIакьинусса кьини хъанай бусса бур яла машгьурмурну, чIявуну ишла буллалимурну.
Ратмир Аьвдуссаламовлул мукъурттийн бувну, республикалий ттаркI-базурдал азардацIун дархIумур тагьаргу къаххуйсса дусса дур, кару-ччанну цIуцIисса инсантал ялу-ялун чIяву хъанай бусса бур. Бувсунни протезру бишаврил, инсан цала хIалданийн цува учIан аврил давугу республикалий цалнияр цал ларай хъанай душиву, личIи-личIисса операцияртту буван, протезру бишин цIана чара бакъашиву дакъашиву республикалул кьатIувсса шагьрурдайн занан, ххуллун-харжгу буккан къабувну, ххуллийхсса чIунгу гьан къадуллай, ми республикалийрагу дувайшиву багьайсса куццуй.
Ахирданий Ибрагьим Уцумиевичлул цинявннайннагу оьвчаву дунни цила чIумал цалла цIуллу-сагъшиврул хъирив буккан, чIун-чIумуй аьркинсса анализру дулаван, хаснува оьрмулул 40 шинава тинмай хъаннин аьркиншиву чIумуя-чIумуйн маммография, хъазамрал УЗИ, онкоцитология дуллан, гинекологначIан занан, щитовидная железалул ялув бацIан, адаминан 50 шин хьуну махъ мукунма аьркиншиву фиброгастроскопия, колоноскопия, рентгеноскопия ва цаймигу хъиривлаявуртту дуллан. Ми цимурца дувангу бюхълай бур гьарцаннаща укра, цалва-цалва поликлиникалий.
