Аьдатрайн бувну, ва ххуллух жул редакциялийн хъамалу увкIунни А-П. Салаватовлул цIанийсса Къумукьнал музыкалул ва драмалул театрданул режиссер, гьунар бусса киноактер ва сценарист, цIадурксса Ислам Казиев. Жул хIурматлувсса хъамаличунащал сайки кIира ссятрай ххишалагу лахъи лавгсса ихтилат хьунни хъинну хIазсса, ванал творчествалуцIун бавхIумур оьрмулувасса дакI­нийнбичавурттая ва, муницIун, хIакьину республикалул культуралуву хъанахъисса агьамсса масъаларттая цIухху-бусулийсса.
Увну ур Казиев Ислам Амашевич 1938 шинал августрал 29-нний Хасавюртуллал райондалийсса Костекуллал шяраву.
Ванал 1962 шинал къуртал бувну бур Москавлив Б. Щукиннул цIанийсса театрданул училище. Хъирив 1969 шинал къуртал бувну бур ГИТИС-равусса режиссертал шайсса факультет.
Ислам Казиев ур Абхазнал ССР-данул лайкь хьусса артист (1979 ш.), Дагъусттаннал ССР-данул лайкь хьусса артист (1979 ш.) ва Аьрасатнал магьирлугърал лайкь хьусса деятель (2000 ш.).
2013 шинал ванан дуллуну дур бюхттулсса наградалун лайкьсса Дусшиврул Орден. Ислам Казиевлул чивчуну бур «Кизиловая роща» тIисса роман ва цаппара цаймигу хаварду. Дагъусттаннал театрдал сахIнардай бакъа, ванал режиссершиву дурсса пьесарду ттинин бивхьуну бур Аьрасатнал цайми-цаймигу регионнайгу ва цIанагу найнма бусса бур. Цувагу жула машгьурсса чичу, шаэр Апанни Къапиевлул творчествалул хъунасса минахур ур.
— Ислам Амашевич, барчаллагь, цалчин, жул редакциялийн учIансса чIун ля­къаврихлу. КIилчин, ларгунни Культуралул шинну баян бувну диркIсса дукIусса шин. Цуку-цукунсса асарду ливчIри виву га шин тIайла дуркния махъ ва цуксса мюнпат хьухьунссар гания жулла культуралун?
— Зуйнмагу барчаллагь, ттуйн хъамалу оьвчаврихлу! Культуралул шин диркIнугу, ттул пикрилий, къамуксса цIуларгсса ххай ура жучIара му ара. Чан-кьансса да­хханашивуртту хьурчагу, районнал мюрш-кьюршсса щархъавусса культуралул къатрал тагьар гара га дур. Микку­сса даврил сакиншиннагу мура куццуй хьхьарану духьун­ссар. БувчIлай бур жулла республика спортрахьхьун рай буллусса, мунил ххуллу бувгьусса республика душиву. Гьар кIанай спортзаллу тIитIлатIавуртту ва ми спортинвентарьданул щаллу буллалаву респуб­ликалул агьам­сса къулагъасралу бур. Мюрщисса щархъаву хъуни­сса спортзаллу тIитIлатIавурттугу ттун щала букъавчIай. ХьхьичIва, на чIивиний, щархъаву клубру тIитIлай, мивун халкьру бучIан буллай, халкьуннал дакIру тяхъа дуккан дансса, рахIат дуккан дан­сса программарду щурущи дуллай бикIайва. ЦIана тIурча культуралул къатта чув буссариввагу кIулну къабикIай чIявуссаннан. ЛичIишиву дакъа мура тагьар шагьрурдайгу дур. Цалва миллатрал театрду, миллатрал кказит-журналлу итабакьайсса идарартту чув буссарив къакIулсса халкь чансса къахьунабакьай.
Аьрасатнал цайми регионнай тIурча театрдахсса ва хаснува культуралухсса аралух ялунгу шиная шинайн хIукуматрал чулухасса ургъилгу, тамашачитурал чулухасса къулагъасгу ххи хъанай хIисав шай ттун. Мунияту, Культуралул шин диркIнугу, хъуннасса дахханашиву цалсса ттун къащуркIал хьунни. Бурганну гихунмай тти… Амма, ттухьва цIувххуну, ци шинну баян барчагу, гьарца ялун нанисса шин халкьуннал рувхIанийсса ххазинардахмур къулагъас, я театрдах, я литературалух, я музейрдах, я кинорах, такIуйрагу хьхьара хьун ритан къабучIиссар.
— Вил пикрилий, хIакьину цукунсса тагьардануву дур Дагъусттаннал драматургия, хаснува зул Къумукьнал ва вайми-вайми театрдал, микку зузисса артистурал ва мивун нанисса артистътурал хъунмур никирал кIанайн букIлакIисса жагьилсса пишакартурал даража? Вава суал буллай бур жул сайтрай Елена Зеленинагу, ххуйсса драматургия дакъашиву вил даврихун дахчилай дакъарив, тIий.
— Ттухь цIуххирча, къаххуй­сса, дакI, пашман хьурча дакъа, ххари къахьунсса даражалий дур цIана жулла драматургия. Ба­къар гьунар бусса, миллатирттал театр­дал сахIнардай жяматрал «цIуцIи кIанттурду» аьч бан, дащуй бишин бюхъайсса пьесарду чичинсса сценаристал. Бумигу театрдал каялувчитурал ссуссукьу буллай, багьа къабуллай бур. Ганал пикрирду ба­ччан бан, бакIракъутталий бишин хIарачат буллай бур. Театрдал каялувчитуран жулва чичултращал, сценаристуращал зуннияр бигьану бур татарнал, чувашнал, азирбижаннал, мордвиннал пьесарду лавсун, мигу цалва хIарачатрайну цукуннугу бишбатарну таржума бувну, режиссернахьхьун булун. Ххуйну таржума бувсса пьесалуща бюхъайссар тамашачитал цичIанма кIункIу бувну, цихухва гъира багьан бувангу, къаххуйсса таржумалийну – театрдания арх буцан бувангу. Вайми миллатирттал къакIулли, жул Къумукьнал театрдануву цIана бишайссар Багьауттин Аджиевлул, Атай Атаевлул пьесарду. Яруссагу, аьпа бан, ГъалбацIовлул пьесардая рязийну бикIайва. Жул театрданул иш-тагьар цIана оьккисса да­къар, тIайлану бусан, бихьлай буру халкьунначIан, тамашачиначIан гъансса, кIулсса масъалартту гьаз буллалисса пьесарду. Тамашачиталгу вайми театрдах бурувгун чIявусса бучIай жучIан. ВайминначIа кунма тамашачитал къабукIлакIисса аваралуву жу бакъару. Цанчирча, жул давугу ми бувкIун ччисса мурадрай сакин дурну дуну тIий.
Дагъусттаннал миллатирттал театрдал директорталну, художествалул каялувчиталну зий бур магьирлугърая архсса пишарду бусса халкь. Ва ишираву на ца Лакрал театрданун бахтти хьуссаннун ккалли бувара гикку цалла даву лавайсса даражалийну кIулсса Бадрижат Набиевна ва Гулизар Султанова зий буну тIий цIана. Хъинну ххуйну ва лайкьсса даражалий бур Лакрал театр, бур гьунар бусса артистал ва цIуну бувкIсса, умуд бишин лайкьсса жагьилми артисталгу. Яла лакрал драматургия дакъар учин гьич къабюхъанссар, цанчирча зул уну тIий цила чIумал лайкьсса багьа къабивщусса, бусалдаравун агьсса Апанни Къапиев. Ттун мунал творчество ххира хьуссар ттула гъанчу Аткъай АджаматовлуйхчIин. Ласира Къапиевлул цумур-цагу произведение! Миву буссар кIусса пикри, аьщуйн щун дурсса сюжет.
— ЦIана ина Къумукьнал театрдануву ссаха, цумур пьесалуха зий ура? Аьрасатнал цайми регионнайсса театрду оьвтIий бакъарив вийн, цала сахIнардай пьесарду бишин нану тIий?
— ЦIана жу зий буру Багьауттин Аджиевлул «КунцIуллул ялттусса ламу» тIисса, хIакьину обществалуву яла щурущими, кIункIурдуву кунма, яла щарайми масъалартту дащуй бивхьу­сса пьесалуха. Му ттинин цал сахIналий бигу-бишарду, тамашачитурангу лап дакI даркьунни. Миву авторнал гьаз бувну буссар коррупциялул, лулттурасри ласаврил, къуллугъчитурал халкь цукун кьякьлухун бишин хъинавав тIисса жула яла цIурувкьюми «цIуцIи кIанттурду». Амма укунми пьесарду бишайни жучIара «свобода слова» дакъасса ххан­ссар. Театрданул магьирлугъраву за къабувчIайсса инсантал бу­ссар, ва багьана, та савав ляркъуну, жухун бахчинмур буллай.
Аьрасатнал цайми регионнай­сса театрдаву мукунсса иш хьунавагу къабакьинтIиссар. Тикку культуралул, творчествалул халкьуннан цанма ччикун пикри бангу, му пик­ри иширайн кIура баен бангу тархъаншивугу дур, шартIругу дур. ДукIу ттуйн оьвкуна Калининград­райн театрдануву пьесарду бишин. Мукьва пьесалул режиссершиву дурссия. Тийхсса артистурал харжру бия 40-50 азарда къуруш ва цивппагу цуя ца акъар цува заллусса машина бакъасса. Тай, тIайлассар, дакIнийхтуну зийгу бур сахIналий.
— Жул хIурмат бусса Джелалет Анатоглу сайтрай цIухлай ур. ХIакьину гьар кIанай гьаз баймур ихтилат патриотизмрая бур. Вил пикрилий, патриотизм цир, мунил мяъна ссаву чIалай дур вин, тIий.
— Патриотизм му дур жулва ужагъирттай, жулва кулпатир­ттаву тарбия дувайсса зат. Ниттил мазрахсса, миллатрал тарихрах­сса, культуралухсса ччаву ва миллатрал ялун бучIантIимунихсса къюву.
Цалва оьрчIан цалва миллатрал маз лахьхьин бан дакI къадирсса халкьуннаву, миллатраву ци патриотизм дикIайссар. Яла хIакьинуния тиннай жунна Ватан ххирану дикIан аьркин­ссар кусса мукъурттия ци хайр бикIан бюхъайссар. Ганиннин цалла ватан чув диркIссарив, ганил бакIрачIан ци най буссарив къакIулну мурчIину бивкIсса халкьуннайн, жува бяйкьлай бивкIун буруча, утти жула жувагу, жулва оьрчIругу Ватан ххирану яхъананну тIун къатIайлассар. Ватандалухсса ччавугу, мякьгу жула оьтту-ттурчIавура дикIан аьркинссар, жула хъирив жулва оьрчIавугу дирхьуну дикIан аьркинссар. ОьрчIру яла хъяврин бан къашаймур публикар. Мунияту жува, хъунмур ник, миннан эбратну личIан аьркин­ссару. Ми цIинцIлил ва ччюрклил бувцIусса кIичIирттавух, подъездирдавух къазанан, мукун цивппа яхъанахъисса кIанттух баччибакъа ялапар къахъанан оьрчIан лахьхьин бан аьркинссар жуйхнувачIин ми чапал къабуллан, мурхь, тIутIи дургьуну, миннуха аякьа дуван. Театрданул режиссернал бикIу, кказит-журналлал зузалтрал бикIу бикIан аьркинссар цалва-цалва «граждан позиция». Халкьуннал хьхьичIун ласун багьлагьисса масъала дащуй бивхьуну, му дузрайн буккан бувансса гужгу, гъирагу, яхIгу. Ванивур жулла патриотизмгу дусса. Нара хIисав дуллай, ттун щуркIал хьуссар лакраву патриотизмрал ссихI-рухI ххишаласса душиву. Зуву оьтту-ттурчIавун дагьсса, кIани-кIанттурдайх хъус лякъин лагайсса бивкIшиврул ягин дурсса хасият духьунссар тIий икIайссара на ттухьва нава. Чув хьунабакьирчагу, зул халкьуннаву цукунссарив ца зула буттал кIанттухсса мякь личIисса бикIай, Ватандалия ихтилат багьнийгу миллатрал къювурдацIун дархIусса аьратталшиву щуркIал шай.
ХIалу дирирну дунура, зул кказитрайхчIин, ца ттулва оьр­мулуву хьусса ишираягу къабувсун ацIан къахьунссар. На ура ГИТИС-раву дуклай. Дарсирдая махъ жу балай учин, музыкалул инструмент бищун ва цаймигу гьунарду бан кIулми цачIун хьуну, Москавуллал, Подмосковьелул Бигьалагай къатраву концертру ккаккан дан лагай­ссияв. Концертрал ахирданий жун, студентътуран, конвертраву дирхьуну арцугу дулайва. Цал мукунсса аьр­ххи багьуна жун Можайскалийн. Концертгу дуллуну, шаппай бачин хIадур хъанахъисса ппурттуву цамур группалуву Лев Лещенкощал дуклакисса Равил тIисса татар оьрчIал увкунни, цащал ца кIанайн учIаннав куну, махъгу лавсунни ттуя щихьчIав къабусан жува чун лавгун бивкIссарив. УчIанна, учав. БувкIру ца «Школа» тIисса чичругу ду­сса ца идаралучIан. Най буру лахъи­сса ларзулух, чарив халкьуннал хавардал аьлагъужа бусса чулинмай. Гъан хъанахъиссаксса, цукуннив вичIилухух бишлан бивкIунни ттулва къумукь маз. Най ура Равиллул хъирив ана-анавархъиндарай. Бувхру ца къатлувун. Гиву дуки-хIачIиялущалсса лахъисса столлах бур халкь щябивкIун. Гивун уххаврищал най буна ттул я тIайла бавцIуна столданул ца къирагърай щяивкIсса, чан­сса бакIгу кIачIасса адаминайн. Равиллул хIаллих кунни, нигьамаусара, вай къиримнал татарди, куну. Ца-кIира минутIравун ттуйн кIа бакI кIачIасса адамина оьвтIий ур тIун бивкIунни. Лавгра. Ссаламгу буллуну, хъинну иминсса чIуний цIувххунни, цув къаувчIурив, куну. Багъишла итигу, куну, къаувчIунни, учав. На зул АхIмад-Ханнахха, увкунни. Хъинну ташвишгу хьуну, цIунилгу хъямала агьну чIуен ував. Яла гания махъгу ганал жуйн цимилагу цачIанма хъамалугу оьвкуна, цимилагу цачIугу щябивкIссару. Вана укунсса лаккучу, цIадурксса виричу хьунаавкьу­сса ишгу хьу­ссар ттул оьрмулуву. Къапиевлул творчество ххирасса ттул оьрмулуву АхIмад-Ханнуясса дакIнийнбутавугу лирчIссар. Мунияту лакращалмур дахIаву, лакращалсса яхши-хашгу ттул ляличIисса шайнуккар.
— Ина, театрдануву акъа­сса, зий ура университетрал актертал хIадур байсса факультетрайгу. Бурив миннаву жулва миллатирттал театрдал ххуйсса артистал хьунхьуви тIисса умуд бишин лайкьсса оьрчI-душру?
— ЖучIан буххайсса 16-17 студентнава 3-4 инсан ялун личирчагума, му хъунмасса ишри. ЦIаларгсса Станиславскийл ученица Мария Кнебельлул «Актер – это штучный товар» тIисса махъру тIайлассар.
На миннащал хьусса ихтилатраву хIарачат буллай икIайссара миннаву ци хасиятру кьюлтI хьуну дурив ххал дан. Яла гьунар бусса артист къахьурчагу, миннаву инсаниятрал ххуйсса хасиятру лякъирча – мугума ххуйсса ишри. ЖучIан бучIайсса чIявуми студентътурал хъунмурчIин байсса ихтилатраву шагьрулул акцент дур. КIулну къабикIай цалва ниттил маз, цалва миллатрал шаэр-чичултрал, художник-композитортурал цIарду. Ми гьарзат цIунила бусан багьай миннахь. Ялу-ялун аьч хъанай, миннава чIявуми ялун личлан бикIай, ца гьунар бакъахьурча, цамур бушиву чIалай, миннахь маслихIат буллай икIара, зухава зузира, тIий. КIулмуния зарал бакъассар, тIий. Ниттил маз къакIулхьувкун, гьармагу ур, оьрусналмур театрдануву зунна, тIий. ТIий икIара, тайнналмур театрданулсса къабуллай, зулва-зулвами миллатирттал театрдаву зуншиврул маз лахьхьинсса хIарачат бувара тIий.
Ихтилат бувссар
Качар ХIусайнаевал
Чивчуссар
З. АьбдурахIмановал