Январьданул 26-нний журналистътуращал хьунабавкьунни пресс-конференциялий ДР-лул цIуллушиву дуруччаврил министр Танка Ибрагьимов ва ДР-лул Роспотребнадзорданул каялувчи Элеонора Оьмариева. Ххал бигьлай бия цIанасса ппурттуву Дагъусттаннай гриппрал (H1N1) къашавайшиврул тагьарданул масъала.

ХIасан Аьдилов
Танка Ибрагьимовлул мукъур­ттийн бувну, Дагъусттаннай, цайми регионнайсса тагьардах бурувгун, гриппрал ва ОРВИ-рал къашавайшиврул тагьар яла оьккимур дакъар.
Министрнал увкусса куццуй, махъсса 3 нюжмардий Дагъусттаннай сияхIрайн лавсун бур 4 азаллий 188 инсан вирусрал инфекциялул (ОРВИ-рал) ва гриппрал къашавайсса. Республикалий гьарца кьини сияхIрайн ласлай буссар азарханалий уттубишин бувми. Ларгсса чIумуву республикалий гриппрал эпидемиялул шачIану лавхъун ба­къар, яни эпидемия дайдирхьуну дакъар. Мунияту карантин баян бансса аьркиншиву къадиркIссар.
Ганалва бувсмунийн бувну, карантин баян баншиврул аьркинссар дикIан цин хасъсса шартIру, ми душиву хIисавравун ласайссар Дагъусттаннал Роспотребнадзорданул. ЦIусса шин дайдишин хьхьичIсса гьантрай баян бувну бивкIссар мас­карду дахIайсса низам школардай ва вузирдаву.
Министрнал бувсунни хIа­к­ьи­нусса кьини республикалий сияхIрайн лавсун ушиву H1N1 грипп­рал (свиной грипп) къашавайсса 77 инсан, ми гриппрал къашавай хьушиву тасттикь бувну бур.
Цамур журалул гриппрал – H3N2 къашавай хьусса ур 14 инсан. Ми гьарзатрал хъирив лаяншиврул, Республикалул гигиеналул ва эпидемиологиялул центрданул дурну дур 5 азаллий 224 ххал бигьаву.
Минздраврал бакIчинал увку­сса куццуй, республикалий 5 инсан ивкIуну ур вирусрал пневмониялул, му азар шайссар грипп захIматсса тагьарданийн кIурадарукун (осложнение гриппа). Ми циняв къашавай хьуну ливтIуминнан вакциналул ххалаххив бувну къабивкIссар.
Гьашину бувну бур 978 азарва вакциналул ххалаххи – республикалул агьалинал 33 процент.
Т. Ибрагьимовлул мукунма бувсунни республикалий агьалинал чIявуми инкар хъанай бивкIшиву вакциналул ххалаххив баврия, 974 лякьлувусса хъамитайпа инкар хьуну бур ми ххалаххив баврия. Эпидемия дайдирхьуну махъ вакциналул ххалаххив буллан къабучIи буллай бур, муния мюнпат лап чанссар, му бакъасса, чIалну бувсса вакциналия заралгума хьун бюхъайсса бур.
Элеонора Оьмариевал бувсмунийн бувну, гьарца кьини ведомствалул дайсса мониторинграйну республикалий сияхIрайн лавсун бур грипп ва ОРВИ азардал эпидемия дайдирхьуну дакъашиву. Къашавай хьуминнаву чIявусса бур 7-14 шинавусса оьрчIру ва 60 шинавату ливчусса инсантал, амма миннал къашавайшиврул даражагу эпидемиялул шачIанттучIан бив­сса бакъар.
Журналистътуращал хьунабавкьуминнал бувсунни мукунма цукун буручлан аьркинссарив гриппрая.