Январь зурул 13-нний Аьрасатнал Печатьрал кьинир. «Илчилулгу» байранни. ХIакьину агьалиначIан ччяни информация биян бавриву интернетрал, телевидениялул, радиолул бияла хъунни, гьай-гьай. Амма кказитиртталмур биялагу хъисгу хьхьара къавхьуссар ва хьун къабюхъайссар.
Хаснува миллатрал прессалул буржгу, къуллугъгу личIири. Машгьурсса профессор Ися Аьбдуллаевлул тIийкун, «Илчи» — миллатрал хъунккурчIар, миллатрал ялтту ливчусса баркьутри. Миллатрал тарих, культура, литература, багьу-бизу, лавгзамана ва ттизаманнул бущи ва тарг ккаккан бувай дагьанир. Ва, яла-яларив, миллатрал маз ябаву мурадрайсса чул бищай ттарцIри.
ЧIявуссаннал учай, 70 шинай миллатрал кказитрая махIрум бувсса лак «Илчи» итабакьлай байбишайхту чивун бувкссар куну. Буниялттунгу, 1991 шиная шинмай кказит миллатрал трибунану буссар. Лакрал лакрахь пасихIсса ва язисса лакку мазрай махъ учай кIану хьуссар. Яла хьхьичIунми чIарахбацIултрив буккултри. Кказит тIалав буваймири.
Ххари хьунна дагъусттаннал журналистътурахь прессалул байран барча тIий МахIачкъала шагьрулул Кировский райондалул администрациялул хъунама СалихI Сагидов миллатрал кказит карунниву бувгьуну уккайхту. Гьай-гьай, мукунни бикIангу аьркинсса. Гьаркаснан, къуллугъчинангу, хъудугьунгу миллатрал кказит хьхьичIунну бухьурчанни кказитралмур ишгу бачинтIисса. Так къуллугъчитуралми каширдугу, биялагу личIири. Миннаща щалвагу миллатран аьмсса хъус-ххазина – миллатрал кказит ябавриву ххишаласса бутIа бишин бюхълай бур. ЧантI увкума, миллатрахсса ччаву цIакьма кказит_рал чIаравгу ацIлай ур. Цанмагу, гъан-маччацириннангу кказит тIалав буллай ур.
Зулгу байранни, ххирасса буккулт! КъаличIаннав жулва миллат миллатрал кказит бакъа!
