Вай гьантрай жул ххирасса учитель Даниял МахIаммадаьлиевичлул кIицI ларгунни оьрмулул юбилей.
ЗахIматсса ва бусравсса учительнал пиша язи бувгьуну, цалва оьрму оьрчIру тарбия баврин ва миннан кIулшивуртту дулаврин хас бувну, чIярусса шиннардий Ккурккуллал школалий учительну, директорну зий хъунмасса захIмат бивхьуссар Даниял МахIаммадаьлиевичлул.
Ххуйну дакIний дур хъунмасса гъира ва гьавас бусса жагьилсса учитель школалий зун увкIсса чIун. ТачIав хъамакъаританссар бюхханну, асар хьунну дирхьусса литературалул дарсру, бяст-ччаллил, тIуркIулул журалий лагайсса, гъира бакъанангу гьавас бутлатисса оьрус мазралми.
ДакIний бур Даниял МахIаммадаьлиевичлул сипталий тIивтIусса литературалул кабинет ва миву тIайла дуккайсса литературалул вечерду. Таний школалий лавхьхьумур жул оьрмулуву чIявуну бучIи лявкъуссар.
Даниял МахIаммадаьлиевич, барча вил юбилей!
ЦIуллу-цIакьну, винна ххирасса даврих мукунма гъира-гьавас буну, чIярусса шиннардий уттигу зунсса каши-кьудрат дулуннав вихьхьун. Ина бивзсса гьарица ша тIайлабацIусса хьуннав. ДакIнийсса мурадру бартлаганнав.
Бюхълай личIаннав.
Ина ххирасса вил учениктал
——————————
Уттигъанну ниттил увну 70 шин бартларгунни ЧIурттащиял шяравасса Казимбаглул арс ХIусманов Маммадивирдун.
Аьлимчу-агрономнал пишагу лавхьхьуну, дахьа цIуну дурсса тIутIул совхозрай ЦIусса ЧIурттахь, яла Шяраваллил хозяйствалул министерствалий инженерну, Горзеленхозрай отделданул хъунаману зий, цалва пиша ххуйну кIулсса, грамотнайсса зузала ушивугу ккаккан бувну, утти игьалаглай шава ур.
Жу дакIнийхтуну барча дуллай буру мунал юбилей. ЧIа тIий буру цIакьсса цIуллушиву ва лахъисса оьрму.
Жун ххирасса Маммадивир! Бартлаганнав вил дакIнийцири мурадру, ххари улланнав оьрмулул. ЖучIа вил хIурмат мудангу лахъну буссар ва уттиния тинмайгу бикIантIиссар.
Я Аллагь, зу вила кулпат Назижатлущал архIал оьрчIал, оьрчIал оьрчIал ххари буллай битаннав, оьрмулул буччинцIа.
Вин ва дунияллийсса циняр хъиншивуртту чIа тIий, виха дуаьлийсса вил гъан-маччами, гьалмахтал, дустал
——————————
Январь зурул 17-нний Карашрал шяраватусса БадрумахIаммадлул арс Буттаев КьурбанмахIаммадлун там хъанай дур ниттил увну 70 шин.
Цаламинналгу, жяматралгу дянив та-унугу ца сий ххину зугу-зий, ягухъанай ивкIсса чув ур КьурбанмахIаммад. «ЗахIмат буллай аьдат хьусса инсан зукъазийни уххайссар» тIисса учала хъинну бавкьусса бур ванацIун. Та яла жаваб кьянкьамур журалул аьралий къуллугъгу бартбивгьуну увкIун махъ (аьраяллил разведкалуцIун дархIусса спецчасть), комсомолданул путевкагу ларсун, КьурбанмахIаммад лавгун ивкIссар зун строительствалул давурттай, Норильскалийн, Магаданнайн ияннин. Зий ивкIссар мукуна цайми-цаймигу давурттай, хIурмат буну, хьхьичIунну.
Пенсиялийнгу увккун, цалва аьзизсса кулпат Халисатлущал КьурбанмахIаммад хIакьину лавну, паракьатну яхъанай ур Каспийскаллал шагьрулий. Тиккусса къачансса Карашрал агьалинал дянив бартбигьайсса иширттавухгу КьурбанмахIаммадлул мудангу дайссар хьхьичIунсса гьурттушиву, ласайссар цайнна сакиншиндарал биялсса бутIа.
Хъуннасса юбилейгу барча дуллай, чIа тIий буру КьурбанмахIаммадлун чIярусса цIуллусса шинну, цIу-цIусса ххари-хъиншивуртту. ТачIаввагу чан къахьуннав вин вила чумартсса дакIнин лавхьхьусса кьисмат!
Вил кьини жулгу кьинир.
Дустал, гьалмахтал, цинявппагу ина ххирами
——————————
Декабрь зурул 10-нний ттул 80 шинал юбилей ва кулпат Нурижатлущал цачIу оьрму бутлай 50 шин шаву барча дуван, МахIачкъалалив «Армуди» тIисса кафелуву хьусса мажлисрайн, бувкIунни Къазахъисттанная, Аьшттарханная, Кисловодскалия, ЦIуссалаккуя ва Чачаннава чIявусса хъамал.
На дакIнийхтуну барчаллагь тIий ура ттула чIарав бацIан, нава лахъа-хъун уван бувкIцириннайн. Гьарца инсаннал увкусса нахIусса махъгу асар хьунни, гьарманал барча бавугу бусрав хьунни. Зухьхьун ва зул ичIувацириннахьхьун цIуллушиву дулуннав. Ххарисса, ххуйсса кIанайн бакъа мукьахунмайгу аьрххи къабагьаваннав. Лахъисса талихIсса оьрму чIа тIий ура цума-цаннангу. Оьрмулул ва наслулул ххари булланнав тIий ура.
Сулайман Аьбидов,
1-мур ЦIувкIратусса
