ЦIусса шинал дайдихьулий лавгунни дунияллия Дагъусттаннал ва Аьрасатнал литературалуву ва культуралуву хъунмасса кIантту бувгьуну бивкIсса инсан, Дагъусттаннал халкьуннал шаэр, «Зунттал хъами» журналданул хъунмур редактор, чIярусса премиярттал ва наградарттал, лауреат ХIамзатлул душ Фазу Аьлиева. Ванин 2002 шинал дуллуссар Аьрасатнал паччахIлугърал яла лахъмур награда хъанахъисса орден «Святого апостола Андрея Первозванного».
Фазу Аьлиевал кIунттила бувксса гьунар бусса поэзиялул ва прозалул луттирал авадангу, абадгу дурссар Дагъусттаннал литература.
Фазу Аьлиева
Буттахъал аьдат
Ххирасса зунттаву,
Архсса къутаннай –
Буттахъал аьдатру
Дуссар гьар кIанай.
Дуссар гай луттирдай
Къачирчунугу,
Абадлий хIурматрай
Гьарца къатлуву.
Агар цIу духьурча
Цавайннал тIювай,
Ца цIарал кIалайгу
Цинявннан гьассар:
ЧIаххураннияту
ЧIаххурал ласлай,
Цинявннал къатраву
ЦIугу дишайссар.
Агар сул чIанулу,
ЩичIа дунугу,
Ххяппа иникIмалул
Бухьурча ливчIун,
Цинявннал урцIаву
ИникIма дайссар,
Цинявннал кIарттаву
ЧчатIгу бищайссар.
Агар цу-унугу
КьатIув ачирча,
Ганахь ххуллухъин чин
Циняв буккайссар,
Агар цу-унугу
Къашавай хьурча,
Ляхълай ганан дарув
Дуссар щалла щар.
Агар щих бунугу
Маоьлий, аьтIий,
Щарнил ца зуманив
Цавай бухьурча,
Цамур зуманивсса
Щарнил халкьуннал
Бан хIадурсса хъатIи
Махъун бутайссар.
Агар щин бунугу
Буллай хъатIи-за
Зунняв-накьарттул чIу
Дахьва гьаз хьурча,
Мюрщи-хъуни къатIий
КьатIув буккайссар,
Цинявппа га хъатIуй
Гьурттугу шайссар.
ЦучIав накьлу хьурча,
Гьарца инсаннал,
Цаламанах кунна,
Дягъу дугьайссар.
Кьадарсса къел дарча
Шяравучунал,
Щала щарнил ганан
ТанмихIгу байссар.
Агар виричусса
Къел дарча цаннал,
Щала щарнил шадсса
Байран дувайссар.
ХIанттил кьуру хIавчIма
Дусгу къаайссар,
Кьини дуркний увкIма
Цала дус айссар.
ХIурматрай бавцIуну,
СсихIгу къадуклай,
Гьантлул хъунаманал
ХIурматгу байссар.
Жун кьадиртун дакъа,
Жула буттахъал,
Луттирдай чирчуну,
Аьдатру зунттал,
Так аьдатирттая
Зума бавхътари,
Ттул хьхьичI бацIай ттула
ЧIахху-чIарахми.
Ххал шай цIарал пар ттун
Ца вилаххавсса,
Кания канихьхьун
Буллай нанисса.
Ххал шай иникIма ттун
Сул мурцIувусса,
Кания канихьхьун
Дуллай нанисса;
Наврузбагнал кьуру
Хьамаран бивзсса,
Кания канихьхьун
Буллай нанисса;
Га тIаннул чурттугу
Варси ливчусса,
Кания канихьхьун
Буллай нанисса.
Чувнал дакIгу турди,
Душман увкIукун.
Буллугъсса ссупрари,
Дустал бувкIукун. –
Вайнна вай луттирдай
Дакъа аьдатру
Гьар шаттирах чIалай
Ттигу зунттаву.
Агь, зунттал аьдатрув,
Зунттал аьдатрув,
Чирчуну луттирдай
Дакъахьурчагу,
Хъамагукъаритлай
Чув бухьурчагу,
Оьттувух ирсирай
Най дуру ттигу.
Таржума бувссар Н. Юсуповлул
БачIлай бура ссурулккуртта
Агь, ва гъарал, ва гъарал,
Ва гъараллагу дурив?
Руцлацисса чарсрава
КьатIа тIий дур ттиркьюкьив!
Уртту-тIутIул кьанкь дусса
Хьхьем риртунни хIаллурдайх,
Ссавнилгу ссурулккуртта
Бувтунни ттул хъачIунттайх.
Ци бави на, ци бави
Вай арулла рангиран,
Хьунавав, къахьунавав
Караматсса каниш дан?!
Канишругу къадурну,
Бавив къакIулли кIисса?
Валлагь, вичIилусругу
Хьунссия лап ххаллилсса!
Агь, ци бави, ци бави
Вай арулла рангиран?!
Сунттул яннарду кунма,
Ххябуккавив – гьухъри бан?
Юхсса чалагъай давив,
Ххал хьума ххари уван?
Агь, ци бави, ци бави
Вай арулла рангиран?!
Я багьа къабищунна,
Я парчари къаданна,
Аруллагу аьламат
Инсантурайх дачIланна!
Ласияра, ххуй душрув,
Линтру бара лахъисса!
Ласи, жагьил бурттигьуй,
Хьхьури дува ххаллилсса!
БакIру кIяла хьу къужрий,
Зугу пашман машару,
Зунгу хьунтIиссар буван
ЧIюлусса бишай яру!
Циняв мюрщи оьрчIангу
Хьувча хIакьину байран,
Пишкаш банну гьарманан
Арулва рангсса кьалан!
Юх, вай ттул магьри бакъар,
Ми ттун хъамабивтунни.
ХIакьину ттул хъачIунттайх
Ссурулккуртта бивтунни!
* * *
На ва оьрмулуву къабяйкьиншиврул,
ОьрчIний ттухь чIявуну учайва ниттил:
«Аькьлу-духIин дусса хьун ччай бухьурча,
Ина хъуниминнах вичIи дилуша».
Цанни хъуниминнах вичIи къадишин?
Цу уссар зунттаяр хъуна хьуссагу?
Кьянкьа бацIан лахьхьин,
ссавур дан лахьхьин,
На бургара мудан ххира барзунттах.
* * *
Пахрулий бур кIалахIи,
ВацIлул зуманив ххявхсса,
Цийнур тIий байбишайсса
Ахир дакъасса вацIа.
КъакIулливав мурхьиран
Цуппагу бутайшиву,
ВацIлул зума-къирагъгу
Цамунил дувайшиву?
Таржума бувссар М-З. Аминовлул
