ЦIуссаккуллал школалун – Виричунал-летчикнал цIа

ЦIуссаккуллал школалун – Виричунал-летчикнал цIа

diet_10Муданма кунма, ххуйну хIадур хьуну бия школа байрандалийн: Виричунал оьрмулия бусласисса баннерду, стендру дия школалул лажинчIирттайн лархъун, дуклаки оьрчIру Виричунал суратирттащал ва тIутIащал кьюкьрай бавцIуну бия, лакрал лаххиялувусса исвагьисса душру ччатI-нисиращал хъамал хьунабакьин бувккун бия.

ЦIуссаккуллал байран хъун дан бувкIун бия Дагъусттаннал ХIукуматрал хъунаманал хъиривми Жяъпаров Рамазан ва Шарипов Шарип, республикалул бакIчинал полпред Аьлиев Аьлибаг, ЦIуссалакрал райондалул хъунама Айдиев МахIаммад-ХIажи, Дагъусттаннал Халкьуннал Мажлисрал депутат Мирзоев Зайнуллагь, Аьрасатнал Жяматийсса Палаталул член МахIаммадов Айгун, геологиялул элмурдал доктор Багатаев Рамазан, профессор Халилов АьбдурахIман, Дагъусттаннал лайкь хьусса строитель ХIажикьурбанов Сайдун ва чIявусса цаймигу бусравсса хъамал. Къиримнавагу бувкIун бия бусравсса делегация: «Сакский район» муниципал сакиншиндарал хъунама Россоловский Николай, мура райондалул администрациялул хъунама Мирошниченко Галина, мунил хъиривчу Сейдхалилов Делвер ва администрациялул аппаратрал хъунмур Россоловская Ольга. Къиримнавасса хъамаллурал бувсуна АхIмад-Хан Султаннул юбилей бюхттулсса даражалий Къиримнавугу дуллай бушиву, цивппа хъунмасса гъирарай бивкIшиву Виричунал буттал аьрщарайн биян. Шяраваллил жямат, учительтал ва дуклаки оьрчIру барча буллай, Айдиев МахIаммад-ХIажинал кIиц лавгуна Виричунал аьпа хIурматрай ябуллалисса варистал хьунтIишиву школалул дуклаки оьрчIру, АхIмад-Ханнул цIанин лайкьну дуклаки оьрчIан тарбиягу, куртIсса кIулшивуртту дуллансса хIарачатгу бикIантIишиву школалул учительтурал коллективрал. Республикалул хIукуматрал вакилтуралгу кIицI лавгуна га кьини ЦIуссаккулув дуллалисса куннасса давурттив Къиримнал ва Дагъусттаннал агьалинал дусшиврул гьанурду цIакь шаврил лишанну хьунтIишиву. Виричунал суратгу, цIа чирчусса чичругу дусса мемориал улттуя кIяласса пардав дуркьуна Дагъусттаннал ХIукуматрал вакилтурал – Рамазан Жяъпаровлул, Шарип Шариповлул, Аьлибаг Аьлиевлул ва Николай Россоловскийл. Ян Френкельлул макьандалийсса Расул ХIамзатовлул «Кьурукьру» балайлухун дуклаки оьрчIал ва шяраваллил жяматрал тIутIив дирхьуна Виричунал сурат дусса улттучIа. ЦIуссаккуллал школалул дуклаки оьрчI Султанов Батирханнул усттарну бувккуна летчикнахасса шеъри, мува школалул учительница ПатIимат Гавзиевал увкуна «ЩаращучIа» тIисса балай. Хъамал хIайран бансса балай увкуна Дагъусттаннал лайкь хьусса артистка ХIабибат Буттаевалгу. Школалул душваврал дурна къавтIаву. Ташвиш къавхьуну, мархь бищу байхту, паргалну къавтIун бивзуна Къиримнавасса хъамалгу. Миннайн тапшур бувна 5-мур классрал дуклаки оьрчIал хъазамирттай ми «АхIмадхановцынал» кьюкьлувун кьамул бувсса лишанну лачIунгу. Уттинин му аьдат дуссия Каспийскаллал 8-мур школалий. Ххувшаврил байрандалул кьини МахIачкъалалив Виричунал гьайкалданучIан бавтIукунгу, лачIайссия ми лишанну дуклаки оьрчIал хъазамирттай. Гьашину Ххувшаврил байрандалул кьини мура аьдат­рай «АхIмадхановцынал» кьюкьравун кьамул бувссия Ккуллал райондалул дуклаки оьрчIругу Ваччав, АхIмад-Хан Султаннул гьайкалданул чIарав. Гьаннайсса, хъуни хъанай дур республикалий «ахIмадхановцынал» дасттардугу. Хъунасса летчик лакрал миллатран ххирану ва бусравну ушиву исват хъанай бур мунал цIа абад дуван дуллалисса давурттайну.
АхIмад-Ханнул ссурахъил арснал, Сайдун ХIажи­кьур­бановлул, ЦIу­ссаккулувсса мероприятие къуртал дуллалисса махъ лахълай, барчаллагь увкуна республикалул ва райондалул хъуниминнахьгу, архсса Къиримнава бувкIсса хъамаллурахьгу.

 

Читайте также: