ХIакинтурал цIа дай оьруснал хIаммамрая, сауналия. ХIам­мамраву, инсаннал бурчул цийнна ласайсса дур ччаруллал даву. Цуксса инсан гьухъа итлай урив, муксса чIярусса гьухъайхчIин аьркин дакъамургу дуккайссар.

Мунийхтуну хIаммам инсаннан чара бакъа аьркинсса затри. ХIаммам бувкун инсан фитнесрал дарсирайн лавгссаксса шайссар; къюкI ришлашаву анавар дуккайссар, гьарцагу органначIан оь саргъунну биллан бикIайссар. Шиккува учин, муниятур къюкIлил къашавайсса инсаннан лахъи лаг­лан къабучIисса хIаммамраву. ЧIявуми мукIруну бур хIаммам буллалийни щин дуккан дайсса чяй хIачIлачIаву хъиншиврий. Амма хъиннура чIярусса чяй хIачIларча, чурх щинацIа хьуну, къюкIлил ришлашаву нирхирава дуккан бюхъайссар. Агарда ччаруллаву чартту бухьурча, щин дуккан дайсса чяйрду дурагу хIачIлан къабучIиссар.
Дур гьарцагу инсаннаву мяйжаннугу «шлак» — учин бучIисса аьгъушиву, гьа, май (жир), — тIий ур диетолог М. Гинзбург.
Гай лачIлай дур инсаннал лялуцIун, ганзликкурацIун да­къасса туннурдайнгу, мунийну инсаннай атеросклерозгу хъанай дур.
Яла нигьачIимур май дусса дур бурчул лувмур дакъа лякьлул куртIниву вивсса органнал ялтту дакьайсса (висцеральный жир) май. Мукунсса май савав шайсса дур инсаннай диабет, рак, атеросклероз, гипертония, инфаркт, инсульт шаврин. Му бакъассагу, махъсса ххалбигьавурттал буслай бур ва журалул майрал инсаннал настроениялийнгу асар биян буллалишиву. Вайннул стрессрал гармонну гьарза бувну, ххаришиврул гармонну чан байсса бур. Амма укун къа­ххуйсса «шлакирдая» бигьану ххассал хьун шайсса бур: диета дугьаврину ва личIи-личIисса упражненияртту буллай.
Цири бан аьркинсса бурчул лувсса май гьан даншиврул?
1. Чан дан аьркинссар аьгъушиву дусса продукты;
2. Канан аьркинссар чансса холестерин бусса дукия. Холестерин чIявуссар дикIуву, лагавриву, аьнакIул бурчуву, канакияра чIявусса балугъ, дурк нис;
3. Зузи бувара зула бювчIун- бишив. Мунийну 90% майлул чан шайсса дур;
4. Канакияра чIявусса клетчатка. Мунил холестерин чан байссар оьттуву. Клетчатка тIурча чIявуссар кIучIалттуву, (отруби) ччатIуву, ккурпардаву, хъиннува гречкалуву ва нехълул хъувхъулуву, ахънилссаннуву, уртту-щинаву, хIаллил ахъул­ссаннуву.
5. ЧIун-чIумуй дуллалияра чурх куклу бансса, чансса калорияртту бусса дукия канакисса кьинирду (разгрузочные дни).