Цакьнивагу бувсъссия, Ккуллал райондалийсса шяраваллаву хьхьичIава культуралул къатрину бивкIсса клубру кIурабаен буллай бушиву Аьрасатнал халкьуннал аслийсса культуралул центрдайн. Сентябрьданул 28-нний Къяннал шяраву дия кIицI бувсса иширан хас дурсса гьарта-гьарзасса тяхъашиву.
ХIажимурад ХIусайнов
Шикку дия шярава Хъун дяъвилийн лавгминнал сияхI чирчусса баннерду, шярава бувксса лахъсса къуллугъирттай зий бивкIсса чиваркIуннан хас дурсса стендру, шяраваллил тарихрая бусласисса суратирттащалсса мурцIу. Центрданул сахIналул лагмасса чIиртту чIюлу бувну бия, зунттал халкьуннал цIудихьулуву ва цайми кушурдаву ишла бувайсса ярагъ, манкьулатру дирхьуну.
Къяннал шяраваллил баргълагавал чулия урувгсса чIумал, хьхьичI бацIлай бия Лакку кIанттул зияратну хъанахъисса ВацIилу-зунтту. Бияхха цуппагу ца исвагьину чIалай. Ухссавнил чулий – Къимизу-зунтту.
Дия Къяннал шяраву ца пашмансса суратгу. ЧIявусса къатрай, инсантал якъахъанахъаврийн бувну, кьункьуллу дия. Инсанталгу кIичIирттаву, нажагьсса бакъа, бакIрайн багьлайвагу бакъая. Мунияту центр тIитIлатIисса тяхъашиврийн чансса инсантал бучIаврилгу на хъисвагу махIаттал къаувнав.
Га кьини Къяннал шяраваллил аслийсса культуралул центрданул къатравун бавтIун бия школалул учительтал, дуклаки оьрчIру ва шяраваллил интеллигенция. Центр тIитIлатIисса тяхъашиву дайдихьлахьишиву баян бувна ва центрданул хъунама Мусаев ХIамзатлул. Ванал махъ буллуна Къяннал шяраваллил тарихрая чан-кьанну бусан учитель МахIаммадов Рамазаннухьхьун. Ванал кIицI дурна шярава бувксса ххуй-ххуйсса инсантурал цIарду.
Тяхъашиврул сий дагьан дуллай, балайрду увкуна Ккуллал райондалул культуралул зузалтрал: ХIабибуллагь Кьурбановлул, РайхIанат ХIажиевал, Гулжагьра Рамазановал, Асият МахIаммадовал, Къяннал шяраваллил школалул оьрчIал ва цаймигу гьурттучитурал. Бувна чIиви-кьивисса ссувхIатгу.
Къяннал шяраваллил инсантал Центр тIитIаврищал барча бувна Ккуллал райондалул бакIчинал пресс-секретарь Хизриев Шамхалал ва цайминнал.
