Октябрьданул 13-нний «Черновик» кказитрал редакциялий хьунни «Убой животных и оборот мяса и мясной продукции в РД . Проблемы, пути и решения» тIисса темалийсса «Россельхознадзор» идаралул ккуркки стол.

БатIаврий му идаралул жаваблувсса зузалтраяр ххишала гьуртту хьунни «Роспотребнадзорданул», Шяраваллил хозяйствалул министерствалул, Машлул ва промышленностьрал министерствалул каялувчитурал хъиривчутал, цаппара районнал администрациярттал жаваблувсса зузалт, республикалул СМИ-рдал зузалт.

ХI. Аьдилов
«Дагъусттан – ризкьи ябаврил регион дур, мунищала архIал, чIявуми ичIаллил хIайвант-ятту, гъаттара бихлай бур цалла-цалла хIаятирттаву, бивххун хьусса ччюрк (отходру) экьиличлай бур кучардавун, неххамачIув, миккун, тиккун. Районнал ва шагьрурдал жямат гьалак буклай бур антисанитар тагьар хьун дуллай тIий. Цуксса хIайпнугу, чIяруми шяраваллаву, районнай бакъар ятту биххай кIанттурду (убойные пункты), арцу диялну дакъашиву сававну. Мукунсса кIанттурдал ялув бацIаву дуллай бур, дикI машай дуккан дуллалисса бизнесчитурай ва къуллугъчитурай аькIри дихьлай бур, административ жаваблувшиврийн кIункIу буллай бур, амма миннуя кумаг хъанай бакъар», — тIий бия ихтилатчитал.
Гьай-гьай, республикалий зий бур цалва-цалва ризкьи биххай кIанттурду бусса, базардавун дикI ларсун бучIайсса предприятияртту. Масалдаран, Нугъайннал райондалий «Боз Торгай» КФХ, Къизлардал райондалий – «Урицкий» дикIул комбинат, Буйнакскаллал райондалий – КФХ «Нур», МахIачкъалаллал дикIул комбинат. Амма ми Да­гъусттаннан къагьархха. ЛПХ-лул залуннан ххирану бацIанссар машина багьлух бувгьуну ризкьи биххан бувцуну гьан, яла базаллувунгу биян бан. Мунийн бувну, хIаятирттаву къулайри ризкьи биххан, амма мукунсса дикI ветеринар-санитариялул марцI-чапалшиврул чулуха щак бутлатисса дур лахъай азарду душаврил хIакъираву. Мунияту мукунсса дикI къабучIир оьрчIал садикирттайн, школардайн, азарханардайн, столоваярттайн, кафердайн ва хIатта базардавун, ветеринар-санитариялул экспертиза къадурну, хасъсса документру бакъа. Миккугу яттил-гъаттарал хханххардай бикIан аьркинни «бунияласса» мугьру, так мукунсса дикI бучIир дахлан, муштаригу дакI дарцIуну икIаншиврул, багьлух ласайсса дикI марцIсса, азар дакъасса душаврий.
Амма цама ихтилатчинал бувсунни, «О безопасности мяса и мясной продукции» тIисса Технический регламентрайн бувну, 2014 шинал майрал 1-нния шинмай ихтияр душиву ичIува бивхсса хIайвант машай буккан буллан. Гьаннайсса, бястру чIявусса бия.На буллуссия бувагу ца суал: «Циванни базаллуву дикI ххира хъанахъисса?». Мунин балжисса жаваб къадуллунни щилчIав.