ЦIа дуккан дувай ххуйсса, уздансса даву дурнугу. Чапалшиврул цимурца гъулутин дурнугу. Цукун машгьур хьурчагу машгьур хьунну, цIа дуккан дуванну, аваза бутанну тIий.

Щалла дунияллийх цIа дурксса Франциянал сатиралул журнал «Шарли Эбдолул» (муний МухIаммад Идавсил (с.аь.с) карикатурарду дуну ца ппурттуву биялсса аваза бувтссия му иширал), уттигу щалла дуниял цаятура гъалгъа тIутIи дувансса даву дунни: хьхьиривун оьвкьсса сириянал чIивитIул суратрай карикатурарду дунни. «Илчилул» хьхьичIмур номерданий Сириянавасса лихъачалтрал тема гьаз дурсса макьала дуссия, ми­ккура дуссия 3 шинавусса сириянал Айланнул суратгу. Нитти-буттащал жамилий ливхъун най унува хьхьиривун оьвкьун, Туркнал шагьрулийсса хьхьирил зуманив личин увсса алши бакъул сурат. Сситтул ва оьхIалшиврул хьхьирива къабуккайсса «Шарли Эбдолул» Айланнул суратрай, хьхьирил щатIай авцIусса Ися- идавсил суратгу дурну, «Ххачпарас щинайхгу занай буссар, бусурманнал оьрчIруми бюкьлай буссар» тIисса чичру дурну дур. Къундалийн агьну ивкIусса Айланнул суратрал ялув «Так близко к цели» тIисса (яъни мурадрайн иявай ливчIма) чичру дурну дур. «Шарли Эбдолул» автортурал танийва баян бувна цалла даврин къадагъасса темарду дурагу дакъашиву, идавсталгу, билаятирттал паччахIталгу, хIатта папа Римскийгума дащуй ишинсса ихтияр душиву, акъахьурча прессалул тархъаншивриясса хаварду оьванмасса варсагъру бушиву. Туну, апатI хьуну ивкIусса, 3 шинавусса бунагьбакъул рухI азурда дувангурив утти бучIисса? Гьай-гьай, «мурадрайн къаивнува ивкIума» ур 3 шинавусса чIивисса оьрчI. Ххуйсса оьрмулул хъирив най хьхьирил ца зумания тамунийн къаивсса. ДакI шиши дагьлан аьркинни микку му оьрчIал бивкIулул бунагь лавсминнал. Паракьатсса билаятру гьулусан буллалиминнал. УхчIинларайсса миграционная политикалул тарап дургьуминнал. Кьини дуркминнан яхьунсса магъигу дуллуну, узданну ччатIул парчагу булун къаччиминнал. Франциянал сатириктуран кьамулнугу, къакьамулссар я му оьрчIал буттан, я гъан-маччанан, я жунма, инсанталлу тIутIиминнан. ОьрчIал нинугу хьхьирил щатIаща ххассал къархьунавхьур, цукунсса дакI дикIантIиссар Айланнул буттал, ми карикатурардайн ябияйхту?
Кьамулнугу дакъар му сарказм чIявуссаннан. Ттигу оьттух, кьисасрах къанихну бур франциянал сатириктал, ца пух къадурну къапаракьат хьунну тIий бур, тIутIисса бур чIявуми. Бур сатириктурал чул бувгьуну, авай, ми Европар дащуй бихьлахьисса, Европанал политиктал-лажинлякъулт сававну оьрчIру литIлай бушиву иттахбищур буллалисса, ххачпарас-лихъачалт бакъа кьамул къабулланну тIисса билаятирттахь, лихъачалт бусурман бусса-бакъасса цукун кIул булланну тIий, зума цIухлахисса карикатурар тIутIиссагу. Бур, прессалул тархъаншиврия гъалгъа тIий бухьувкун, тархъанну махъ учинсса ихтияргу, ччимур карикатура дувансса ихтияргу дикIан аьркинссар тIутIиссагу. Амма кьарал, дазугу дикIан аьркиннихха жяматрачIа.
Щил цукун бувчIин булларчагу, къабувчIай ттун ливтIусса оьрчIал рухIру азурда дуллалисса «тархъаншивугу», мукунсса «искусствагу». Сатирикнал сатиралул кьаламрал байлшиву чIалачIи буван аьркинни цайми иширттаву. Масалдаран, агьали куннайн кув бичлачисса ягу думуницIа буллалисса политика ккаккан дувавриву.
ХIадур бувссар
ПатIимат Рамазановал