ЦIуссалакрал райондалул ОМВД-лул хъунама Садруттин Рашидовлул сипталийну, октябрьданул 7-нний РОВД-лул къатраву полициянал зузалт хьунабавкьунни имамтуращал. Му хьунабакьаврий гьаз бунни Сириянаву хъанахъисса иширттацIун бавхIусса масъалартту.
Гьуртту хьунни райондалул хъунаманал хъиривчу Гаирбаг Мусаевгу, райондалул прокурор ХIусайн Аьлиловгу. РОВД-лул хъунаманал бувсунни, ихтиярду дуруччай органнал зузалтрал ва рувхIаний идарарттал аьмсса хIарачатрайну, райондалийсса тагьар паракьатсса душиву, 2014-2015 шиннардил мутталий райондалий царагу терактгу къархьушиву, райондалия цаягу инсан Сириянаву хIукуматрал аьралуннащал талан лавгсса ишгу къавхьушиву. Гаирбаг Мусаевлул бувсуна террористуращалсса ва экстремистътуращалсса талатавриву гьанумур бияла бушиву профилактикалул даврихь, жагьилтуран ссаву ци буссарив бувчIин буллалисса, ми балардая байщун бувансса давурттив чIяру дуван аьркиншиву. ХIусайн Аьлиловлулгу бувсунни террорданийн къаршийсса пропаганда дуллан аьркиншиву, ИГИЛ-данувун жагьилтал кIункIу хьун къабитан аьркиншиву, щалла дунияллийсса терактирдаву тахсир бакъасса инсантал литIлай бушиву. Имамтурал ва участковыйтуралгу бувсунни цивппа, агьалинал рахIатсса оьрму дузал баву мурадрай, мудангу давриву дакI дирхьуну зун хIадурну бушиву.
