ДР-лул Шяраваллил хозяйствалул министерствалул ккаккиярттайн бувну, Дагъусттаннал хозяйстварттал ппиринж лакьлай бур. ЦIанасса ккаккияртту укунсса дур: ца гектардания ласлай бур 44 центнер, аьмну ларсун дур 3 азаллий 600 тонна ппиринжрал.
ХIаллил давуртту дурну дур 800 гектарданий. Дагъусттаннай ппиринж ххяххан баву – шяраваллил хозяйствалул приоритетсса масъала хъанахъиссар, мунил агьамшиву хъун хъанахъиссар импортозамещениялул программа дуз давугу хIисавравун ларсукун.
ДР-лул шяраваллил хозяйствалул министр Баттал Батталовлул бувсъсса куццуй, дагъусттаннал ппиринж нахIуссар цайми регионнай ххяххан байминнуяр. Му затгу хIисавравун лавсун, Аьрасатнал цайми регионнал жулва ппиринж ласайсса бур, цалвамур ппиринж цайминнан баххан хIарачат байсса бур.
Махъсса ппурттуву Республикалул ХIукуматрал кумаг буллай бур ппиринж бугьайсса хозяйстварттан субсидияртту итабакьаврийну ва щин дишайсса архру, чекру дакьин даврийну. ДукIусса шинал ппиринж бугьайсса чекру гьарза дурссар 4 азарда гектарданул, дургьуну диркIссар 13 азарда гектар. Гьашину тIурча ппиринж бувгьуссар 16 азарда гектарданий.
«Мюнпатсса АПК» тIисса приоритетсса проектрал хахливу яла гъансса шиннардий ппиринж бугьлантIиссар 20 азарда гектарданий, тичча ласавантIиссар 70 азарда тонна бакIлахъиялул.
