Октябрь зурул 13-нний «Дагестан» РИА-лул залдануву хьунни Дагъусттаннал МВД-лул ГИБДД-лул управлениялул хъунама Валерий Громовлущалсса 
пресс-конференция.
Андриана Аьбдуллаева
Пресс-конференциялий гьуртту хьунни аналитикалул даврил ва ххуллул мюхчаншиву дузал даврил отделданул хъунаманал кIанайсса МахIаммад Маммаев, Ххуллул инспекциялул отделданул хъунама Жабраил Сяидов, пресс-службалул хъунама ИсямахIаммад Султанов. ГИБДД-лул управлениялул 9 зурул лажиндарай дурсса даврил хIасиллу дуллалисса, му чIумул мутталий ххуллурдайсса тагьар цукунсса диркIссарив бусласисса ихтилат бунни Валерий Громовлул.
[audioplayer file=» [audioplayer file=»http://ilchi.beget.tech/wp-content/uploads/audio/andriana.mp3″ bg=»ff7f1a» leftbg=»ff7f1a» lefticon=»294781″ track=»ff1b2c» tracker=»ffff00″ text=»000000″ righticon=»294781″ width=»300″ rightbg=»408080″ volslider=»ffffff» skip=»ffffff»]
Ва службалул каялувчитал ччя-ччяни хьунабакьай журналистуращал цалла даврил хIасиллая бусан, яла-яла журналистурал кумаграйхчIин шупIиртал бикIу, бахьттагьалт бикIу, бала-апатIрая мюхчан баву мурадрайсса маслихIатру бан.
Ххуллийн бувкминнал мюхчаншиврул хIакъи-хIисав дуллалийни, чIалай бур тагьар буруккин бутлатисса, захIматсса душиву. Госавтоинспекциялул ци чаран ляхълай бивкIнугу, 9 зурул дянив (октябрь зурул дайдихьулийннин) республикалий сияхIрайн ларсун дур 1171 ДТП. Миннуву 360 инсан оьрмулуцIа хьуну ур, 1570 инсаннайн щавурду дирну дур.
ХьхьичIмур шинах бурувгун чIяру хьуну дур цирда ДТП-ттугу (26%-рал), ххишала хьуну бур миннуву щавурду дирмигу (30%-рал).
ДТП-ву оьрмурдацIа хьуми 5%-рал чан хьуну бур. ХIасил, ДТП-ву зарал бивсса 100 инсаннава 19 ливтIусса ур (хьхьичIмур шинал — 24).
Вай иширттал хIакъи-хIисав дурну, ГИБДД-лул зузалтрал хъуннасса къулагъасралун лавсун бур ххуллийн бувкминнал оьрмурду ва цIуллу-сагъшиву дуруччаврил масъала.
— ДТП-луву ивкIусса, ивщусса ца унугу инсан ухьурча, ГИБДД-лул чаран къалявкъуссар му мюхчан ансса, — тIий, цалва зузалтрай аьй ккаклай ур Валерий Громов. Ванал бусласимунийн бувну, Дагъусттаннай хьусса ДТП-ттан личIи-личIисса сававртту хьуну бур: шупIиртал анаварну най бикIаву (27%), цаннаяр ца хьхьичIун буклай, хьунив ххуллийн буккаву (24%), хIарчIун рульданух щябикIаву (3%), бахьттагьалтрал ххуллул низам къадуруччаву (19%).
Ххуллул низам къадурурччусса ишру аьмну 18%-рал ххишалану ашкара бувну бур. Биривну бур машинартту анаварну нани бувну бивкIсса 102991 (+35%) шупIир, цаннаяр ца хьхьичIун буклай, ххуллул низам лирсса 14172 (+5) шупIир, мукунма низамрава увксса 12447 (+6%) ахьттачу.
ХьхьичIсса шиннах бурувгун, чанну ашкара бувну бур хIарчIун рульданух щябивкIсса шупIиртал, 9 зурул дянив мукунсса 5017 (-6,4%) инсан ашкара хьуну ур.
Ххуллийн бувкминнал мюхчаншиву дузал даву мурадрай дуллай бур билаятрал, республикалул даражалийсса личIи-личIисса мероприятияртту. Гьарица нюжмардий ГИБДД-лул Управлениялул ва ДПС-лул строевой подразделениярттал дуллай бур профилактикалул давуртту республикалул цаппара шагьрурдай, районнай, мукунма яла чIяруну аварияртту хъанахъисса федерал ххуллул бутIрай.
Республикалул телевидениялул каналлай итадаркьуну дур ДТП-ттал хIакъиравусса, ххуллул низамрава бувксса иширттан ххуллу кьукьаву мурадрай виваллил иширттал органнал дуллалисса даврия, ххуллурдайсса диялдакъашивурттая бусласисса, мюрщи оьрчIан ххуллул низам лахьхьин даврил масъалартту гьаз буллалисса передачартту.
КIицI лавгсса 9-гу зурул дянив хьусса гьарица 13-мур ДТП-ву 155 балугъравун къабивсса оьрчIан зарал хьуну бур. Миннава 22 оьрмулуцIа хьуну ур. Махъра-махъсса ккаккиярттайн бувну, ва журалул ишру 19%-рал чан хьуну бур.
ХIакьинусса кьини Госавтоинспекциялул зузалтрал ца яла къулагъасралун лавсмур масъала бур ххуллурдай мюрщи оьрчIан бала-апатIру хъанахъаву. Мюрщи оьрчIащал ва школалий дуклакиминнащал дуллай бур ми мюхчан баву мурадрайсса личIи-личIисса мероприятияртту.
Хъинну ялув бавцIуну бур машинарттай оьрчIру бувцуну наниминнал ми мюхчан байсса мухIулттив ва креслорду ишла буллай бурив ххал буллай.
СияхIрайн ларсъсса ДТП-ву чIявусса ишру хьунабакьлай бур бахьттагьалтрайн машина щусса (26%).
Бахьттагьалтрайн машина щусса иширттал 73% цайва бахьттагьалтрай аьй хьусса бур. Ххуллурдайн бувкминнал мюхчаншиву дузал даву мурадрай ГИБДД-лул Управлениялул бувну бур «Скорость»», «Пешеход», «Тонировка», «Челнок», «Маршрутка», «Автобус», «Спецсигнал», «Мототранспорт», «Нетрезвый водитель», «Таксист»», «Ремень безопасности», «Иномарка», «Внимание – дети!», «Парковка» тIисса профилактикалул операцияртту.
Республикалул федерал ххуллурдай ДПС-лул личIисса батальондалул ва кIантту-кIанттурдайсса ОМВД-лул зузалтрал бувну бур «Каскад» цIанилусса 40-нния ливчусса профилактикалул операцияртту.
Жулла республикалийсса ДТП-тту хъунмурчIин куклу машинарттай заназими сававну хъанай дур.
Цинярда авариярттал 91% ми сававну хьусса дур. Миннува гьарица 6-мур ДТП шанна шинайн бияннинсса стаж бусса шупIиртал багьанану хьусса дур. ДТП-ттан багьана хъанай дур мукунна ххуллурдал тагьар. Ххуллул тагьар сававну 210 ДТП хьуну дур. Миннуву зарал бивсса 100 инсаннава 21 оьрмулуцIа хьуну ур. СияхIрайн ларсъсса циняв авариярттал 18% ххуллул тагьар, масала, аьркинсса кIанттурдай дайгьузанну, разметка дакъашиву, ххуллий чани бакъашиву, бахьттагьалтрансса ххуллу личIи бувну бакъашиву, багьана хьусса дур.
Укунсса ДТП-тту хьун къаритаву мурадрай, 9 зурул дянив ххуллул инспекциялул 376 административ материал щаллу дурну дур.
Ххуллурдайсса диялдакъашивуртту дукьан дан 784 тIалавшинна чирчуну дур.
— Циксса давуртту дулларчагу, жулва службалул давривусса диялдакъашивурттугу жун ххуйну кIулссар. Жу хIарачат буллантIиссару ххуллийн бувкми бала-апатIирттая буруччин, — увкунни цалва ихтилат къуртал буллай Валерий Громовлул.
Хъирив ГИБДД-лул управлениялул хъунаманал ва ванащал бувкIсса зузалтрал журналистурал суаллахьхьун жавабру дуллунни.
