Буршиял жяматрал агьулданун тачIав хъамакъабитантIиссар 2013-ку шинал шярава арх бакъа хьусса ххишала бакъа кьурчIисса иш, жямат бакI хьхьичIун дутан бувсса. Мукьа полицанал зузала бивтун увтсса, муницIунма бавхIуну 2 зузала ялагу оьрмулуцIа увсса. Муния шиннай 2 шин ларгунни.

Му иширах цума цукун уруглай ухьурчангу, чIумул цила чIалачIи бунни мунил мархри ча байбихьлай буссарив. Бия му иширая архсса жул жяматрай аьй-бювкьу дуллалиссагу. Жагь кказитрай, жагь укунма биялсса нааьнарал махъру бухIан багьунни жул агьулданун. Уттигу «Илчи» кказитрал 29-мур номерданий дия «Буккайвавли лакку улклул нааьналуща» тIисса макьала. Жяматралгу, миллатралгу лажин лухIи хьунсса тIул тачIав итакъадаркьусса Буршиян ми бухIлан бигьану бакъар. Бия багъишла битира учин аьркинссар жулва миллатрахь тIутIиссагу, ба­гъишла битивагу къаувкунни тIий аьйрду дуллалиссагу. Цинявннан ххуйну кIулссар, цийва цуппану цичIав къашайшиву. Щаллагу Буршияйсса аьйгу, жаваб дулай­сса даврий, жаваблувшиву цирив къакIулнахун шяравалу рутавур. Му тIайла бацIан бангу хъунмасса хIарачат був­ссар. Шяраву хъанахъисса диялдакъашивуртту дащуй дихьлай, диялсса батIавуртту, чичавуртту дурссар, ччарчан райондалул бакI дургьуначIан, прокуратуралийн, ччарчангу «Илчи» кказитрайн. Жуйсса аьй, мунийну гьашиву къадурну, гихунмайгу хъирив къабуккавур, щаллагу хIукуматрай низам дакъар, жущава ци бан шай­ссар тIутIинах вичIикъадирхьуну. ХIукуматрал гьарцагу кюрттараву низам дикIаншиврул, миннул ялув битлай бур жаваб дулайсса инсантал. Миккун кьувтIуну наними, цала бакIрайн лавсмурнияр, даврил жаваблувшиннанияр, цайми ишру щаллу буллан най бур. Му жаваблувшиву муксса лащин хьуну дур­хха, ци хьурчагу, къазрая щин кунна, кIунтI къалаяйми хьуну, цайра аьй дуллалинаягу, «кляузартту» чичлай, зун къабитлай буру тIий занай бия. Жаваблувшиврул кIунтI бакъанал дан багьаймургу къадайшиву, дурмургу багьандарансса, заралсса дикIайшиву цинявннан кIулсса зат бур. Гьарцагу шяраву хьусса баябуршивуртту куннищал кув дархIуну дур, яла къумамур – 6 жагьилсса адамина оьрмурдацIа аву. Щийри аьй? Миннайн бивтсса къачагътурай? Ми шяравунгу бувкIун, гьантригу бувну, цалла лухIисса даву дувансса шартIру миннахьхьун дуллунай? Къачагътуравун кIункIу увсса, розыскрайсса шяравучунал къатлух аякьа дикIан аьркиншиву щинни кIулну бикIан аьркинсса? Гьалаксса республикалийсса тагьарданийну, республикалул хъунаманал амрулийн бувну, гьарцагу шяраву дружинниктал бувчIара, личIлулшиву ххи дувара, букIлай, лаглагинах аякьа дувара куну бивхьусса буржру бачIвасса затран ккалли бувнайрив? Оьсса ккаччи инсантурайн хъапа тIий бухьурчан, аьй ккаччий дакъар, ккаччилсса буван харжгу ласлай авцIуманайри. Мунангу, мунал лагма лавгсса му марцI увултрангу му иш чанссавагу бювххун бивкIссания, судрал чIалачIи дурсса хъуннасса аьйгу, кьувкьусса танмихIгу бакъанугу, мивусса аьйлул кIунтI цайнмагу багьлай бушиву чIалай бивкIссания, ми цамур куццуй гъалгъагу тIунтIиссия, давугу дуллантIиссия. Багъишла битирагу учинтIиссия. Буршиял жямат ва жяматрал цачIуншиврул ккурандалул маслихIатрал совет хъинну начну буру. Цалчин, жула буттахъал, буттал буттахъал рухIирдал хьхьичI. КIилчингу, щалвагу лакрал миллатрал, ми ххаллилсса арамтурал гъан-маччанал хьхьичI, му хъин къашай щавулущал жулла шяраваллил цIа дархIуну душаврийну. Мунил цIуцIаву лагь данмур бангу жул жяматран тачIав хъамакъабитантIиссар.
Мукунсса иширтталгу жува нааьнарттая, цачIун шаврийн, му дарсну кьамул даврийн кIункIу бан аьркинссар. Таниннинну жува, цавай нааьнаралун бичлай, цавайннан гьайкаллу дацIан дуллай, му къювулуву бикIантIисса?! Буршиял жяматрайсса аьй жу ялув кIицI лагарду. «Илчи» кказитрал корреспондентътуралгу, щалвавагу жямат нааьнаралун бутай кIанайн гьаз хьуннин, миллатралгу, шяраваллалгу цIуцIавуртту чIалачIи дуллалинал чIарав бавцIуну, цила чIумал ми ялун личин дурну, кIилчинмур «исполнительная» властьрал лажин лякъушиву къадурну, ми дащуй дихьлай, хъин данмур булланшиврулли миннайн «мукьилчинмур власть» учайсса. «Илчилий» дурксса жул шяраваллил тагьарданиясса чичавуртту дуккирчан, му ххуйну чIалантIиссар…
Жула ужагърай питна сукку бувну, жува духIиндарал хъаттирала личин бувну, къурушрал ххяппулун бувтун, жулла хIукумат лиян дурну, жула ялув хIухчушиву дуллансса кьаст къакьадиртнан ччийкун зузаврил ахир тари дишин. Жуятува ттарду къахъанарчан, хIухчалт хьун ччимий бухлагантIиссар. КIуллул къатIуву дирхьусса нисирайн ххяв­ххун, гъара-таряшлив бувксса Ельцинятанал ахиргу дучIантIиссар. Иттав цIан дунал яру тIитIин буллай урхха жула президент В. В. Путин.
Ялун най дур выборду. Цукунсса журалийсса духьурчангу ми, жяматран къаччими битан къахьунтIиссар, так ттал бурчурдугу ливккун, ссахчIав къабурувгун, ци дуван дакIнийну най бурив, цуксса цалла жаваблувшиву дурчIлай бурив хъирив лавну бувчIин аьркинни. Миннаяр хъар хъанахъисса жулла щавурду цIулагавугу, хъин шавугу.
КьурбанмахIаммад
Кьурбанов,
«Бурши» ккурандалул
каялувчи
Кьамул бувссар жяматрал маслихIатрал советрай