Вай гьантрай му фермернал хозяйство ххал дуван муначIан бивунни ДР-лул ХIукуматрал Председательнал хъиривчу Шарип Шарипов ва Минэкономразвитиялул Управлениялул хъунама Шагьимардан Мудуев.

П. Рамазанова
Фермернал бувсунни хъамаллурахь тIутIул журарду бучIан бувшиву СНГ-лул билаятир­ттая, ми дякъия, замгьардая нигь дакъасса гьанна бушиву, цивппагу ччяни бияйсса, хъунива-хъунисса. Бувсунни так гьашинугума бучIан бувшиву жучIава республикалий уттинин къабивкIсса кишмишрал 60-хъул журарду ва гьашину тIутIул ххуйсса бакIлахъия дуллушиву. «Хъунмур масъала бур ххяххан бувсса тIутIи баххансса, мунияту тIутIулсса буллалисса мини-цехгу тIитIин ччай ура», — увкунни МахIаммад Эчиловлул. Мунал «Садраву» тIутIи бакъассагу, гьивчру, хъюртру, цIулит, бяъли, гьаннайсса, 300-нниха ливчусса жура ахъулссаннул бур. Найрдал пасекагу дур миккура. Вице-премьер Шарип Шариповлул бувсунни, фермернал бюхъу-хIарачат чIалай, му Дагъусттаннал БакIчиначIасса Агропромышленный комплекс­рал Советравун увчIушиву, мунал питомникравусса тIутIул журарду Дагъусттаннал тIутIал багъирдаву гьарза бавриха зун тIий бушиву, МахIаммад Эчилов цIусса гьанна ххяххан буллай, элмийсса учреждениярттал дайсса даву дуллай ушиву, мунал дуллалимур кьиматрай душиву.