Нугъайнал райондалийсса «Бозторгай» КФХ-лул базалий республикалул хIукуматрал хъунаманал хъиривчу Шарип Шариповлул каялувшиндаралу ххал бивгьунни Дагъусттаннаясса дикI Москавуллал базаллавун диян дуваврил масъалартту.
Микку гьуртту хьунни шяраваллил хозяйствалул министр Шамил БахIарчиев, Нугъайнал райондалул бакIчи КазимахIаммад Ямбулатов, цаймигу къуллугъчитал ва чIаххурайсса регионнаясса хъамал. Ларгсса нюжмардий мива масъалартту ххал бигьин Москавлив вице-премьер Шарип Исмяилович хьунаавкьуссия Аьрасатнал шяраваллил хозяйствалул министрнал хъиривчу Елена Астраханцеващал ва Москавуллал хIукуматрал машлул ва услугарттал Департаментрал хъунама Алексей Немерюклущал. Совещание дайдишиннин вице-премьер ва хъамал бивуни кутIасса чIумул мутталий бувсса , дикIулсса бай цехравун. Ттигъанну кунма бувсса му цехрал 40 инсаннансса зузи кIану бувну бур. «Бозторгай» хозяйствалул хъунама Мухтарбий Аджековлул бувсунни чIалкъавхьуну гиккува консервардал цехгу тIитIинтIишиву, туркнал предпринимательтуращал уртакьну бурчурдаха зунтIисса цехгу буллай бушиву. Совещаниялий гьаз бунни ЦIусса Зеландиянавасса яттил дикI Аьрасатнавун къадукIлан диркIния мукьах, Дагъусттаннаясса яттил дикI москавуллал базаллавун дуккан дувансса ххуллурдугу гьарза хьушиву, сантгу дагьшиву. Мухтарбий Аджековлул бувсунни, дикIул продукциялул упаковка ва расфасовка тIайлану, дагьайкун дуван лахьхьиншиврул пишакартал стажировкардайн тIайла бувкшиву, Москавуллал, Самаралул ва Санкт-Петербургуллал машлул предприятиярдащал кьутIи дурну зий бушиву. Шяраваллил хозяйствалул хъунама Шамил БахIарчиевлул бувсунни хIакьинусса кьини регионналий бакъашиву хъунисса машлул сетьру дикIул щаллу буллан кунмасса хъунмасса убойный цех, ца «Бозторгай» личIаннин. Бувсунни мюрщисса цехру цащава бювхъусса куццуй зий бушиву. Вице-премьер Шарип Шариповлул совещаниялул хIасиллу дуллай, чIуручIаву дунни Нугъайннал райондалий ччясса чIумул мутталий, ттизаманнул журалийсса, хъинсса убойный цех бувансса инвестор увкшиву, кьуниясса районнаясса ятту-гъаттара бусса кIанттай бувсса му цехравун ми районнаясса агьалинащагу дикI дуллан хъанай бушиву. Бувсунни москавуллал базаллаву Дагъусттаннаясса дикI кьиматрай душивугу ва му кIану хIисавравун лавсун сантирай зун аьркинну бушивугу.
ПатIимат Рамазанова
