Бухзаманнай Аьрасатнал паччахIлугърай ца яла аьвзалзаманнул ва Ккавкказуллал бусурманнал ца яла караматсса мизитрал ца хъуннасса сурат дан дакIнийн багьсса ттуща гьич цукунчIав му зат щаллу бан къабювхъунни.

Бухмур шагьрулул цIа ларгсса махIлалийсса къумасса ва бавкку-шавккусса кIичIиртту гьарта-гьарзасса панорамалувун багьан бангу къабювхъунни.

Ттун багьунни Нарын-Къалалийн гьаз хьуну, лелуххант бакъа гьаз къашайсса лахъшиврия тIитIи-гъитIи лавгсса шагьрулух тамаша бан. Най буна ттул итталун багьунни хIаятраву хъунисса ттуршрахъул шинну дусса мурхьру ххявхсса Жумяъ-мизит. Вай бур караматсса, ттуршрахъул шинну хьусса Жумяъ-мизитрал ккаккиялун ккаллийсса чинарданул мурхьру. Цаннияр ца бюхттулсса ххюва мурхьирал вив лавсун бур мизит­рал къуппа. МурхьирдайхчIин мизит чув буссарив кIул хъанай бур къалалия бакъа шагьрулул гьарцагу чулуха.
Къалалия бувчIун, бавчура мизитрал чулинмай. Бувхра Жумяъ-мизитрал тIивтIунмасса азварданувух. Шикку бур щаллусса архитектуралул ансамбль-Хъунмизит, мадраса ва хьулу-чIавахьулттив бусса личIи-личIисса цаннил ца хъиривсса къатри.
«Хъунисса чинарданул мурхьирдавусса ва дяниву хIавз бусса, чарттан даркьусса, гьартасса, мукьмурцIусса хIаят мизитрал хьхьичI тIитIин був­сса бартбису хханссар», тIий 1836 шинал чичлай ивкIсса декабрист, чичу Александр Бестужев-Марлинскийл Жумяъ-мизитраясса махъругу хIакьину мукунма бусса хханссар.
ХIаятравун бувхсса ттул къулагъас га хIалатравура кIункIу дунни алвагьну гьарцагу чулухуннай къяртри итадаркьусса, гуж бусса, девтал кунмасса чинардал. Аьлимтурал ххалбигьавур­ттайн бувну, вайннува мукьуннин цимирагу 100-хъул шинну хьуну, так га цаннин 50-ксса шинну дусса дур.
Мурхьирдалу бур ахьттачу, хъамаличу кIирисса бургъила ххютулу ххассал ан кунма був­сса щябикIансса кIанттурду. Ка цурда кIункIу тIий дур гайннул ссихI ххал бан, аьвзалзаманнул чичрурду дуккин ччисса кунна. БакIраву хIасул хъанай бур вайрихха ттуршрахъул шиннардил хьхьичIсса тарихрал иширттал бардулт тIисса махъру.
Баргълагавал чуллайсса чинарданул мурхьирдал ххуйшиврия бувсун бикIай чIявусса шаэртурал, чичултрал цалва произведениярттаву.
Жумяъ-мизитрал хIаят­равусса чинардугу Берлиннайсса Кайзер пялут, Болгариянавусса Байкушев тIисса ттарлил мурхь, Константиново тIисса шяравусса хьхьирилул мурхь, МГУ-лул ботанический багъравусса лиственница кунма аьрасатнал миллатрал аслийсса, щалва билаятрал ирсирайсса тIабиаьт дуруччаврил Советрал цала ургъилданулун лавсъсса гьайкаллан ккаллийссар. Чинарданул мурхьирдал чIарав дацIан дурну дур «Памятники живой природы» тIисса чичрулущалсса ула.
Аьвзалзаманнул Дарбантуллал чинарду мубараксса мурхьирдан ккаллийссар. Вайннул къяртри кьукьин къабучIиссар. Гъаргъун щяв кьатI хьусса къярт­ри дартIун, аьркиннийн ишла дувайссар. Дарбантлив яхъанахъисса гьарцагу инсаннал мурхьирдахсса ургъил-аякьа ляличIисса дур.
Жумяъ-мизитраву зузисса Фархад Аьлиевлул бусаврийн бувну, аьрабнал, парснал каялувшиврулу бивкIсса вай аьла­матсса мурхьирдах бурган бучIайсса бур щалагу Ккавкказуллал бусурмантал, му бакъасса чил хIукуматирттаягу.
Шичча нанисса гьарнал цала-цала ужагъирттайгу дикIувча тарихрал лишансса вай чинарданул мурхьирдал рухI тIисса кунма гьайчалттан кIанай ласайсса бур цащалва вайннул чIапIив.
Ттинин мяълумну чинарданул мурхьру щил бувгьуссарив кIул бувну бакъар.
Цания ца бусалалийн бувну, мурхьру бувгьуну бур тIар XI ттуршукулий Дарбантлив яхъанай ивкIсса хъунасса аьлимчу, шариаьтрал ва тарикьатрал имам Абуль-Касим аль-Джунайд аль-Багъдадинал. Цамур бусалалийн бувну, мурхьру бувгьуну бур учай тIар мизит бувсса архитекторнал. «Мизит яхьуссаксса, мурхьругу личIантIиссар», увкусса га архитекторнал махъругу мяйжаннугу Заннан бавсса кунмасса иш хьуну бур.
Вай чинардал мяъна ххютулун ва ххуйшиврун бакъасса, гужсса мархри бусса вайннул хъунмур мяъна цамур иширавугу дусса дур.
Атилшиву ххирасса чинарданул аьрщарава цIупI куну щин ласайну тIий, мизитраву ттинин цалагу чIирттай, чIанкъатлуву хъатру хIисав хьуну дакъар. Аьрщи сукку хьусса чIумалгу цаннивух ца кай-кай хьусса мархрал мизитрал лувсса аьрщи цанния ца руцан къариртун дуруччайсса дусса дур.
Мурхьирдайн барчаллагьрайсса Дарбантуллал халкьуннал шиная шинайн вай киражрай хIулувхIуну, мурхьирдай хьусса ххунтIри махру рирщуну лакьлай, ургъилданий бикIайсса бур.
Цаппара шиннардил хьхьичI ца чинарданий хьуну дур 3 метралул куртIсса хъуннасса ххунтIа. Шагьрулул халкь бавтIун, хъуниминнал маслихIатрайну, луххал ацIвахъул дарвагру бивчуну мивун, ялтту мах даркьуну дур. Муния махъ мурхь цIулавгун, гава бивкIсса куццуй ялун увкIманал яру ххари банну бур.
ТIун бикIайхха, машрикьуллал чинарду кIиазардаксса шиннардий яшайссар. Дарбантуллал ва Жумяъ-мизитрал «къаралчитурангу» булунхьуви Заннал мукун лахъисса оьрму. Халкьуннавугу вайннухсса ччавугу, мюхтажшивугу, вайннух дуллалисса аякьагу хIисав дуварча, ай, балики, мяйжаннугу мукун хьугу-хьун.
«Дагестанская правда»
кказитрая
хIадур бувссар
З. АьбдурахIмановал