Диялсса чIунгу, нягу, оьгу зия бувайсса «Фейсбук­рал», цаймигу социал сетирдал кунна, дур ца багьа бищун къашайсса ххуйшиву: ххуйсса дус­тал лякъаву. Мукун лявкъусса дус ия ттул Ваччиял шяравату­сса, Германиянаву дуклакисса, Кьурбаннул арс Маккаев Шарип (Франц Граф).
ПатIимат Рамазанова
На мунащал кIул хьуссияв Дагъусттаннал гимн даххана дуваврил аваза гьаз хьусса ппур­ттуву. Ширвани Чаллаевлул гимн даххана дуван аьркинссар тIисса тарап дургьуминнал ца яла гужма муттаэ ия Шарипгу. Му гимн даххана дувай гимн дакъашиву исват буллалисса цIакьсса хIуччарду буцлацисса мунал аькьлу бушиврий, цIакьсса ва куртIсса кIулшивуртту душиврий хIайран хьуминнавух нагу бу­ссияв. Лажинлякъулт гимнрал хIакъираву варсагъру буслай сукку шайхту, сивсуну аькьлулул, интеллектрал къалхан хьхьичIун дугьайва Шариплул. Европанаву яхъанахъисса да­гъусттан журналистка Зарема ХIасановахь ия Шарип: «Зарема, вы умный человек, неужели не слышите душу Дагестана в музыке?» — тIий. «Душа Дагестана» тIисса калима лакку мазрайн дуцлай, мунил мяъналул кици зия къахьуншиврулла дусса ку­ццуй ритлатиссагу. Гьаннайсса, чIявусса лакрал къуллугъчитураву, чиваркIуннаву дакъасса чувшиву дусса Шарип гимнрал гужсса чIарахацIу ия. Ттун му уссу куна ххира хьуна. ХIайп, Дагъусттаннайн ссил хъатIийн увкIсса ппурттуву къавхьуна Шариплущал хьунабакьин. Лак­рал ххаллилсса драматург, шаэр, «Илчи» кказитрал цалчинма редактор Гьарун Саэдовлул 120 шин шаврил юбилей дуван чялиш бувксса Ваччиял активистуращал «Илчилул» редакциялийнгу увкIссия Шарип. Кказитрал хъунама редактор Качар ХIусайнаева бия, Шариплул аькьлу бушиврул цуппагу хIайран бувнав, интеллигентныйсса, гьунар бусса, авурсса, скромныйсса, чIявусса мазру кIулсса жагьил ия, лакку мазгу хъинну кIулсса, цив,оьрмулул хъуними, буссияв Шариплухь, ина кунма итххявх­сса жагьилтурал кIунттихьри Дагъусттаннал бучIантIимур бусса тIий. Лакрал радиолул редакциялул хъунмур Тамара Закарьяевал му кьини рирщу­сса суратру дур «Фейсбукрай». ХIайранну бия Тамара цуппагу Шариплул итххяххаврия, мяърипат душиврия ва, яла-яларив, ла­кку маз ххуйну кIулшиврия. «Шариплущалсса переписка ккалай, мунан лакку маз ххуйну кIулну бушиврул цIуницIа махIаттал бунна, му ттучIан «вийнгу, вин ххиранайнгу къащунсса баргъ зунттул хъачIниха къабукканнав», — тIий чичлай ур, тIий бур Тамара, Шарип иттату иттав учин бумур учайсса, тIайламур ччисса, тIайламунил цIаний цIаравун ххяххан хIадурсса, хIакьсса чувнал хасиятру дусса ия тIий. «Фейсбук­рал» Шариплул «Заметкарду» тIисса лажиндарай «Ххуйшиву лакку мазрал!» тIий чивчуну бур. Миккува бур шеъри :

ЦIуцIаву дур ччаву,
хъин дан къашайсса,
Ялув авцIуссаксса,
оьдикIлакIисса,
Дакъакьай дукралух
ишттахI бутлайсса,
Цинма заралмунийн
кIункIу тIутIисса.
Ца хIакин уссия ва азаруннил,
Ургъил байсса –
мугу ттулла кIулшия —
Чивчу дарув къабай,
куну, лавгунни,
Нагу кьаивтунна
духIлай ва къия.
Ттун – ца чаран бакъа
ливчI къашайшалан —
Къалякъай хIакинтал,
бакъар даруртту;
Аькьлу-кIулшилийнгу
дакъар вихшала,
БакIравун къансавсса
буххай щугълурду.

Вар, ина чани ххай,
лявкъунна цIан хьхьу,
ЛухIи бакъахьунссар
вияр дужагьгу.

КъакIулли ва назмулул автор цува Шариприв, ягу цамарив, ягу таржумарив. Дунияллул поэзия щалва кIулсса инсангу икIан къабюхъай, дакIнийхтуну мукIру хьунна, къакIулли ттунгу. Тамарал цIувххуссия тIива, вилва шеъририв кунуча, тема даххана дурна тIива. ХIатта Шариплул шеъри бакъахьурчагу, мунан ххирасса шеъри хIисаврайвагу мунаясса макьалалуву шеъри бишаврия щинчIав зарал бакъар. Буниял­ттунгу, ххуйшиву, пасихIшиву, бюхъаву лакку мазрал!
Европанаву яхъанарчагу, лакку мазрахсса ччаву хIурагу къадурсса, хьхьара хьунгу къадиртсса Шариплул чулухунмай циван хIурмат къабагьанссия лакку маз ххираминнал? На «Илчи» группалуву чивчуссия, хIакьину укунмагу гьарца чулуха лакрай ябацIу буллалисса чIун дур, ттун хас къабизай лакку инсаннай аьй дуллалисса гъалгъардавух лакгу чялишну хIала буххайшиву, жула яхIлил къакьамул бан аьркинссар ла­ккучунайн щилтагъну увкусса махъ, жува мудан къабитайнахьгу «битира» учин бюхълай бивкIссару, уттиния тинмайгу мува бюхъулий ша ласланшиврул куннал кув бувгьуну бикIан аьркинссару тIий. МарцIну лакку мазрай, ца гъалатI бакъа, пасихIну, усттарну, бюхханну чивчуна Шариплул: «Вил жан-даража лахъ бивуй, ПатIимат! Буру жува мукунсса, амма я лахьхьу, я хIакьину бакъару жува куннащал кув ччалаччи хьусса. Жулва миллатрал цIа дурксса ва хIурмат бусса инсантурал, му масъалалул ялув пикригу бувну, му иш ххуйнин буккансса ххуллу лякъинсса умуд бур». ХIакьину кIиссурттай буккин хьунуксса бур укун цалва пикри марцIну лакку мазрай бусангу, чичингу шайсса жагьилтал. Гьаманки, цIакьсса ва куртIсса кIулшивуртту дусса, аькьлу бусса, ччимур темалия вичIи дирхьуманан гъира багьанну ихтилат байсса, гьунар бусса Шариплул мува даражалийсса дустал бия. Миннавух бия поэзиялия чан-кьаннувагу хавар буминнан Аьрасатнаву ца яла гьунар бумур шаэр бушиву бувчIусса Миясат Муслимова, щалагу Ккавкказнаву машгьур­сса ва кьиматрайсса Дагъусттаннал халкьуннал артистка Лариса ХIажиева ва цаймигу цIанихсса инсантал. Германиянаву жула Шарип ятIа-тIар бакъа акъа хьушиврул хавар баяйхту, Заннайн лабизлай бивкIру жу циняв, Качар Абачараевнал тIийкун, «миллат машгьур бансса арсная» махIрум мабуваракьай жу тIий. Къабаяйхьунссар кувний дуаьртту, жунна цуксса бавну ччарчагу…Бявкъусса хаварданул микIлачIун бунну, къума-банд лаган бувну ливчIунну: чил канил лавмартну оьрмулуцIа увну лявкъунни жула оьвхъусса, авурсса, гьармуниву итххявхсса ва аькьлу бусса Шарип. Къаурувччуну ур инсан дунияллул цавагу мурцIний. Миллат лавай бан, дуккин, кIулшивуртту гьаз дан Германиянавун лавгсса Шариплух оьхIалшиврийсса бивкIу ялугьлай бивкIун бур. Ниттил Жавгьаратлул къаучирчагу, хIайпкьай-хIайп, Шарип, вил мусил бакI…ХIайп 29 шинаяр гихунмайсса оьрмулул кьисмат кьувкьуну лякъаву вин.
Шарип зий уссия Москавуллал адвокатътурал шагьрулул коллегиялувугу, ПаччахIлугърал Думалуву… Му ца яла итххявхма юристри, куртIсса кIулшивуртту думари, аькьлулул кьуллари, энциклопедияр цува жагьилнугу, тIун бикIайва му кIулми. Мукунсса инсантурацIа хьуний, лухччалла лухIи лархсса асар багьай чурххавун. ЦIанакулгу мукунсса асар бур, уссу Шарип. Мукьавух гьузуй чIалай дур лухIи лархсса лухччинийх, лакку тIутIивгу ритлай, нанисса вил къаралти.
Цуксса яхI булларчагу, лялиян бан захIматсса бивкIулул кьурчIишиву кIидачIлай буру вил ниттищал, ичIувацириннащал, гъан-маччанащал, дустуращал.
«Аьжаивну инсантал ца­чIанма кIункIу буллали­сса тIилисин бусса, энергетика гужсса, муницIухва цукуннив пашмансса яруннищалсса жагьил ия», — тIий бур ттулгу, вилгу дус Тамара Закарьяева. КъакIулли, уссу, Шарип, ссихIиргу, тIилисингу ссаву бивкIссарив, амма ххидунни ина жул дакIурдиву ятиншиврул дарагу, яла къалагайсса кьурчIишивугу, къуркъасса къювулул дус хьусса къащигу.