Мархри
Дагъусттаннал зунттал щархъаву яла хъуннамунин хIисав хъанахъисса Ккуллал шяраваллил жяматраву буссар 7-8 хъуни тухумру, цивунгу буххайсса 120-хъул агьлурду. Ми агьлурдаву бусравсса кIану бугьайссар Кьарахъиял тухумравун буххайсса Аьйша Разухъал агьлулул.

Аьйша Разухъул Ккулув хIи­сав байссар чантI увкуминнал, цIумуничIан, кIулшивручIан, культуралучIан кIункIу тIиминнал цану. Ларгсса ттуршукулул 30-ку шиннардий Аьйша Разухъал Султаннул арс ХIажимахIаммалул, Москавлив «Коммунистический университет народов Востока» бувккуну, шяраву цалчин лахъсса кIулшиву ларсъссар. Гайра шиннардий, Саратоврай дуккавугу дурну, цалчин шяраву инженернал касму ларсъссар Аьйша Разухъал Оьмардул арс Жамаллул. Тиккува финансовый рабфакгу бувккуну, лавайсса даражалул бухгалтер хьуссар Жамаллул уссу Мусалав. Двигательстрой (цIанасса Каспийск) буллай байбишайхту, кIиягу уссу микку зий ивкIссар: Мусалав – хъунама бухгалтерну, Жамал – хъунама инженерну. Бусалардавун багьсса 8-мур цех бувмагу, хIакьинугу зийннасса Ачи-Су-лия Каспийскалийн щин дуцлацисса водопровод дурмагу Жамалли.
Аьйша Разухъал Султаннул арс МахIа Ккулату хьхьичIа-хьхьичI хьхьирил хIаписар хьуссар.
Аьйша Разухъул хIисав байссар багьу-бизулуву, тIул-тIабиаьтраву хIал бавкьусса, шавхьсса агьлулун.
Ялагу, Аьйша Разухъул ирсирай нанисса коммунистъталли, патриотъталли. Цивппа оьтту-ттурчIавух буттал кIанттухсса ччаву дуртIусса патриотътал бушиву миннал исватну ккаккан бувссар Буттал кIанттул цIанийсса Хъун дяъвилувугу.
Му тасттикь буллалисса чичру дайдишин ччай ура Ватандалухлу оьрму шагьид бувсса ттула бу­ттаятугу, ттуятува, дяъвилул сасан дурсса, кьянкьа-кьурчIисса ттулла оьрчIшиврияту ва чаннасса хияллайн мукIрусса жагьилшивруятугу, му патриотикалущал ва ватандалийн дакI тIайлашиврущал бавхIусса цаппара ххуттардия.
Ттул ппу Абакар, Аьйша Ра­зухъал Султаннул ххюя арснаву дянивма, ивкIун ур зирангсса, итххявхсса ва личIлулсса жагьил. Ккулув цалчинми комсомолтуравух ва колхоз дувултравух ивкIун ур. 20-ку шиннардий Гьанжилий Дагъусттаннал бурттигьалтрал эскадрон буллалисса баяйхту, лавгун ца шинайсса аьрали къуллугъ лавхъун бур. Зана хьуну махъ, Ккулув зунттал районнай цалчинминнувух нигь-нис дай завод буллан байбишайхту, Ленинградрайсса накI-дикIул институтраву дачIи шинайсса курсругу бувккуну увкIун, 1937-41 шиннардий ганил мастерну, яла директорну зий ивкIун ур. Дяъви байбишайхту, аьрали хIадуршинна дунувасса ур тIий уцлан икIавай, заводрай цама касмучи къаличIлай ур тIий, зана итавайгу бивкIун, ахиргу 1942 шинал ноябрь зуруй увцуну ур. Амма аьрайн уциннингу му чулухунай оьна къаивкIун ур. Ккуллал призывниктурал «Ворошиловский бурттигьалтрал отряд» дайхту, ца взводрал командирну ивкIун ур (бурги буттал документирттаву ляркъуну на ядурсса кIа сияхIрах). ХIадурнувасса боец, уцайхту, лахъи къалавгун, фронтрайн тIайла увкхьунссия, 1943 шинал февральданий ятIа-тIар бакъа акъа хьуну ур.
Дяъвилул чIунная, дяъвилущалсса ттулла арардая ци чиви? Дяъви байбишайни ттун диркIун дур 5 шин, дяъви къуртал хьувкун – 9 шин. Къаувкуну личIи цукун ацIава, му бала-мусиват ттул оьтту-ттурчIавух, къюкIливух, щалва оьрмулувух лавгун бухьувкун? Ппу фронтрая къазанаикIарчагу, ганал бакIрачIан бувкIмур кIул хьуну, хIатта гьав дусса кIанугума кIул хьуну, тиккун ивну аьпа бан кьисмат хьунан – ца хIасрат. Ппу фронтрай ятIа-тIар бакъа бат хьусса, буттах мякьну, учIанссар, лякъинссар тIий хьул къакьукьлай, гьарца хьхьуну ппу увкIун макIра ккаклай, чантI увкуну, къалявкъукун, къащилул аьтIий – кIаралу мукьал атил буллай оьрчIшиву ларгсса на кунмаминнан – ацIра хIасрат! Вай ттул къюкIлийсса, оьрмулухун оьттул руцлайннасса аьшру. Амма хъун дяъвилул аьшру кьадиртссар ттул оьрмулул жегъирдавугу, бяйкьу-шайкьюрдавугу, хIатта чурххал базурдайгума.
Оьрмулул жегъирдая тIурча, Хъун дяъвилул, мунищалсса бу­ттал ва буттал тухумрал арардал агъулул на нава профессиональный аьраличу – хьхьирил хIаписар шавай ливчIссара. Иш хьуна укун. 1948 шинал, на 6-мур классраву ккалаккисса чIумал, хар-хавар бакъа отпускрай увкIуна буттауссу Хьхьирил МахIа кулпат Рабиятлущал. Ияча ца аьнтIикIа, ца къуццу-къатIа, ца гьайбат! КIяласса хьхьирил хIаписарнал кьяпа, лухIисса китель, кIяласса гьухъуйх бавхIуну лухIисса галстук, чулухун руртун ишттахIсса финка! Шяраваллил агьлу, яла-яла оьрчIру, я батIин хъанай бурив! Та чIумал МахIад ия Севастопольлайсса (ягу Батумрайсса?) Нахимовский училищалул начальникнал (ягу хъиривчунал?) къуллугърай, цувагу 2-мур ранграл капитаннал (подполковникнал) чиндалуву. Буттауссилгу, ниттилгу, ттулагу маслихIат хьунни на Нахимовский училищалувун акьин, хьхьирил хIаписар уван. Ххарил лехлай нава ци уссара, мяшшиву кьюлтI дан къахъанай чIунархIал оьрчIру ци буссар!
ХIадур барду циняв документру. Гьунттий бачайсса маркIачIанмай щябивкIру хъинну бикIулул мажлисрай. Буттауссил ХIажимахIаммадлул ххуллухъиндарал махъру куну, ххира буттарссу Къиза дахьра калима дуллан зума дахъайхту, бавал ца вев кунни цакуну: «Ал на авлия хьуссарав кьай! Ал ттул бакIрайх ттархь рищунсса къаивкIссарив? Ттул талихIгу, хьулгу ва ца оьрчIал тIинхь лирчIун, вагу хьхьичIа ларсун ттул ци байссар, на чун ххяххайссара!». Якьама хьунни буттарссугу. «Жу жувалурув?» — тIий аьтIий ххяв­ххунни ссурвал – 7 шинавусса Саидат ва 10 шинавусса ТIагьират. Ванийну къуртал хьуна мудан щин ххирасса, нехха-ратIава атIин къашайсса ттул хьхьирил хIаписар шаврил эпопея!
Дяъвилул шиннардий куртIсса мяъналул балайрду чIявуя. Балайрду, шеърирду ххирасса на ми цикссагу ккалан икIайссияв, тIун икIайссияв. Яла-яла миннува сийлувун багьуна ХIадис ХIадисовлул чивчусса «Дяъви» тIисса назму:
Дурсса дакьавугу лекьан дуруну,
Вирттал ЯтIул аскар
сан бакъул бувну,
ЦIан-чаннав кIюрххицIун
ялун ххявххуну,
Гитлердун кьаст хьуна
ласун цакуну.
Вил къатта ччуччивуй,
да къачагъ Гитлер!
ЦулкIлул хIиллалийну
хIадургу хьуну,
Жиндрал ккаччил кунма
махъа хъап куну,
Совет Союзраяр
ххув хьунъяв хиял?
Я ляпI чин къабайсса,
чурх хIучI къачайсса,
ДакIнив чувшив дусса
Совет халкьуннал
Чаннаннил цIа дусса Сталиннуя
Чувшиврул тарбия
ларсшив къакIулав?
Буслан бикIай бугьарами, ттунмагу дакIний бур, я школалий, я клубраву царагу байран, тяхъашиву къалагайссия тIар чIиви декламаторнал кIа «Дяъви» къабувккуну. Ца чIумал мукунсса байран дуллай буру зунттавусса яттикъушлий. Ттулва «Дяъви» буккин ттуйн учир дияйхту, цинявннан чIаланшиврул, на ацIан увра хъунмасса парачуй. Жушравун агьну вев-шев тIисса на, кIа «вил къатта ччуччивуй, да къачагъ Гитлер!» тIисса кIанай, муданна кунна, ка гужну палцI дурхьунссия, ца оьсса, загълунсса тула ххявххун, на увтун, хIухчалт цайнма цивппа бучIаннин мадара хIунку увнав. Щаву хъин къахъанай хIал хьуну бивкIссар перевязкарду, дарурду буллай. ХIакьинусса кьинигу кIа дяъвилул «идеологически фронтрай» хьусса щавулул аьш дуссар ттул киямур бартканий.

Мукьра кIусса оьсса шин
Дяъви байбишайсса чIумал Аьйша Разухъал наслулуву тур дугьан шайсса оьрмулуву бивкIун бур 16 чиваркI (15 — шамилчинмур никираясса, 1- мукьилчинмур никираясса). Гайннава хьхьичIава аьрали къуллугъ бувсса, лавхьхьунмасса (обученные) ялув кIицI лавгсса Султаннул арсру Абакар ва МахIа, Оьмардул арсру Жамал ва Мусалав, мукуна Шуаьйл арс ХIажи. Яла цаннал хъирив ца лавгун ур ххюя цаймигу: Мамайл арс МахIаммада (Сери МахIаммада); Оьмар цува ивкIуну махъ увсса, буттан цIа дирзсса шамилчинма арс (шиннугу хъуни дурну, лавгун ур оьрмулул 16-17 шинаву, цал уссурвал душманнащал талай, цув шава циванни, тIий); Исмайл арсру МахIму ва Мута, Султаннул арснал арс (Мяммал арс) Аьвдулкьадир (кIава Оьмар куна, шинну хъуни дурну, 16 шинаву). Дяъвилийн къабувцуну ливчIун бур Аьйша Разухъаясса 6 чиваркI, миннавух – Султаннул арс Мямма (оьрмулулгу угьарану, колхозрал председательнал хъиривчунугу уну). Дяъви байбишайхту уцара тIий аьрза буллуну буна, къаувцуну ур Султаннул кIилчинма арс ХIажимахIаммагу (райисполкомрал председательну уну). Яттилсса бансса къаличIлай ур тIий, колхозрал правлениялул тавакъюрайн бувну къабувцуну бур Аьйша Разухъал ялагу шама чиваркI: хIухчалт Мутахъал Аьвдуллагь ва ЩутIу МахIаммахъал Сулайман (Къиппи Сулла), хъунхIухчу (утапа) Мамайхъал Оьмари (Дачу Оьмари). Фронтрайн гьан ччай, ххяхлай унува, къаувцуну ур дяъвилийн ялагу Аьйша Разухъал Мутал арс МахIамма (Аьлххо). Дяъвилийн къагьарчагу, ми циняв цалла-цалла давурттай фронтраха зий, ххувшаву гъан дуллай бивкIссар. Учиннуча, ХIажимахIамма ивкIссар цал райисполкомрал председательну, яла та чIумал хъинну агьамсса, захIматсса ва жаваблувсса, тIайланна фронтраха зузисса даврий – Уполминзагну (Уполномоченный Министерства заготовок по Кулинскому району). Лавайсса кьимат бивщуну бивкIссар Мутахъал Аьвдуллагьлул, Мамайхъал Оьмарил ва МахIаммахъал Сулайманнул захIматрангу. Чансса захIмат къабивхьуссар Султанхъал Мяммалгу. Дяъви байбихьлахьисса шиннардий му ивкIссар колхозрал председательнал хъиривчуну. 1944 шинал интту гьан увну ивкIссар Мичи-ххичнавун бизлазисса Ккуллал агьали биян бан. Яла гиккува авцIуну, гай яла захIматми шиннардий ЦIуссаккуллал колхозрал председательну зий ивкIссар пенсиялийн укканцIа. Га захIматсса чIумал цалла жандалий хIайп къаувкуну, азарунних къаурувгун, райондалий жура-журасса къуллугъирттай зий ивкIссар Мутахъал МахIаммагу.
Дяъвилийн лавгсса Аьйша Разухъал 10 чиваркIунная так 2 зана хьуссар: Мамаев МахIаммада (Сери МахIаммада) ва Султанов МахIа (Хьхьирил МахIа). Мяйннал тIурча жанну дуллуссар буттал кIанттухлу. Вайннал цIарду, ватандалухлу жанну дуллусса гайми 224 Ккуллал чиваркIунналсса кунна, мусил хIарпирдай абад дурну ду­ссар буттал шяраву дацIан дурсса гьайкалданий. ЛивтIусса кIану кIулну, ягу ятIатIар бакъа дяъвилия къабувкIссар Оьмардул шамагу арс – Жамал, Мусалав, Оьмар. Арсурваврах аьтIий, яру мурчIи хьуну, шама-шама лякьлул оьрчIах лякьа ччучлайнна бувтссар ливчIмур оьрму миннал ниттил АтIал. Жамаллул наслу къабивкIссар, Оьмар щар дуцай хьун увасса чIава жагьил ивкIссар. Мусалавл тIурча 1 арс ва 4 душ кьабивтссар: арс Кьурбан чIивину уна ивкIуссар; душру Нурижат ва Рая (Нину-героиняхъул) аьпалул хьунни чIун дакъа; СахIив ва ПатIимат тIурча ччянива хъуни бавахъул хьуну сагъ-саламатну бур, ин ша Аллагь.
Дяъвилия зана къавхьуссар Исмяйл кIиягу арс МахIму ва Мута. Мута кулпатрал къавхьунасса ивкIссар. МахIмул наслулул 10 шинал хьхьичI аьпалухьхьун лавгсса Чачардул кIия арс, кIива душ бур. Аьйша Разухъал агьулдания ялагу дяъвилия зана къавхьуссар Шу­аьйл арс ХIажи, Султаннул арснал (Мяммал) арс Аьвдулкьадир ва ттул ппу Султаннул арс Абакар. Дяъвилия зана хьуну увкIсса Мамайхъал МахIаммада (Сери МахIаммада) бусраврай зий уссия колхозраву хъуни-хъунисса давурттай (утапану, председательнал хъиривчуну м.ц.). Мува куццуй дяъвилул цIарава сагъну увксса бахтлув ия ттул буттауссу, Султаннул арс МахIа (Хьхьирил МахIа). МахIал оьрму харж бувссар хьхьирил хIаписарнал сянатрай зий. Пенсиялийн укканнин зий уссия хъуни-хъунисса аьралий къуллугъирттай (аьрали частьрал командир, Нахимовский училищалул начальник ва м.ц.), Батумрай, Ригалий, Севастополлай, Владивостокрай. Капитан 2-мур ранграл (подполковникнал) чиндалущал отставкалийн уккан багьссар, азар хьуну. МахIал душ Асият 10-11 шинал хьхьичI аьпалухьхьун лавгссар. КIия ганил арс (Рамазан ва Руслан) буссар Ессентукилий ялапар хъанай кулпатирттащал.

Ппухълуннал чувшивуртту – арсурваврал хъарур
Хъун дяъви къуртал хьуну, Ххувшаву ларсун, гьашину там хьунни 70 шин. Вай 70 шингу бигьасса, агьали Ххувшаврил кьур­тти гьаз буллай щябивкIсса дакъая. Жун, дяъвилул шиннардил оьрчIан, захIматшивурттугу, ккаши-мякьгу ккавкссар, духIан багьссар ми диялсса. Амма жу миннул хьхьичI тачIав ник къарирщуссар. Жул хьхьичI мудан дуссар ппухълуннал эбрат. ХIакьинусса кьини Аьйша Разухъал агьулданул шамилчинмур никирал чиваркIунная ца ливчIун ур – Исмяйхъал МахIаммад (Сасу МахIаммад). КIа ур жул ляхъиндалул аксакал, хIурмат бусса насихIатчи. Мукьилчинмур никиравун багьайная – 12 чиваркI, ххюйлчинмунивун багьай­сса бур 60-нния ливчусса чиваркI. Ряххилчинмур ва арилчинмур никирайн багьайсса мюрщитIултрал кьюкьа ттигу хъун хъанайнна дур. Ппухълуннал чувшивуртту, виричувшивуртту арсурвавран, ялун нанисса никиран хъарур. Акъассар жул агьулданул жагьилсса никирттаву цаягу чIун дирукун аьрали бурж къалавхъсса, иш багьувкун ватандалухлу буттахъал кунна жан дулун къахIадурссагу.
Султанхъал ХIажимахIаммадлул арс Шуаьйл, 1968 шинал Чехословакиянал иширттаву гьуртту хьуну, тамансса къучагъшивуртту дурссар, ларайсса бахшиширттан, наградар­ттан лайкь хьуссар.
1978 шинал декабрь зуруй хьхьичIва-хьхьичI Авгъаннавун бувтсса десантный дивизиялувух ивкIссар Дачухъал Аьвдуллагьлул арс Мамай. Ларсъссар бахшишру, наградартту. Мамайл къучагъшивурттая цимилагу чивчуну бивкIссар дивизионный кказитир­ттай. 1983-84-ку шиннардий мунала уссу Исмяйнгу багьссар Авгъаннаву цала аьраличунал бурж багьайсса даражалий биттур бан.
Гайра шиннардий Авгъаннаву къучагъну талай ивкIссар Мутахъал Разул арс АхIмад. Зана ивкIссар «За Отвагу»», «За боевые заслуги», «От благодарного афганского народа» ва цайми наградарттащал. 1984-85-ку шиннардий Авгъаннаву иллай, щавурду дирну наградарттащал увкIссар ялагу ца Аьйша Разухъал жагьил – Сери МахIаммадахъал Макьсудлул арс Мурад (демобилизовать увну махъ апатI хьуну аьпалул хьунни).
Аьйша Разухъал чиваркIуннал ццивикъаншиву, кьянкьа-кьурчIи­шиву, патриотиз спортравугу чIалачIи дурссар. Ккуллал шяраву хьхьичIра-хьхьичI дунияллул чемпионнал цIа ларсъсса, ялагу цимилагу тикрал дурсса Рамазан Рамазанов Аьйша Разухъал Мамайл душнил Рязаннул ПатIиматлул арснал арсри. Мунала хъирив Европаналгу, дунияллулгу чемпион хьусса Мутаев Хизри Аьйша Разухъал наслулул 5-мур никираяссар, шяравугу, райондалийгу, республикалийгу ххуйну кIулсса спортсмен, аьпа бан, Мутаев Разул (Аьлххо Разул) арсри.
1999 шинал август-сентябрь­даний чачаннал боевиктал Да­гъусттаннайн ххявхнийгу, Аьйша Разухъал цаягу жагьил тинай къаавцIуну, буттал аьрщи ядуван бувкссар, ополчениярттаву бивкIссар. Буттал кIанттухсса ччаву Аьйша Разухъал чиваркIуннал оьтту­ву ва ттурчIаву дуссар.

Дяъвилул къув-аьсру ва ганил эхорду ас-намусрал цинцилттай (эпилогран кIанттай)
1960 шин. На ура пединститутгу къуртал бувну, буттал шяраву 2 шинай учительшивугу дурну, Ккуллал райком комсомолданул 2-чинма, яла 1-чинма секретарьнал къуллугърай. ХIадур хъанай ура аспирантуралувун уххан. Микку билаятрал оьрмулуву ялун бивунни аьжаивсса иш – фронтовиктурал оьрчIру призывной оьрмулувун бухлай, цивппагу чансса буну, армиялул пополнениялул иш захIмат хъанахъаву. Му иширайнгу «первое эхо войны» чайва. Щурун бивкIру военкоматращал архIал муниха. Амма нава кунмасса жагьилтал батIлай, бувчIин буллай, нава столданух щяикIаву къатIааьн бизлан бивкIунни. Буллуну аьрзагу, навагу октябрь зуруй лавгра армиялийн. Ххуллухъин чин бувкIсса гъан-маччанаву, дус-ихтивартураву чансса бакъая, ттухь ина вила дуклан гьаврил планнугу тиннай диртун, му дяъвилул чIумалгума бронь бикIайсса къуллугъраяту, армиялийн ачаврил мяъна дурчIлай дакъархха тIий цIухху-бусу буллалиссагу. Миннан на ккуллал зумуну хъярчирай жаваб дулайссия: «Комсомолтурахь, жагьилтурахь мудан патриотизмалия гъалгъа тIинасса секретарьнан аьркиннихха му патриотизма цурда иширайнугу ккаккан дан», — куну. Аьрали къуллугъгу бав Украиннай, Винница шагьрулий. «Курс молодого бойца» буккайхту ивтун, къуртал хьунцIа уссияв «Отдельный батальон связи Дальней бомбардировочной авиации» тIисса аьрали частьрал комсоргну. КIира шинай аьраличунал буржгу лавхъун, аспирантурагу, гайми нанижатругу щаллу дуллан ивкIра рахIатсса дакIнищал ва ттангъа дакъасса намусращал.

***
Ларгуна гания тиннай 25-26 шин. 1986 шинал буттан цIасса арс Абакар ур мединститут­рал 2-мур курсираву. Ца кьини увкIунни дарсирая аьжаивсса гьавасращал. «Цивхьур?». «На аьрайн гьан къулбас дав». «Яр, мединститутрава армиялийн къабуцайссияхха дяъвилул чIумал бакъа?». «Гьан ччими буцлай буну, цаппара ттул гьалмахтал най бия, нагу къулбас дав». Иш ххал барча, та 25 шинал хьхьичI ттущала кунмасса: Хъун дяъвилул кIилчинмур эхо (чIу занабитру). Яъни, утти призывной возрастравун тайва фронтовиктурал оьрчIал оьрчIру багьлай, гайгу чансса буттахъал чанну бушиву. ЧIун тIурча нигьачIисса: Авгъаннаву дяъви най бия, тиха «ссайгъатру» ххуйсса букIлай бакъая. Мунияту арс тIайла увкссия дакIурдиву вас-ццахлищал, амма га буттал тухумрал ирсирай нанисса ас-намусрал ва патриотизмалул ххуллийх ачаврияту ххарину.

***
Ккулув махсара буниялалуя, ягу бунияла махсаралуя личIи бан захIматссар. Кув чIумал микку ишру шайссар «нарочно не придумаешь» тIисса, сериаллаву кунмассагу. Муна мукунсса иш хьуна ттущал арс армиялийсса 86 ягу 87 шинал. Отпускалий­сса гъинттул чIумал Ккулув ура ссуйхъанний. Ца чIумал ялун бувкIунни ца чан-кьан гъаншиву дусса хъамитайпа. Яхши-хашгу бувну, мурад бувсунни. «На вичIан, маччачу, бувкIра ца задрал маслихIат бан. Ва ттуру-гюрусса чIумал оьрчIайн кIил-шамилчин военкоматрая армиялийн гьансса повестка дуркIун, буруккинттарай буру ласнащал. Ми затру ххуйну кIулсса гъанчуначIан кунма, бувкIссияв вичIан маслихIат ккаккан, цукун хьунтIиссар жуща армиялия «скосить» ан вихь цIуххин». Ттула бакIрайн чиплагъшиврул бадра бувтIуни кунмасса асар хьуну, сситтулну аьнцI чавайгу ливчIун, ссавур дурну учав: «Мачча душ, му «скосить» аву» тIисса махъ цалчин баллайнугу, мяъна дурчIунни. Вил жан цIуллу дивуй, лажинни вин шагьруксса Ккуллал шяраву мунил маслихIат бансса, мукунсса даву цалла канилух дурксса инсан цама къалявкъурив, ппу дяъвилийн лавгун зана къавхьусса, арс мединститутравусса дуккавугу дяличIан дурну, яла къизгъинмур чIумал армиялийн тIайла увксса, нава дяъвилул чIумалгума къауцайсса къуллугъгу кьабивтун, билаятрал тIалавшинна чIалай тIий, аьрали бурж биттур бан лавгун ивкIсса на акъа? Ина тIисса опыт, гьула, ттул ча бикIанссар?» — куну. Гьанавиххи хьуну, учинмур бакъа ливчIсса арснах «аякьа» дувугу ссихI къадурккун, начлил ятIулгу бивчуну, бивзун лавгунни. Жул диалоггу, къавхьуну бикIайссияв, ппив хьуссар гъан-маччанавухгу, шяравухгу. Гания шинмай мукун­сса масъалагу щилчIав къабивхьуссар ттул хьхьичI.
Киров Султанов