ДР-лул приоритет проект «Обеление экономики» щаллу дуллалисса давурттал лагрулуву, ЦIуссалакрал райондалул бакIчинал тIалавшиннарайн бувну райондалий сакин бувну бур рабочая группа, захIматрал икьраллу къачирчуну ва налогирттал учетрай къабавцIуну зузими кIул баву мурадрай. Му масъалалул хIакъираву райондалул администрациялул экономикалул отделданул зузалтрал ихтиярду дуруччай органнащал ва налоговая инспекциялул зузалтращал цачIу 30 рейд дурну дур райондалул шяраваллаву.
Вайннал ххалбувну бур машлул точкарду, каферду, парикмахерскийрду, машинартту шюшайсса кIанттурду, микку зузиминнал захIматрал икьраллу чирчуну дурив кIул бан. Мукунма ххалбувну бур вай объектру тIивтIуми ишбажаранчишиву дуллалиминнал сияхIрай бурив.
Экономикалул отделданул хъунмур Бирлиянт Кьурбановал бусласимунийн бувну, хIакьинусса кьини вай ххалбигьавурттайн бувну ялун ливчуну бур захIматрал икьраллу къачирчуну зузисса 1110 инсан.
Налогирттал ва захIматрал законнава бувксса цинявннащал райондалул администрациялул вакилтурал налогирттал учетрай бацIан аьркиншиву ва захIматрал икьраллу чичин аьркиншиву бувчIин буллалисса ихтилатру бунни.
Ва даву дурну махъ чирчуну дур 673 захIматрал икьрал. Ми хъанай дур шинайсса пландалул 52%.
ЦIакь дурсса графикрайн бувну ва группалул уттигу дуллан тIий бур рейдру, укунсса ишру букьан баву мурадрай.
