ЗахIматсса даву дур цулуцалал даву. Кьинил кьинибархан хьхьепIатIи бувну чIиникIгу цулуцаврил чурххал хIал ласун буллалисса. Му даврил ца ххуйшиву дур так ссуттил дайсса даву душиву, хIаллил чIун шинай цал дакъа къадикIайшиву. Август зурул ахирданий буккай ххалайн Лаккуй.

Гъан хъанай дур му чIун. ДукIу август зурул ахирданий буттал шяравун 1-ЦIувкIрав биян лавгсса ппурттуву биялсса тамаша бував на ттизаманнул журалий цулуцисса цулуцалтрай. ЧIиникIирттан кIанттай сенокосилкарду хьхьичI даркьуну цулуй бия ми.
Гьай-гьай, сенокосилкартту мурзусса, зунххисса кIанттурдайн къадуцинссар. Амма ххулув байсса кьасса лухччив диялсса дурхха жулва зунттавугу. Ризкьилун кIилахъаялунсса ххалабакIурду буллай цулуй булувкьуну бия дукIу ЦIувкIуллал Цумур щинайсса, СсурхIиял дазуйсса мащилий. «Сенокосилкардал жул даву бигьагу, къулайгу дунни, цулуцаврил лябуккугу хьунни, гьай-гьай. Цуксса опыт бусса цулуцала ухьурчагу, даврил бущи дири буккан бан шайсса иш бакъая, яла чIиникI батлай, байл буллайгу чIун харж хъанай дия. Жун тIайлабацIу хьунни лагма-ялттусса майданну кьа­сса бушиву, сенокосилка дияйсса лухччив душиву. Аьркинссаксса ххалал луртан хIадур дувантIиссар кIинттулнин», — тIий ия фермер Расул ХIажиев. Оьрмулухун чIиникI ва мухI каруннава хIура къабувсса бугьарамигу нанияр хъинну тамаша бувну бия ЦIувкIуллал лухччайн дирсса цивилизациялий. «Илчилул» буккултралгу тамаша буваншиврул, дукIура рирщусса суратру дуккан дуллай бура нагу ттулла ххуржинттавату. ЧIал къавхьуну ххалайн буккантIиссар зунттал агьлу. Кув – чIиникIру хъарайну, кув тIурчарив – косилкартту хьхьичI даркьуну.