Ларгсса нюжмардий Москавлив хьуну дур «Аьрасатнал дакьаврил фонд» дунияллул халкьуннал жяматийсса фондрал правлениялул заседание. Муний гьуртту хьуну ур Аьрасатнал дакьаврил фондрал правлениялул член, Аьрасатнал дакьаврил фондрал Дагъусттанналмур отделениялул хъунама Мухтар Давудов.
Зулайхат Тахакьаева
Мухтар Давудовлул бусласимунийн бувну, заседаниялий гьуртту хьуну бур Аьрасатнал дакьаврил фондрал хъунама, Аьрасатнал ПаччахIлугърал Думалул СНГ-лул билаятирттал иширттал ва ватанлувтуращалсса дахIавурттал комитетрал хъунама Леонид Слуцкий, фондрал хъунаманал хъиривчутал – Аьрасатнал Жяматийсса Палаталул член Елена Сутормина, шаэр, СССР-данул ПаччахIлугърал премиялул лауреат, Аьрасатнал Жяматийсса Палаталул член Андрей Дементьев, чичу, Аьрасатнал словесностьрал академиялул, ООН-далул цивилизациялул альянсрал эксперт Анатолий Салуцкий, Аьрасатнал художествалул академиялул Президент, Аьрасатнал халкьуннал художник, Аьрасатнал Жяматийсса палаталул член Зураб Церетели.
2014 шинал дурсса даврия бусласисса ва 2015 шинал хьхьичI бивхьусса мурадирттайн багьайсса ихтилатраву Леонид Слуцкийл Дагъусттаннал дакьаврил фонд ккалли дурну дур жяматрал агьамшиву дусса программарду так ца региондалул бакъассагу, Аьрасатнал ва дунияллул лагрулий хьхьичIунну зузи дурсса жяматийсса организацияну.
Аьрасатнал дакьаврил фондрал правлениялул хъунаманал хъиривчу Зураб Церетелил цалва ихтилатраву сукку бувну бур Аьрасатнаву ца яла цIанихсса гьайкаллу дувайсса Мытищиллал заводрайн багьайсса суал. Ва дусса дур цIакьсса производствалул ва художествалул базалущалсса ляличIисса буттал кIанттул предприятие. Дуссукъатраву дуллай дусса дур Аьрасатнаву дакъасса, дазул кьатIувссагу шагьрурдал паркру, скверду, тарихрал кIантту чIюлу буллалисса чарвитул гьайкаллу, мемориаллу, скульптурарду. ХIакьину ва завод бусса бур лекьавайсса тагьарданий. Аьрасатнал дакьаврил фондрал правлениялул хIукму бувну бусса бур завод бакьин бан кабакьу бансса пикрилущал Аьрасатнал культуралул министрнайн буккан.
2014 шинал фондрал дурсса давурттая буслай, Дагъусттанналмур дакьаврил фондрал хъунама Мухтар Давудовлул кIицI лавгун бур «Мир и молодежь» тIисса программалуву «Атлант» тIисса Германнал Кельн шагьрулул интеграционный центрданущал цачIуну «Frasmus» тIисса европанал фондрал кабакьулийну Аьрасатнал ва Германнал жагьилтурал уртакьшиврул программалул лагрулуву сакин дурну диркIшиву Аьрасатнал, Германнал, Болгарнал ва Украиннал жагьилтурал хьунабакьаву. Микку зузи бувну бур проект «Права людей открывает границы» тIисса темалун хас бувсса проект. Муний гьуртту хьуну ур МахIачкъалалиясса ва Каспийскалиясса 8 дуклаки оьрчI.
«Дети России» ва «Забота» программардал лагрулуву, «Маяк» лагерьданий (ва лагерьданий гьарца шинал хъин шайсса ур 150 оьрчI) сакин бувну бур ахIвал кIюласса кулпатирттавасса оьрчIансса акция «Мы за мир во всем мире». Укунмасса акция хьуну бур 300 оьрчI хъин шайсса «Каспий» лагерьданийгу. Вай дакъасса ялагу дурну дур цаппарасса цайми социал давурттугу.
2014 шинал хIасиллайн бувну, Дагъусттаннал дакьаврил фонд ххув хьуну бур «Формирование и развитие гражданского общества на 2014-2017 годы» тIисса паччахIлугърал программалул лагрулуву, ДР-лул Миллатирттал политикалул министерствалул буллалисса «10 лучших СО НКО» тIисса Дагъусттаннал жяматийсса организациярттал ярмаркалий. Фондран дуллуну дур 12 азарда къурушрансса сертификат ва фондрал даву чIалачIи дуллалисса ролл-апп. Ихтилат къуртал буллай, Мухтар Давудовлул барчаллагь куну бур Леонид Слуцкийхь Дагъусттаннал дакьаврил фондрал проектру бакIуйн буккан бансса кабакьулухлу.
Заседаниялул ахирданий Аьрасатнал дакьаврил фондрал хъунаманал хъиривчу Елена Суторминалул бувсун бур ялунчIил фондран там хъанай душиву 55 шин. Юбилей лайкьсса даражалий даншиврул, Елена Суторминалул циняв регионал отделениярттайн тапшур бувну бур шинал ахирданийннин хъунмур управлениялийн тIайла дуккан юбилейрал хьунийн дансса давурттал план.
