ХIурмат лавайсса «Илчи» кказит буккулт! Июньдалул 12-ннийсса 24-мур номерданий дурксса Хъун дяъвилул шиннардийсса ттулва оьрмулиясса макьалалуву чичин хъамабивтун бия ттущала архIал дуклай ивкIсса Имранов Аьбдулаьзизлущал, КIубурдал колхозрая, жула учитель, аьпабиву Хайдакьов Сяидлуя тIалав бувну бивкIсса ницащалсса кутангу Гьухъалла къурув диян дурну, гиккусса жула учительнал дугьайсса хъув гъайтIий бивкIсса.

КIилчин, дяъви къуртал хьуну махъсса шиннардийсса ттулва оьрмулия: 1947 шинал Гъумучиял школагу къуртал бувну, увхссара дуклан Дагпединститутрал биологиялул факультетрайн.
ХьхьичIмур шинал институтрал директорну уссия НицIавкIратусса Таймуразов ХIанапи Аскандарович (физик), махъми шиннардий яру­ссаннал райондалиясса Оьмаров Сагид МахIаммадович (историк).
Биологиялул факультетрал деканнугу уссия ГьунчIукьатIатусса Бижаев МахIаммад Сайпуллаевич.
1951 шинал институтгу къуртал бувну, «по списку распределения» на ияв даврийн гьан ккаккан увну Бущихъиял (Ботлихский) райондалийсса Аьндиннал школалий зун. Тай шиннардийсса кьянкьасса закондалийн бувну, чара бакъа 2 шинайвагу зун аьркинссия «по направлению».
ИчIаллил тагьарданийн бувну, ттущава архсса Бущихъиял райондалийн гьан къабюхълай бушиву бувсун, ДГПИ-рал зоологиялул кафедралул хъунама К.Д. Идрисовлулгу кумаграйхчин, направление даххана дурну, на лавгссара учительну Сергокъалаллал райондалийн. Най унува лавгра райондалул ОНО-рал хъунама КрасновлучIан, ганал чансса аглан хьу, директор учIантIиссарча куна. Хъунма хIал къалавгун, УрахIиял школалул директор М. М. Мусаев увкIуна. Мунащалгу кIул хьуну, бавчуру шяравунмай. ДакIнийри директор чай буртти, нама ахьтта ларчIсса гъаравух УрахIиял шяравун бияннинсса 25 километралул ххуллийх. Мяйжанссар, Мусаевлул ттухьгу, цува чаятугу ливккун, буртти икIу куна, амма ттула намусрал кьамул къабайва оьрмулул ттуяра цукссагу хъунасса кIа ахьтта ачин ан. Мукун рязи къавхьунува бивссияв хъунна­сса УрахIиял шяравун.
КIилчинмур кьини лавгун школалийн, кIул хьуссияв кIиккусса педагогтурал коллективращал. Нава хъинну ххари хьунав ца шинал ттущала архIал институтраву дуклай бивкIсса дустал хьунабавкьуну тIий.
КIирагу шинал (1951-52 ш.) та школалий 7-нния 10-нин бияннин­сса классирттаву дихьлай уссияв химиялул ва биологиялул дарсру.
КIива махъ тиккусса ттула «хозяйннаяту». Школалийн увкIун кIилку кьинива директор МахIаммад Мусаевичлул на кIул увнав цачIава зузисса учитель Бидашев МахIаммадлущал. Ганал ттухь увкуна: «Ина ттущал учIантIиссара ца чIивима уссушиврий ялапар хъанан, нагу, ттул кулпатралгу дукаймур ва хIачIаймур вингу дикIантIиссар. Ттул мурад мури – ина ттучIава ухьурча, ттулва оьрчIангу оьрус маз тикрал хьунтIиссар», — куну. Бидашевхъул бия хъинну дугърисса халкь, ххирая хъамал. Райондалия увкIсса къуллугъчи нажагьссагу къалагайва БидашевлучIа хъамалу къавхьуну. КутIану учин, навагу Бидашевхъаяту, тайгу ттуятува рязину личIи хьуссару шавай нанийни. Аьпа баннав МахIаммадлул ва Загьидатлул, алжаннул къатлуву ххарину битаннав цив.
Закондалий ккаккан дурсса 2 шингу УрахIиял школалий учительну зий дузал дурну, 1953 шинал увкIссара шавай МахIачкъалалив. Тара 1953 шинал сентябрьданул 2-нний зун увхссара «ДАГНИИ питательных сред» (биохимикну). 1955 шинал увхссара зун биологиялул кабинетрал методистну Учительтурал пишакаршиву ларай даврил институтраву. Яла зий айивхьуссара ассистентну Дагсельхозинститутрал зоологиялул кафедралий. Кафед­ралул заведующийнугу хьхьичI шиннардий уссия Демин Дмитрий Захарович, махъ Алтаев АхIмад Халилович. Кафедралул преподавательталнугу зий буссия: Красова Лидия Федоровна, Муслимова Рафика Идрисовна, Гьарунов Гьарун ХIасанович, Ремиханов ТIагьир Алинесаидович; лаборанткахъулну: Адуева Ума, ПатIимат Татамовна, Анна Ивановна.
Му институтрал директор­ну хьхьичIмур шинал уссия ГьунчIукьатIатусса Дандамаев Шамсулвара ХIажиевич, хъирив – Куматусса Даниял Маммаевич, махъми шиннардий ия Атланауллаясса Жамбулатов МахIаммад Маммаевич.
1959 шинал ДГУ-рал дуссия баян баву «приема в целевую аспирантуру по специальности зоология», мунийн бувну, чирчусса авторефератращал аьрзагу лавсун, лавгра ДГУ-рал зоологиялул завкафедрой ПигулевскичIан. Га заявлениялийгу чивчуссия: «Желательно направить меня на учебу в Московский Госуниверситет им. Ломоносова», — куну. Амма профессорнал ттул авторефератран бия бивхьуну ялавайсса кьимат. Пигулевскил кьиматрахгу къаурувгун, «профессорнан ина цалва кафедралий къаацIансса пикрилий ушиву бувчIунурча» куну, махъсса шиннардий ДГУ-рал проректорну зузисса, ттулагу хьхьичIвасса учитель МахIаммад Сайпуллаевич Бижаевлул дуллуну ттухьхьун МГУ-лувунсса направлениягу, ххари увну тIайла увккунав.
1959 шинал хьура аспирант Ломоносовлул цIанийсса МГУ-рал энтомологиялул кафедралул. Дуллуна ттухьхьун нава зун аьркинсса диссертациялул темагу – «Экология хрущей Арчединско-Донского песчаного массива в связи с облысением песков». Элмийсса каялувчину буссия доцент Андрианова Нина Семеновна. Элмийсса материал датIлай ттул хъунмур чIун ларгуна Почвоведениялул кафедралул сакин бувсса экспедициялул ца участникну даврийн занай. Экспедициялул каялувчинугу уссия почвовед-песковед, профессор Гаэл Александр Гаврилович.
Экспедициялул штабрал бацIаву дуссия муххал ххуллийсса Фролово станциялия арх дакъасса Арчединский лесхозрай.
Гания махъ, 1967 шинал февральданул 2-нний МГУ-раву хьу­ссия ттулла диссертациялул защита. Гара шинал увкIра шавай ДГУ-раву зунсса направлениялущал. Хьунаавкьусса М. М. Жамбулатовлул увкунни: «Мы Вас провели по конкурсу на должность старшего преподавателя по кафедре энтомологии. Когда придете на работу?». ТтучIара ДГУ-лувунсса направление душиву бусайхту, гацIана телефондалувух ДГУ-рал проректор Швачковлущал бувсса маслихIатрайну, на зана хьуссара хьхьичIва ттунмагу кIулсса, навагу кIулсса ДСХА-лийсса энтомологиялул кафедралий зун, хьхьичI шиннардий – хъунама преподавательну, махъми шиннардий – доцентну.
КутIану учин, Шяраваллил хозяйствалул академиялуву лекциярду ккалай ттул хьуну дур 40 шин, миннува 5 шингу биологиялул «вступительные» экзаменну кьамул дай комиссиялул председательну.
ЧIярусса шиннардий бувсса захIматрахлу лайкь хьуну ура ректортурал ДСХА-лул ва МГУ-рал аспирантуралуву дуклакисса чIумал баян бувсса барчаллагьирттан, мукунна СССР-данул Шяраваллил хозяйствалул министерствалул чулухасса ХIурматрал грамоталун.
ДСХА-луву зузисса шиннардий дуркссар ттул 30-нния лирчусса элмийсса макьалартту. Хъанай ура дяъвилул ва захIматрал ветеран. Дур медаль «За доблестный труд в Отечественной войне 1941-1945 г.г.» ва цаймигу юбилей медаллу.
1996 шинал, давугу кьадиртун, пенсиялийн увкссара, цIуллу-сагъшиврул тагьар сававну.
Гьарун Гьарунов