Буттал КIанттул цIанийсса Хъунмасса дяъвилуву жулва бу­ттал ппухъру, ниттил ппухълу талай бивкIссар цалла аьрщи душманная мурахас дуллай. Ттул хъунмямма Рамазанов АбутIалиб Рамазаннул арс ивкIссар дяъвилул гьурттучи, дяъвилул ветеран.

Увну ур ттул хъунмямма 1918 шинал Ккуллал райондалийсса ЧIяйннал шяраву. 1938 шинал къуртал бувну Щурагьсса педучилищагу, зий ивкIун ур шяравува учительну. 1940 шинал ва тIайла увккун ур Щурагьсса бахьттагьалтрал училищалувун дуклан. Дяъви байбивхьусса гьантрай жул хъунмямма аьрайн лавгун ур цалчинминнавух Ватан дуруччин. Лейтенантнал чиндалувусса АбутIалиб талай ивну ур Украиннавун. Ца талатавриву, Виница мурахас буллалисса, ванал хъазамрайн щуну бур душманнал ккулла, ва санитартурал оьттул нанисса щавулущал уккан увну ур дяъвилул майдандалия. Муния махъ 6 барз бувну бур ванал ва щаву хъин дуллай аьрали госпитальданий Саратов шагьрулий. Ва госпитальданийсса аьрали медссувал хъунмасса хIарачат бувну бур, ванаха аякьалий, ганин цIагу диркIун дур Татьяна. Ванангу пикри хьуну бур, га душнил бивхьусса захIматгу чIалай, ттунма душ барча Татьяна тIисса цIа дизанна тIисса.
1942-1944 шиннардий Абу­тIалиб мурахас увну увкIун ур дяъвилия, захIматсса щаву дирну ивкIун тIий. Ва зун ивкIун ур цалла райондалийсса военкоматрай. 1944 шинал цIунилгу дяъвилийн гьан увара тIий, тIайла увккун ур фронтрайн. Гуржиял Гори шагьрулий аьрали курсругу къуртал бувну, зий ивкIун ур эшелоннал начальникну, фронтир­ттая букIлакIисса, фронтирттайн тIайла буклакисса аьрал хьунабакьлай, тIайла буклай.
Дяъвилул шиннардий жулва халкь чувшиврий ва кьянкьану талай бивкIссар, душманнащал данди бувккун махъгу захIмат-жапасса давурттай зийгу. Шайнал шаймур буллай зий бивкIссар мюрщисса, оьрчIшиву къа­ккарксса, найбуна хъуни хьусса оьрчIая тIайла хьуну, къари-къужрайн бияннин. Жагьилсса душру анаварсса медкумаг цукун байссарив лавхьхьуну, оьрчIру вагонну аьркинмунил ликкан, лахъан буллай, биялсса захIмат бивхьуссар. Мукунминнаясса ца яхIлув диркIссар ттул хъунна бавагу, дяъвилул ветеран, Дагъус­ттаннал лайкь хьусса учительница, Дагъусттаннал Президентнал цIа чирчусса ссят бахшишран лайкь дурсса хъамитайпа, школданул директор Рамазанова Асбат Керимовна. Орджоникидзе шагьрулий 4-мур классраву дуклакисса чIиви душ лагайсса бивкIун бур аьрали госпитальданийн щавурду дирминнал перевязкарду дуллан.
Дяъви къуртал хьуну махъ ттул хъунмяммагу зана хьуну ур буттал шяравун, Асбат буцин куну, хъатIи бувну бур. Вайннан цалчин душ бувкун, хъунмяммалгу, цалва махъ бацIан бувну, душнин дирзун дур Татьяна тIисса цIа. Жун къакIулли ссихIирчи Татьянай, ина сагъну буссарав ва дунияллий, бакъассарав, амма жул дакIурдиву ина мудангу сагъссара. Му Татьянагу ттул нинур – Шяпиева Татьяна АбутIалибовна.
Дяъвилия махъсса шиннардий ттул хъунмямма зий уссия колхозрал председательну, сельсоветрал председательну, культурно-просветительский учреждениярдал заведующийну. Мудангу дакI хъинсса, хIал бавкьусса, аьркиннал чIарав ацIан, кумаграл ка тIитIин хIадурнасса икIайва ттул хъунмямма. Жагьи-жугьултрал дянив икIайва миннан эбратну, насихIатчину. Цалва хъирив хъунмяммал кьабивтунни 7 арс-душ, 24 оьрчIал оьрчI ва 7 оьрчIал оьрчIал оьрчI.
Рамазанов АбутIалиблун дуллуну дур 20-хъул орден-медаллу. Миннувух дур ЯтIул ЦIукул орден, Буттал КIанттухсса Хъун дяъвилуву ларсъсса I даражалул орден.
90 шинал оьрмулий яхъанай жул хъунмяммал цалла дакIниву оьрмулул 65 шинал лажиндарай ларсун занай ивкIссар та дяъвилул захIматсса лишан-ккулла. Мунал учайва чIявуну: «Ттул дакIнивун, хъазамравунни ккулла кьувтIусса, ттиликIрахун бакъар. На я нигьаусу, я махъунай шайма акъа тIий. На мудангу хьхьичIунай най икIайссияв Буттал кIану буруччин душманнайн лажинну».
На пахрулий ва ххарину бикIара ттулва укунсса хъунмямма, хъунна бава диркIун тIий. КIай бия хIакьсса ватан дуруччулт-патриотътал, буттал кIанттухлу цалла жанну харж дан хIадурсса. Жунгу, цалла никиран, лахьхьин бунни, оьтту-ттурчIаву чивчунни мукун бикIан аьркиншиву. Ххаришиврун ккаллиссар Татьянал цIа.
КьурчIишиврун – хъазамраву­сса душманнал ккулла.
Нагу АбутIалиблул душнил душ Лайли Шяпиева,
ш. Каспийск