Чув-дунугу цIу ларчIсса, хаснува инсантуран бала-апатI хьусса чIумал тахсир хьуманах луглай чялиш буккай. Му чIумал ялун личай цIу ларчIсса кIанттурдай каялувшиву дуллалиманан цачIарасса диялдакъашивурттая кIулну бивкIшиву ва ми дукьан дансса чаран къалявкъушиву. Хасъсса службардал ххалбигьавуртту дурну, ми диялдакъашивуртту дукьан дансса чIун ккаккан дурну махърагу миннал кIисса кIиссурайх къабивщушиву.
Циванни идарарттай каялувшиву дуллалиминнал укунсса баччибакъашиву дуллалисса, циванни миннал цачIава зузиминналгу, миккун букIлакIиминналгу мюхчаншиву дузал дансса чаран къаляхълахъисса. Гьарица шинах райондалул прокуратуралул ялун личин бувай цIу лачIаврия мюхчан шаву мурадрайсса закондалул тIалавшиннарду щаллу къадуллалисса цикссагу кIанттурду. Хьунни кIанттурду ми идарарттал хъуниминнащал ххуллу лавсъсса хIатта уголовный делорду сукку дурссагума.
2013 шинал 50-нния ливчусса идарарттай ялун ливчунни му масъалалуцIун дархIусса 774 диялдакъашиву. Щаллу дунни 46 представление идарарттал каялувчитурая ми дукьан даву тIалав дуллалисса. Миннуйн бувну дисциплинарный жаваблувшиннарайн увцунни 33 инсан, административ жаваблувшиннарайн 30-нния ливчусса инсантал. Ци ххуллу ласларчагу, диялдакъашивуртту чан хъанай дакъар.
Прокуратуралул ва пожарный къуллугърал зузалтрал ххалбигьавурттал чIалачIи бунни идарарттал хъуниминнал, цанма хайр бакъасса харж буккавуртту дан къаччай, дукьан дуллай бакъашиву вай диялдакъашивуртту. Миннан бувчIлай бакъар масъалалул агьамшиву, пикри буллай бакъар цала баччибакъашиврийну хьун бюхъайсса бала-апатIирттая.
— Жула чIарах букканхьуви, уттинин къавхьумур утти хьунххурав тIий, — пикрибакъашиву дуллай бур.
Укунсса баччибакъашиву ххирану дацIан бюхъайссар. Пермь шагьрулий «Хромая лошадь» тIисса дялахърулул центрданий, Къазаннай «Адмирал» тIисса торговый комплексрай ва цаймигу укунмасса кIанттурдай цIу ларчIсса чIумал, ми идарарттал каялувчиталгу мукунсса иш хьунссар тIий къабивкIссар, амма миннал баччибакъашиву сававну къахьунмур хьуссар. ЧIявусса инсантал оьрмурдацIа хьуссар.
Укуннасса баччибакъашивуртту ва диялдакъашивуртту ялун лирчунни МахIачкъалаллал Ленинский райондалийсса чIярусса идарарттай.
Нанисса шинал дурсса ххалбигьавурттал ялун личин бунни 31 идаралий цIарая мюхчан шаву мурадрайсса закондалул тIалавшиннарду къадурурччусса 340-нния ливчусса ишру. Миннавух бур «Барон» ресторан, банкетру бай заллу «Восточная пальмира», «Эльсинор», машлул къатри «РОМ», «Диванто», «Стройматериалы», «Рамас», «Академия интерьера» ва м.ц. Райондалул прокурорнал хIукмулийн бувну, идарарттай цIарая мюхчан шаврил даврихлу жаваб дулайсса 17 инсан административ жаваблувшиннарайн кIункIу унни. Миннай аьмну 204 000 къурушрансса аьчIа дирхьунни. Му бакъассагу, судирттайн тIайла бувккунни диялдакъашивуртту гужрай дукьан дан баву тIалав буллалисса 8 аьрза, цанчирча вай идарарттал хъуниминнал щаллу къадурну дур уттинин пожарный надзорданул органнал дурсса цимирагу тIалавшинна. Судрайн тIайла бувксса цинявппагу аьрзирдал мурад щаллу бувну бур.
Утти гьарзат хъар хъанай бур вай идарарттал хъуниминнал жаваблувшиннарая. Цуксса анаварну ва аьркинсса куццуй дукьан дурдив вай диялдакъашивуртту, муксса мюхчан хъанахъиссар вай идарарттайн букIлакIими.
Буссар идарартту уттигу ххалбигьавуртту къадурсса, амма миккусса тагьаргу укуннасса дикIантIиссар. Ми идарарттал каялувчитурайгу дюъ дишин ччива: цIарая мюхчан шаврил масъала баччибакъашиву дурну макьабитару, харж-хурж буккан бан къаччай, инсантурал оьрмурдан ва цIуллу-сагъшиврун нигьачIийсса тагьар хIасул мадулларду куну.
С. А. Аьбдуллаев,
МахIачкъалаллал Ленинский райондалул прокурорнал хъиривчу, юстициялул хъунама советник
