Июльданул 14-ний Оьруснал драмтеатрдануву хьунни «Мы – российский народ. Дагестан многонациональный» тIисса Аьрасатнаву цалчинсса интерактивсса мультимедийный художественно-документальный изданиялул театрданул журалийсса представление. Ва хIадур бувссар ДР-лул БакIчи Рамазан АьбдуллатIиповлул сипталийну.

ХIасан Аьдилов
Шадлугърал мероприятие дайдирхьунни Аьрасатнал ва Дагъусттаннал гимнардаяту, яла ккаккан дунни ДР-лул БакIчи Рамазан АьбдуллатIиповлул видеообращение. Микку региондалул хъунаманал бувсунни Дагъусттан – чIявумиллатру бусса Аьрасатнал бутIа бушиву. «Ми бачIвасса махъру бакъар. Му хъанахъиссар ттуршвахъул миллатирттал кьадарду цачIун шаву. Дагъус­ттаннал ва ганил миллатирттал кьадар хъанахъиссар Аьрасатнал кьадарну», — увкунни ганал.
Республикалул хъунаманал увкусса куццуй, ва изданиялул хъунмур мурад хъанахъиссар жяматран ккаккан баву Дагъусттаннал миллатирттал хьхьичIуннайшивуртту, яхI, къицци ва пагьму-гьунар.
Ганал бувсунни издание республикалул школардайн ва вузирдайн биян буван аьркиншиву.
Рамазан АьбдуллатIиповлул барчаллагь увкунни 4 жилдрайсса лу чивчуну итабавкьусса аьлимтурахь, режиссертурахь, фотохудожниктурахь, редактортурахь ва луттираха зий бивкIсса чIявусса цайминнахьгу.
Шиккува бусанну, «Мы – российский народ. Дагестан многонациональный» изданиялувун бухлай бур 4 жилд: «Мы российский народ», «Дагестан многонациональный», «Они защитили Родину» ва «Страницы истории».
Изданиялул соавтор ва режиссер, АьФ-лул Президентнал премиялул лауреат Леонид Резниковлул бувсъсса куццуй, изданиялул гьануну лавсъссар Дагъусттаннал архивраву лявкъусса чIявусса документру ва тарихраву хьусса ишру. Луттираха зий ивкIссар сайки 70 инсан.
Яла лу хIадур буллай бивкIминнан дуллунни наградартту, хIурматрал грамотартту.
Презентациялий тIий бия жулва миллатирттал балайрду, къавтIавуртту, буслай бия цIа дурксса шаэртурая, спортсментурая, дяъвилул вирттаврая.