Июльданул 1-нний жулла республикалий Дусшиврул къатлуву хьунтIиссар Коррупциялущал талансса чаранну ххалбигьлагьисса хъунмасса форум. Ва агьамсса масъалалун хасну, «Открытая власть» проектрал лагрулуву, форумрая ва ванил сакиншиннарая бусласисса пресс-конференция хьунни вай гьантрай «Дагестан» РИА-лий.

З. АьбдурахIманова
Шикку гьуртту хьунни Антикоррупциялул форумрал сакиншиннарал комитетрал вакилтал Ибрагьим Ибрагьимов ва Сулайман Мурадов.
Вайннал бусаврийну, форумрай гьуртту хьун тIий бусса бур 500-нниха ливчусса инсантал, Республикалул БакIчиная тIайла хьуну, кIулшивуртту дулаврил, цIуллу-сагъшиву дуруччаврил ва цаймигу идарарттал каялувчитурайн бияннин. Мукунма шикку гьуртту хьунтIиссар ДР-лул юстициялул министр, ДР-лул прокурор, инсаннал ихтиярду дуруччай къуллугърал каялувчи ва цаймигу. Форумрал даву нантIиссар секциярдайх бавчIуну, агьамсса ва цIурувкьюсса масъалартту цачIу ххалбигьинсса мурадрай.
«ХIакьину билаятрал каялувшиннарал хьхьичI агьамсса суал бур – властьрал структурардаву, социал арардаву цIакь хьусса коррупция духлаган дан багьлагьи­сса. Коррупциялул ишру чан хьуну бур так ишбажаранчишиврул аралуву, цанчирча шикку дуну тIий конкуренция. Коррупция яла тIутIайх дирчусса хIукуматрал структурардаву тIурча тагьар дакI ххари дансса дакъар. Форумрай гьуртту хьун жу оьвчаву дуварду кIулшивуртту дулаврил идарарттал хъуниминнайн. Цанчирча мукунсса ишру чIявуну микку хIисав шайну тIий. Жулва халкьуннан цалла ихтиярду къакIулшивугу дур коррупциялун ххуйсса кабакьу. Жула инсан ур лулттурасса дуллуну, цалва буцири масъалартту дузал бан анавар уклай. Цалла ихтиярдал хъирив буккан танмалсса халкьгу мива низам лиян дувулт хъанахъиссар. Мукунминнангу танмихI буллан аьркинссар», — увкунни оргкомитетрал вакилнал.