ДакIний бур хьхьичIва-хьхьичI нава «Илчи» був­ккусса куц. ЦIан лакьлакьисса чIун дия, жула махIлалийсса хъамитайпа бувкIуна, оьл къашавай бурча, нанукьай урган тIий. Тайннал хъювун увххукун, къапулух щяв «Илчи» кказит бия, цалчинсса номер.

На гайннаннийн увххун, оьлин аьркинсса дарувгу бувну, шавай наникун, кказит гиккува бия, залуннан хIисав къавхьуну, на га, цIукъавххуна ттущала шаппай лавсун, шаппа бувккуссия. ДакIний бур га цалчинмур номерданий Муса Маннаровлуягу чивчуну бия, бугу бувккуну, хьхьунил лякьлуву на кказит лавсний бишин лавгссияв. Мукун на чивчусса залуннаяр хьхьичI «Илчи» бувккуссия.
ТIайламур бусан, на таман­сса шиннардий «Илчи» даврий бувккуну гьашиву дайссия. Ца ппурттуву ЧIяйннал дянивмур даражалул школалул 90 шинал юбилейрайн чIявусса халкь бавтIсса байрандалий Качар Абачараевнагу бия. Мунил га байрандалий мукун ххуйсса махъ лавхъунахха, хаснува ЧIяйннал жяматрая, цуппа чIивисса чIумал, ЧIяв школалий ккалай бивкIсса чIунну дакIнийн дирчуна. ХIакьинусса кьинигу Качар Абачараевнал га юбилейрай ЧIяйннал агьалиная, школалия бувсса ххуйсса ихтилат хъама­къабитай. Ттухьхьунма нава махъ буллуссия Качар Абачараевнал, хъинсса нитти-буттал душнил хIурматран, «Илчи» чикъавчуну къабитанна куну. Гания шинмай «Илчи» ва на гужсса дусталлу.
ХIакьинусса кьинигу, хъунмасса махъ къабусанна, амма Ккуллал райондалий ялапар хъанахъисса агьалинал дянив «Илчи» кказит хьхьичIва-хьхьичI нари буккайсса. Нюжмар кьини, ахттая махъ Лаващату Ваччав поч­талул машина бучIансса мугьлат бакъа, почталийн гьара даврия, кувний кказитру почравун дахьва буххан буллалийни ияра, гиккусса зузалтрал тту­хьхьун кказит гава цIана, хъягу-хъяй, булайссар, аьдат хьуну, кувни жула ЧIяйннал почтальон Зугьрагу бучIайссар гиккун.
Гиккува ххилтIу бувну бу­ккара щилкIуй канил бугьаннин. Хъунмасса барчаллагь Лаващиял пучрал отделениялун, пуч чIумуй ххилаххисса, шагьрулий­сса халкьунначIан кунма шяравунгу биян байсса.
Ахъушав пучрал отделение буний Ваччав бияйва итни, тталат кьинирдай. Ваччавсса пучрал отделениялийсса «Книга жалоб и предложений» журналданийгу барчаллагьрал махъру чичав Лаващиял почталухь, почта чIумуй биян баврихлу. Лажиннича, ци-бунугу багьана бувну, почта ххилаххаву Ахъушавнмай бутан мабитари.
«Илчи» къачивчусса цинявппагу лакрахьгу ттул хъунмасса миннатри, чичара, ккалаккияра лакку кказит «Илчи», бучIан бувара зула ужагърайн «Илчи», зучIангу занахьунтIиссар барачат, занахьунтIиссар лакку гьава, зувагу Лаккуйн бивссаксса хьунтIиссару. Ттущала зузисса гьалмахтурахьгу на даимангу учара, цукун шай зуща бацIан «Илчи» къачивчуну, ужагърайн бучIан къабувну!
Шиккува дакIнийхтунусса хъунмасса барчаллагь жула ЧIявсса почтальон Умарова Зугьран, «Илчи» ва цайми кказит-журналлу чIумуй биян буллали­сса. Зугьра бур хIакьсса почтрал зузала!
Арсен Аьбдуллаев,
ш. ЧIяйми

Ялун ххи буван

Ххирасса буккулт!
Вана цIуну тIиртIусса «Илчи» ттул оьрмулуву» тIисса рубрикалийн бувкIсса цалчинсса ча­гъар, цалчинсса читIу. Рубрикалул хъиндайдихьу дуван жу цIуницIа рирщуссия 1994 шинал Бакуя дуркIсса, «Илчи» кказитрал цалчинма редактор Гьарун Саэдовлуятусса макьала.
Му макьалалул авторгу Гьарун Саэдовлул даврил гьалмахчу Курди Закуевлул арс Фаик Закуеври.
ХIакьину тIурча буккулт­рава рубрикалул хъиндайдихьу дунни «Илчилул» ччянияцIавасса дус Арсен Аьбдуллаевлул. Барчаллагьри мунангу.

Ххирасса буккулт!
Чичара зулвами пикрирду ва маслихIатру.
Бусияра зулмур оьрмулуву цукунсса кIану бувгьуссарив «Илчи» кказитрал. Бусияра миллатрал прессалул биялалия. Зунна кказитрал давриву хьуну ччисса дахханашивурттая, кказитрал зузалтращалсса хьунабакьавурттая. Жу ялугьланну.
ПатIимат Рамазанова